എംബാപ്പെയ്ക്കെതിരെ ഒളിയമ്പുമായി നെയ്മർ; പുതിയ വിവാദം |Neymar

പി എസ് ജി വിട്ട് സൗദി അറേബ്യൻ ക്ലബ്ബായ അൽ ഹിലാലിലേക്ക് ചേക്കേറിയതിന് പിന്നാലെ തന്റെ മുൻ സഹതാരം എംബാപ്പെക്കെതിരെ ഒളിയമ്പുമായി നെയ്മർ. നെയ്മർ വിഷയത്തിൽ എംബാപ്പയെ വിമർശിച്ചു കൊണ്ടുള്ള ഒരു ഇൻസ്റ്റാഗ്രാം പോസ്റ്റിന് ലൈക്ക് അടിച്ചു കൊണ്ടാണ് നെയ്മർ പുതിയ വിവാദങ്ങൾക്കും ചർച്ചകൾക്കും തിരികൊളുത്തിയിരിക്കുന്നത്.

‘ഫിക്വയിപുട്ടോമെസ്കോ’ എന്നാൽ ഇൻസ്റ്റാഗ്രാം അക്കൗണ്ടിൽ നിന്ന് വന്ന പോസ്റ്റാണ് വിഷയത്തിന് ആധാരം. പ്രസ്തുത പോസ്റ്റിൽ നെയ്മർ പി എസ് ജി വിടാനുള്ള കാരണമായി ചൂണ്ടിക്കാട്ടുന്നത് എംബാപ്പെയെയാണ്. നെയ്മറെ ടീമിൽ നിന്ന് ഒഴിവാക്കാൻ എംബാപ്പെ നേരത്തെ പി എസ് ജി മാനേജ്മെന്റിനോട് ആവശ്യപ്പെട്ടിരുന്നുവെന്നും നെയ്മർ അൽ ഹിലാലിലേക്ക് പോയെന്ന് ഉറപ്പായതോടെയാണ് എംമ്പാപ്പെ പിഎസ് ജിയുടെ പരിശീലന സെക്ഷനിലേക്ക് മടങ്ങിയെത്തിയത് എന്നുമാണ് പ്രസ്തുത ഇൻസ്റ്റഗ്രാം പോസ്റ്റിൽ കുറിച്ചിരിക്കുന്നത്.

ഈ പോസ്റ്റിനാണ് നെയ്മർ ലൈക്ക് അടിച്ചിരിക്കുന്നത്. ഇതോടെ തന്റെ കൂടുമാറ്റത്തിന് പിന്നിൽ എംബാപ്പയുടെ കളികളാണ് എന്ന് ആരാധകർക്ക് വ്യക്തമായിരിക്കുകയാണ്. നെയ്മർക്ക് പി എസ് ജിയിൽ തുടരാനായിരുന്നു ആഗ്രഹം. ഇക്കാര്യം നെയ്മർ നേരത്തെ അറിയിച്ചതുമാണ്. പി എസ് ജി വിടുകയാണെങ്കിൽ തന്റെ പഴയ ക്ലബ്ബായ ബാഴ്സയിലേക്ക് മടങ്ങി പോകുവാനും നെയ്മർ ആഗ്രഹം പ്രകടിപ്പിച്ചിരുന്നു.

ഇത് രണ്ടും നടക്കാതെ വന്നതോടുകൂടിയാണ് നെയ്മർ സൗദി അറേബ്യൻ ക്ലബ്ബായ അൽ ഹിലാലിലേക്ക് പോകുന്നത്. യൂറോപ്പിൽ ഇനിയും ഒരുപാട് അവസരങ്ങൾ ഉണ്ടായിട്ടും താരം സൗദിയിലേക്ക് പോയത് അദ്ദേഹത്തിന്റെ ആരാധകരെയും നിരാശയിലാക്കിയിട്ടുണ്ട്.