ലോറസ് അവാർഡിന് നോമിനേറ്റ് ചെയ്യപ്പെട്ടതിൽ സന്തോഷം, പക്ഷേ മെസ്സി അർഹിക്കുന്നു: റാഫേൽ നദാൽ

കഴിഞ്ഞ വർഷത്തെ ഏറ്റവും മികച്ച സ്പോർട്സ് താരത്തിന് സമ്മാനിക്കുന്ന അവാർഡാണ് ലോറസ് അവാർഡ്.ലോറസ് വേൾഡ് സ്പോർട്സ് മാൻ ഓഫ് ദി ഇയർ എന്നാണ് ഇതിന്റെ മുഴുവൻ പേര്.കഴിഞ്ഞ വർഷത്തെ അഥവാ 2022ലെ ഏറ്റവും മികച്ച കായികതാരങ്ങളെ ഉൾപ്പെടുത്തിക്കൊണ്ടുള്ള ഒരു ഷോർട്ട് ലിസ്റ്റ് ഇവർ പ്രസിദ്ധീകരിച്ചിട്ടുണ്ട്.ആറ് പേരാണ് ഈ നോമിനികളിൽ ഉൾപ്പെട്ടിട്ടുള്ളത്.

ഫുട്ബോളിൽ നിന്നും രണ്ട് താരങ്ങളാണ് ഇടം കണ്ടെത്തിയിട്ടുള്ളത്. ഖത്തർ വേൾഡ് കപ്പിൽ തകർപ്പൻ പ്രകടനം നടത്തിയ ലയണൽ മെസ്സിയും കിലിയൻ എംബപ്പേയുമാണ് ഈ താരങ്ങൾ.മോട്ടോർ റേസിംഗ് താരമായ മാക്സ് വേഴ്സ്റ്റപ്പെൻ,അത്ലറ്റിക്ക്സ് താരമായ ഡുപ്ലാന്റീസ്,ടെന്നീസ് ഇതിഹാസം റാഫേൽ നദാൽ,ബാസ്ക്കറ്റ്ബോൾ താരം സ്റ്റീഫൻ കുറേ എന്നിവരാണ് ഈ നോമിനി ലിസ്റ്റിൽ ഇടം നേടിയിട്ടുള്ളത്.

കഴിഞ്ഞവർഷം വേൾഡ് കപ്പ് ജേതാവായ ലയണൽ മെസ്സിക്ക് പലരും സാധ്യത കൽപ്പിക്കപ്പെടുന്നുണ്ട്.എന്തിനേറെ പറയുന്നു ഈ ലിസ്റ്റിൽ ഇടം നേടിയ ടെന്നീസ് ഇതിഹാസം റാഫേൽ നദാൽ തന്നെ ഇക്കാര്യം തുറന്നു സമ്മതിച്ചിട്ടുണ്ട്.ലയണൽ മെസ്സിയാണ് ഈ പുരസ്കാരം അർഹിക്കുന്നത് എന്നാണ് തന്റെ ഇൻസ്റ്റാഗ്രാം സ്റ്റോറിയിലൂടെ നദാൽ പറഞ്ഞിട്ടുള്ളത്.

‘ലോറസ് സ്പോർട്സ് മാൻ ഓഫ് ദി ഇയർ പുരസ്കാരത്തിന് വേണ്ടി ഒരിക്കൽ കൂടി നോമിനി ലിസ്റ്റിൽ ഇടം നേടിയതിൽ ഞാൻ ഒരുപാട് അഭിമാനിക്കുന്നു.ഇതൊരു ആദരം തന്നെയാണ്.പക്ഷേ ഇത്തവണ ലയണൽ മെസ്സി നേടട്ടെ.തീർച്ചയായും ഈ പുരസ്കാരം മെസ്സി അർഹിക്കുന്നു’ ഇതാണ് നദാൽ കുറിച്ചത്.

കഴിഞ്ഞ വർഷത്തെ ലോകത്തെ ഏറ്റവും മികച്ച കായിക താരമായി കൊണ്ട് ആരായിരിക്കും എന്നുള്ളത് ആരാധകർ ഉറ്റുനോക്കുന്ന കാര്യമാണ്.ഫുട്ബോൾ താരത്തിനുള്ള IFFHS അവാർഡ് മെസ്സി സ്വന്തമാക്കിയിരുന്നു.ഫിഫ ബെസ്റ്റും ബാലൺഡി’ഓർ പുരസ്കാരവും മെസ്സി തന്നെ കൈക്കലാക്കും എന്നാണ് പ്രതീക്ഷിക്കപ്പെടുന്നത്.മറ്റു പല മാഗസിനുകളുടെയും അവാർഡുകൾ മെസ്സിയെ തേടി എത്തിയിരുന്നു.