കൂടെ കളിച്ച ഏറ്റവും മികച്ച മൂന്ന് താരങ്ങളെ തിരഞ്ഞെടുത്തു ഡിബാല, അത്ഭുതപ്പെടുത്തിയത് മൂന്നാമൻ.

നിലവിൽ എ എസ് റോമക്ക് വേണ്ടി കളിച്ചുകൊണ്ടിരിക്കുന്ന അർജന്റീന സൂപ്പർതാരം പൗലോ ഡിബാല കൂടെ കളിച്ചവരിലെ ഏറ്റവും മൂന്ന് മികച്ച താരങ്ങളെ തിരഞ്ഞെടുത്തു. ആദ്യ രണ്ടു സ്ഥാനങ്ങളിൽ ഏവരും പ്രതീക്ഷിച്ച ലയണൽ മെസ്സിയും ക്രിസ്ത്യാനോ റൊണാൾഡോയാണെങ്കിലും മൂന്നാമൻ ഏവരെയും അത്ഭുതപ്പെടുത്തി.

അർജന്റീനയിലും യുവന്റസ്സിലും ഒരുമിച്ച് കളിച്ച ഗോൺസാലോ ഹിഗ്വയിനെയാണ് മൂന്നാമതായി പൗലോ ഡിബാല തിരഞ്ഞെടുത്തിട്ടുള്ളത്. റയൽ മാഡ്രിഡിന് വേണ്ടി 264 മത്സരങ്ങളിൽ 121 ഗോളുകൾ നേടിയിട്ടുണ്ട് ഹിഗ്വയിൻ. പിന്നീട് നാപ്പോളി, യുവന്റസ്, എ സി മിലാൻ ചെൽസി എന്നീ പ്രമുഖ ക്ലബ്ബുകൾക്കെല്ലാം വേണ്ടി ബൂട്ട് കെട്ടിയിട്ടുണ്ട് ഈ അർജന്റീനിയൻ. നിലവിൽ മെസ്സി കളിക്കുന്ന എംഎൽഎസ് ടീമായ ഇന്റർമയാമിയിൽ ആയിരുന്നു പ്രൊഫഷണൽ കരിയറിന് അവസാനം കുറിച്ചത്.

ഒന്നാമനായി മെസ്സിയെ തിരഞ്ഞെടുത്ത ഡിബാല അദ്ദേഹത്തെക്കുറിച്ച് വാചാലനായി. “മെസ്സിക്കൊപ്പം കളിക്കുക എന്നത് തന്റെ കുട്ടിക്കാലം മുതലേ ഉള്ള സ്വപ്നമായിരുന്നു, ലോകകപ്പ് വിജയത്തെക്കുറിച്ച് മറക്കാൻ സാധിക്കില്ല” എന്നും ഡിബാല കൂട്ടിച്ചേർത്തു. മറ്റൊരു താരം ക്രിസ്ത്യാനോ റൊണാൾഡോയായിരുന്നു. താരത്തിന്റെ മത്സരത്തോടുള്ള അർപ്പണബോധത്തെയാണ് ഡിബാല വാനോളം പ്രശംസിച്ചത്. സൗദി അറേബ്യയിൽ 39 വയസ്സ് കഴിഞ്ഞിട്ടും റൊണാൾഡോ നേടുന്ന വിജയത്തെക്കുറിച്ച് ഡിബാലയ്ക്ക് ‘അത്ഭുതമില്ല’ എന്നാണ് മറുപടിയുള്ളത്.