ടീം എല്ലാ തവണയും വിജയിക്കുമെന്ന് പ്രതീക്ഷിക്കാനാവില്ല, തെറ്റുകൾ തിരുത്തി ബ്ലാസ്റ്റേഴ്സ് തിരിച്ചുവരും |Kerala Blasters
ഞായറാഴ്ച നടന്ന രണ്ടാം ഹോം മത്സരത്തിൽ കേരള ബ്ലാസ്റ്റേഴ്സിന്റെ വിജയം കാണാൻ കലൂർ ജവഹർലാൽ നെഹ്‌റു സ്റ്റേഡിയത്തിലെത്തിയ ആരാധകർക്ക് വലിയ നിരാശയോടെയാണ് പുറത്തേക്ക് പോയത്. ഇന്നലെ നടന്ന മത്സരത്തിൽ എടികെയോട് രണ്ടിനെതിരെ അഞ്ചു ഗോളിന്റെ ദയനീയ പരാജയമാണ് ബ്ലാസ്റ്റേഴ്സ് ഏറ്റുവാങ്ങിയത്.
40,000 ത്തോളം വരുന്ന ബ്ലാസ്റ്റേഴ്സ് ആരാധകരുടെ പ്രതീക്ഷകൾ തകർത്ത് എടികെ മോഹൻ ബഗാന് വേണ്ടി ദിമിത്രി പീറ്റേഴ്‌സ് ഹാട്രിക്ക് നേടുകയും ചെയ്തു. നിരാശാജനകമായ തോൽവി ഏറ്റുവാങ്ങിയെങ്കിലും ആരാധകർ തങ്ങളുടെ ടീമിനെ കൈവിട്ടില്ല. ബ്ലാസ്റ്റേഴ്സ് തകർപ്പൻ തിരിച്ചുവരവ് നടത്തുമെന്ന് അവർക്ക് ഉറപ്പുണ്ട്.“ഇത് ഫുട്ബോൾ ആണ്, ഞങ്ങളുടെ ടീം എല്ലാ തവണയും വിജയിക്കുമെന്ന് ഞങ്ങൾക്ക് പ്രതീക്ഷിക്കാനാവില്ല. ഞങ്ങൾ തിരിച്ചുവരും,” ആരാധകർ ഉറച്ച വിശ്വാസത്തോടെ ഉറക്കെ പറഞ്ഞു.കളി മാറ്റിമറിക്കാൻ കഴിവുള്ള അഡ്രിയാൻ ലൂണയെ എടികെ നന്നായി മാർക്ക് ചെയ്തതാണ് ബ്ലാസ്റ്ററിനു തിരിച്ചടിയായി മാറിയത്.അടുത്ത മത്സരത്തിൽ ഇതിനൊരു പരിഹാരം കണ്ടെത്തുകയും വേണം.
മത്സരത്തിന്റെ ആദ്യ 20 മിനുട്ടിൽ ബ്ലാസ്റ്റേഴ്സ് പൂർണ ആധിപത്യം പുലർത്തുകയും ഗോൾ നേടുകയും ചെയ്തതോടെ ആരാധകർ മറ്റൊരു വിജയം സ്വപ്നം കണ്ടു .എന്നാൽ ഗോൾ വീണതോടെ തിരിച്ചടിച്ച എടികെ പിന്നീടുള്ള 70 മിനുട്ടിൽ ബ്ലാസ്‌റ്റേഴ്‌സിനെ നിഷ്പ്രഭമാക്കുന്ന പ്രകടനം പുറത്തെടുക്കുകയും ചെയ്തു. ആദ്യ 20 മിനിറ്റിനുള്ളിൽ കേരള ബ്ലാസ്റ്റേഴ്സ് സൃഷ്ടിച്ച അവസരങ്ങളിൽ പകുതിയും ഗോളിൽ അവസാനിപ്പിച്ചിരുന്നെങ്കിൽ ആദ്യ പകുതിയിൽ തന്നെ കളി അവസാനിക്കാമായിരുന്നു. കേരള ബ്ലാസ്റ്റേഴ്സ് കൂടുതൽ അവസരങ്ങൾ പാഴാക്കിയത് എടികെ മോഹൻ ബഗാനെ കളിയിൽ കൂടുതൽ ശക്തി പ്രാപിക്കാൻ അനുവദിച്ചു. എടികെ ഗോളിന് മുന്നിൽ ക്ലിനിക്കൽ ഫിനിഷിംഗ് പ്രദർശിപ്പിച്ചു, അത് മത്സരത്തിൽ ബ്ലാസ്റ്റേഴ്സിന് നഷ്ടമായി.
അതിവേഗ പ്രത്യാക്രമണത്തിലൂടെയാണ് ബ്ലാസ്‌റ്റേഴ്‌സിനെ എടികെ കീഴ്പെടുത്തി കളഞ്ഞത്. ലീഗിലെ ഏറ്റവും മികച്ച മിഡ്ഫീൽഡ് ജോഡികൾ ആയ എടികെ യുടെ ജോണി കൗക്കോയും ഹ്യൂഗോ ബൂമസും മത്സരത്തിൽ മിന്നുന്ന പ്രകടനം ആണ് നടത്തിയത്.ആദ്യ 20 മിനിറ്റിൽ ജെക്‌സണും പുറ്റയും മധ്യനിര ഭരിച്ചപ്പോൾ, ശേഷിക്കുന്ന 70 മിനിറ്റുകളിൽ കൗക്കോയും ബൗമസും ജോഡിയെ മറികടക്കുന്ന പ്രകടനം നടത്തി.കൗക്കോ ഒരു ഗോൾ നേടുകയും ചെയ്തു.
ഗോൾ ഒരുക്കിയത് ബൗമസ് ആയിരുന്നു,എടികെക്ക് കളിയിലേക്ക് തിരിച്ചുവരാൻ വഴിയൊരുക്കിയ ഗോൾ ആയിരുന്നു ഇത്.അവരുടെ കഴിവാണ് എടികെയെ അതിവേഗ പ്രത്യാക്രമണങ്ങൾ സൃഷ്ടിക്കാൻ സഹായിച്ചത്.ഇന്ത്യൻ സൂപ്പർ ലീഗിൽ ഇരുടീമുകളും തമ്മിലുള്ള അഞ്ചാമത്തെ ഏറ്റുമുട്ടലായിരുന്നു ഇത്.നാല് മത്സരങ്ങളിൽ എടികെ വിജയിച്ചപ്പോൾ ബ്ലാസ്റ്റേഴ്സ് ഒന്നും ജയിച്ചില്ല.