പിഎസ്ജി വിട്ട ഉറ്റചങ്ങാതി ലിയാൻഡ്രോ പരേഡസിന് യാത്രയപ്പ് സന്ദേശം നൽകി ലയണൽ മെസ്സി|Lionel Messi

പിഎസ്ജിയുടെ അർജന്റൈൻ മിഡ്‌ഫീൽഡറായ ലിയാൻഡ്രോ പരേഡസിന് ക്ലബ്ബിനോട് വിട പറയേണ്ടി വന്നിരുന്നു. പുതിയ പരിശീലകനായ ഗാൾറ്റിയരുടെ പദ്ധതികളിൽ ഇടമില്ലാത്തതിനാലാണ് പരേഡസ് ക്ലബ് വിട്ടത്. തുടർന്ന് താരം സിരി എ ക്ലബായ ജുവന്റസിലേക്ക് പോവുകയും ചെയ്തിരുന്നു.

ഒരു വർഷത്തെ ലോൺ കരാറിലാണ് പരേഡസ് ഇപ്പോൾ ക്ലബ്ബ് വിട്ടിരിക്കുന്നത്. ഈ സീസണിന് ശേഷം 25 മില്യൺ യൂറോ നൽകുകയാണെങ്കിൽ ജുവന്റസിന് ഈ അർജന്റീനക്കാരനായ താരത്തെ സ്വന്തമാക്കുകയും ചെയ്യാം.പിഎസ്ജിയുടെ മറ്റൊരു അർജന്റൈൻ താരമായ ഡി മരിയയെ ഫ്രീ ട്രാൻസ്ഫറിൽ സ്വന്തമാക്കാനും ജുവന്റസിന് ഈ വിന്റോയിൽ കഴിഞ്ഞിരുന്നു.

എന്നാൽ പിഎസ്ജിയുടെ അർജന്റൈൻ സൂപ്പർ താരമായ ലയണൽ മെസ്സിക്കാണ് ഇതിന്റെയെല്ലാം നഷ്ടം. എന്തെന്നാൽ തന്റെ രണ്ട് ഉറ്റ സുഹൃത്തുക്കളയാണ് ഇപ്പോൾ മെസ്സിക്ക് ക്ലബ്ബിൽ നിന്നും നഷ്ടമായിരിക്കുന്നത്.പരേഡസ് ക്ലബ്ബ് വിട്ടതിന് പിന്നാലെ മെസ്സി തന്റെ ഇൻസ്റ്റഗ്രാമിൽ ഉറ്റ ചങ്ങാതിക്ക് യാത്രയപ്പ് സന്ദേശം നൽകിയിട്ടുണ്ട്. പുതിയ തുടക്കത്തിന് എല്ലാവിധ വിജയാശംസകളുമാണ് ലയണൽ മെസ്സി നേർന്നിട്ടുള്ളത്.

‘ കരിയറിലെ ഈ പുതിയ ഘട്ടത്തിന് എല്ലാവിധ വിജയാശംസകളും നേരുന്നു.പാരീസിൽ നമുക്ക് ഒരുപാട് കാര്യങ്ങൾ പങ്കുവെക്കാൻ കഴിഞ്ഞത് വണ്ടർഫുൾ ആയിട്ടുള്ള അനുഭവമായിരുന്നു.നമ്മൾ ഒരുമിച്ച് ജീവിച്ചിട്ടുള്ള മനോഹരമായ നിമിഷങ്ങൾ ഞാൻ എക്കാലത്തും ഓർമ്മിക്കുക തന്നെ ചെയ്യും ‘ ഇതാണ് മെസ്സി പരേഡസിന് നൽകിയ സന്ദേശം.

എന്നാൽ അധികം വൈകാതെ തന്നെ പരേഡസിനെയും മെസ്സിയെയും ഒരുമിച്ച് നമുക്ക് കാണാൻ സാധിക്കും.അർജന്റീന ഈ മാസം രണ്ട് സൗഹൃദ മത്സരങ്ങൾ കളിക്കുന്നുണ്ട്.മാത്രമല്ല വരുന്ന നവംബറിൽ നടക്കുന്ന ഖത്തർ വേൾഡ് കപ്പിൽ തിരൂർ താരങ്ങൾക്കും അർജന്റീനക്ക് വേണ്ടി ഒരുപാട് ജോലികൾ പൂർത്തിയാക്കാനുമുണ്ട്.