തീപ്പൊരി പ്രകടനം,വിമർശകരുടെ വായടപ്പിച്ച് ലിസാൻഡ്രോ മാർട്ടിനസ്,തുടർച്ചയായി രണ്ടാം മത്സരത്തിലും മാൻ ഓഫ് ദി മാച്ച്!|Lisandro Martinez

ഉയരക്കുറവുള്ള ലിസാൻഡ്രോ മാർട്ടിനസിന് പ്രീമിയർ ലീഗിൽ തിളങ്ങാനാവില്ല,സെന്റർ ബാക്ക് പൊസിഷനിൽ ലിസാൻഡ്രോയെ കളിപ്പിക്കുന്നത് മണ്ടത്തരമാണ് തുടങ്ങിയ വിമർശനങ്ങൾ തുടക്കത്തിൽ തന്നെ ഏൽക്കേണ്ടി വന്ന താരമാണ് അർജന്റീനക്കാരനായ ലിസാൻഡ്രോ.ബ്രന്റ്ഫോർഡിനെതിരെ മാഞ്ചസ്റ്റർ യുണൈറ്റഡ് പരാജയപ്പെട്ടതോടുകൂടിയായിരുന്നു ഈ വിമർശനങ്ങൾ താരത്തിന് ഏൽക്കേണ്ടി വന്നത്.

എന്നാൽ തൊട്ടടുത്ത മത്സരത്തിൽ തന്നെ ലിസാൻഡ്രോ വിമർശകരുടെ കണ്ടെത്തലുകൾ തെറ്റാണെന്ന് തെളിയിച്ചു.ലിവർപൂളിന്റെ ശക്തമായ മുന്നേറ്റ നിരക്കെതിരെ പോരാട്ട വീര്യത്തോടെ പൊരുതുന്ന ലിസാൻഡ്രോയെയാണ് കാണാൻ സാധിച്ചിട്ടുള്ളത്. മത്സരത്തിലെ മാൻ ഓഫ് ദി മാച്ച് പുരസ്കാരം കൈക്കലാക്കിയതും ഈ അർജന്റീനക്കാരൻ തന്നെയായിരുന്നു.

കുറച്ച് മുമ്പ് സൗത്താപ്റ്റണെതിരെ നടന്ന മത്സരത്തിലും ഉജ്വല പ്രകടനം പുറത്തെടുത്തു കൊണ്ട് ലിസാൻഡ്രോ മാർട്ടിനസ് വിമർശകരുടെ വായടപ്പിച്ചിട്ടുണ്ട്. മത്സരത്തിൽ യുണൈറ്റഡ് ക്ലീൻ ഷീറ്റ് നേടിയപ്പോൾ അതിന് യുണൈറ്റഡ് ഏറ്റവും കൂടുതൽ നന്ദി പറയേണ്ടത് ലിസാൻഡ്രോയോടാണ്. തുടർച്ചയായ രണ്ടാം മത്സരത്തിലും മാൻ ഓഫ് ദി മാച്ച് പുരസ്കാരം നേടി കൊണ്ട് യുണൈറ്റഡ് ആരാധകരുടെ പ്രിയപ്പെട്ട താരമായി മാറാൻ ലിസാൻഡ്രോക്ക് കഴിഞ്ഞു.

100% ground duels won,100% successful dribbles,61 touches,48 passes,7 clearances,5/5 aerial duels won,4 interceptions ഇതൊക്കെയാണ് താരത്തിന്റെ ഇന്നത്തെ മത്സരത്തിലെ കണക്കുകൾ. ഒരു പിഴവ് പോലും താരം മത്സരത്തിൽ വരുത്തി വെച്ചിട്ടില്ല എന്നുള്ളത് ഈ കണക്കുകളിൽ നിന്നും വളരെ വ്യക്തമാണ്. തുടർച്ചയായ രണ്ടാം മത്സരത്തിലും യുണൈറ്റഡ് വിജയം നേടുന്നതിൽ വലിയ റോൾ വഹിക്കാൻ ഈ അർജന്റീനക്കാരന് കഴിഞ്ഞു.

അർജന്റീന സംബന്ധിച്ചിടത്തോളവും ആരാധകരെ സംബന്ധിച്ചിടത്തോളവും വളരെയധികം സന്തോഷം പകരുന്ന പ്രകടനമാണ് ലിസാൻഡ്രോ മാർട്ടിനസിന്റേത്.വരുന്ന വേൾഡ് കപ്പിൽ താരത്തിന്റെ ഈ മികവ് അർജന്റീനയുടെ ദേശീയ ടീമിന് വളരെയധികം ഗുണം ചെയ്യുമെന്നുള്ള കാര്യത്തിൽ സംശയങ്ങളൊന്നുമില്ല.