ബ്ലാസ്റ്റേഴ്‌സ് താരത്തിനെ നോട്ടമിട്ട് വമ്പൻ ക്ലബ്ബുകൾ, ലൂണയുടെ പകരക്കാരന്റെ അപ്ഡേറ്റ് ഇതാണ് | Kerala Blasters

ഇന്ത്യൻ സൂപ്പർ ലീഗ് സീസണിൽ നിലവിൽ പോയിന്റ് ടേബിളിൽ ഒന്നാം സ്ഥാനത്തുള്ള കേരള ബ്ലാസ്റ്റേഴ്സ് എഫ് സി യുടെ സൂപ്പർ താരവും നായകനുമായ അഡ്രിയാൻ ലൂണ സീസണിനിടെ പരിക്ക് ബാധിച്ചു പുറത്തായിരുന്നു. നിലവിൽ ശസ്ത്രക്രിയ കഴിഞ്ഞ താരം തന്റെ ഫാമിലിക്കൊപ്പം നാട്ടിൽ വിശ്രമത്തിലാണ്. കാര്യമായി പരിക്ക് ബാധിച്ച ലൂണക്ക് കളി കളത്തിലേക്ക് തിരികെയെത്താൻ മാസങ്ങൾ എടുക്കുമെന്നതിനാൽ ഈ സീസണിൽ കേരള ബ്ലാസ്റ്റേഴ്സിന് വേണ്ടി കളിക്കാനായേക്കില്ല.

അതിനാൽ തന്നെ അഡ്രിയാൻ ലൂണക്ക് പകരക്കാരനെ തേടി നടക്കുകയാണ് കേരള ബ്ലാസ്റ്റേഴ്സ്. നിലവിൽ ലൂണയുടെ പകരക്കാരനെ കൊണ്ടുവരാനുള്ള ചർച്ചകളിലാണ് കേരള ബ്ലാസ്റ്റേഴ്‌സ് എഫ്സിയെന്ന് ഏറ്റവും ഒടുവിൽ വന്ന അപ്ഡേറ്റ് സൂചിപ്പിക്കുന്നുണ്ട്. കൂടാതെ നിലവിൽ പുറത്തുവരുന്ന ട്രാൻസ്ഫർ അപ്ഡേറ്റുകൾ പ്രകാരം അഡ്രിയാൻ ലൂണക്ക് പകരം ഫോർവേഡ് അല്ലെങ്കിൽ വിങ്ങർ പൊസിഷനിൽ കളിക്കുന്ന താരത്തിനെയാണ് ബ്ലാസ്റ്റേഴ്‌സ് കൊണ്ടുവരാൻ ഉദ്ദേശിക്കുന്നത്.

കൂടാതെ ജനുവരി ട്രാൻസ്ഫർ വിൻഡോ തുറന്നതിനാൽ കേരള ബ്ലാസ്റ്റേഴ്‌സ് സംബന്ധിച്ച് നിരവധി ട്രാൻസ്ഫർ അപ്ഡേറ്റുകൾ പുറത്തുവരുന്നുണ്ട്. കേരള ബ്ലാസ്റ്റേഴ്‌സ് എഫ്സിയുടെ ഇന്ത്യൻ സൂപ്പർ താരമായ ഹോർമിപാമിനെ സ്വന്തമാക്കാൻ ഐഎസ്എലിലെ ശക്തരായ മുംബൈ സിറ്റി എഫ്സി ഉൾപ്പടെയുള്ള ടീമുകൾ മുന്നോട്ട് വരുന്നുണ്ട്.

സൂപ്പർ താരത്തിനു നിലവിൽ കേരള ബ്ലാസ്റ്റേഴ്‌സ് ടീമിൽ അവസരങ്ങൾ കുറവുമാണ്. മുംബൈ സിറ്റി എഫ്സിയുൾപ്പടെയുള്ള ചില ക്ലബ്ബുകളാണ് ഹോർമിപാമിനെ സൈൻ ചെയ്യാൻ താല്പര്യം കാണിച്ചുകൊണ്ട് മുന്നോട്ട് വന്നിട്ടുള്ളത്. നേരത്തെ സീസൺ തുടങ്ങുന്നതിനു മുൻപും ഹോർമിയെ സ്വന്തമാക്കാൻ ക്ലബ്ബുകൾ മുന്നോട്ട് വന്നെങ്കിലും ട്രാൻസ്ഫർ ഡീൽ പൂർത്തിയാക്കാനായില്ല. ഇപ്പോൾ താരത്തിനു വേണ്ടി ജനുവരി ട്രാൻസ്ഫർ വിൻഡോയിൽ ടീമുകൾ ബ്ലാസ്റ്റേഴ്സിനെ സമീപിക്കുന്നുണ്ട്.