ജാഗ്രത വേണം, വളരെ ബുദ്ധിമുട്ടേറിയ ഗ്രൂപ്പിലാണ് ഉൾപ്പെട്ടിട്ടുള്ളത് : അർജന്റീനയെ കുറിച്ച് മെസ്സി

ഖത്തർ വേൾഡ് കപ്പിന് ഇനി കുറഞ്ഞ ദിവസങ്ങൾ മാത്രമാണ് അവശേഷിക്കുന്നത്. നവംബർ 20 ആം തീയതിയാണ് വേൾഡ് കപ്പിന് തുടക്കമാവുക. വലിയ കാത്തിരിപ്പിനായിരിക്കും അതോടെ വിരാമമാവുക. പ്രത്യേകിച്ച് അർജന്റീനയുടെ ആരാധകർ വലിയ പ്രതീക്ഷകളോടെ നോക്കിക്കാണുന്ന ഒരു വേൾഡ് കപ്പാണ് വരാൻ പോകുന്നത്.

വേൾഡ് കപ്പിന് ഗ്രൂപ്പ് സിയിലാണ് അർജന്റീന ഇടം നേടിയിട്ടുള്ളത്. അർജന്റീനയെ കൂടാതെ സൗദി അറേബ്യ,പോളണ്ട്,മെക്സിക്കോ എന്നിവരാണ് ഗ്രൂപ്പിൽ ഉൾപ്പെട്ടിട്ടുള്ളത്. നിലവിലെ ഫോം പരിഗണിക്കുമ്പോൾ അർജന്റീന അനായാസം അടുത്ത ഘട്ടത്തിലേക്ക് മുന്നേറും എന്നാണ് ഫുട്ബോൾ നിരീക്ഷകർ പങ്കുവെക്കുന്നത്.

എന്നാൽ ലയണൽ മെസ്സി ഒരിക്കലും തന്റെ എതിരാളികളെ വില കുറച്ചു കാണാൻ ഉദ്ദേശിക്കുന്നില്ല. ജാഗ്രത വേണമെന്നും വളരെ ബുദ്ധിമുട്ടേറിയ ഗ്രൂപ്പിലാണ് ഉൾപ്പെട്ടിരിക്കുന്നത് എന്നുമാണ് മെസ്സി പറഞ്ഞിട്ടുള്ളത്. കഴിഞ്ഞതവണത്തെ അനുഭവം അദ്ദേഹം ഉദാഹരണമായി ചൂണ്ടിക്കാണിക്കുകയും ചെയ്തു.സ്റ്റോയ്ച്ച്കോവുമായി മെസ്സി നടത്തിയ അഭിമുഖത്തിന്റെ പൂർണ്ണരൂപം Tyc യാണ് പബ്ലിഷ് ചെയ്തിട്ടുള്ളത്.

‘ വേൾഡ് കപ്പ് ഗ്രൂപ്പുകൾ എപ്പോഴും ബുദ്ധിമുട്ടുകൾ ഉള്ളതായിരിക്കും. 2018 ലെ വേൾഡ് കപ്പ് ഗ്രൂപ്പിനെ കുറിച്ച് പലരും പറഞ്ഞത് ഞങ്ങൾക്ക് വേഗത്തിൽ അടുത്ത ഘട്ടത്തിലേക്ക് പോകാൻ കഴിയുമെന്നായിരുന്നു. എന്നാൽ പ്രതീക്ഷിച്ച പോലെയല്ല സംഭവിച്ചത്.ആദ്യ മത്സരത്തിൽ ഞങ്ങൾക്ക് സമനില വഴങ്ങേണ്ടി വന്നു. പിന്നീട് ക്രൊയേഷ്യയോട് പരാജയപ്പെട്ടു. ഒടുവിൽ കഷ്ടിച്ചാണ് ഞങ്ങൾ പ്രീ ക്വാർട്ടറിലേക്ക് എത്തിയത്. അതാണ് യാഥാർത്ഥ്യം ‘ മെസ്സി തുടരുന്നു.

‘ വളരെ ബുദ്ധിമുട്ടേറിയ ഒരു ഗ്രൂപ്പിലാണ് ഇത്തവണയും ഞങ്ങൾ ഉൾപ്പെട്ടിരിക്കുന്നത്. അതുകൊണ്ടുതന്നെ ഞങ്ങൾ ജാഗ്രത പുലർത്തേണ്ടതുണ്ട്. ആദ്യ മത്സരത്തിൽ വിജയിച്ചു തുടങ്ങുക എന്നത് വളരെ പ്രധാനപ്പെട്ട കാര്യമാണ്. കാരണം മൂന്ന് പോയിന്റ്കൾ ലഭിച്ചുകഴിഞ്ഞാൽ അത് അടുത്ത മത്സരത്തിന് നിങ്ങൾക്ക് സമാധാനം നൽകുക തന്നെ ചെയ്യും. കടുത്ത എതിരാളികളായ മെക്സിക്കോയെയാണ് രണ്ടാം മത്സരത്തിൽ ഞങ്ങൾക്ക് നേരിടേണ്ടത്.അവർ എപ്പോഴും മികച്ച പ്രകടനം പുറത്തെടുക്കുന്നവരാണ്.ഒരുപാട് തവണ ഞങ്ങൾ വേൾഡ് കപ്പുകളിൽ തന്നെ ഏറ്റുമുട്ടിയവരുമാണ്. ഓരോ മത്സരത്തിലും പ്രത്യേകം പ്രത്യേകമാണ് സമീപിക്കുന്നത്. ഏറ്റവും മികച്ച രൂപത്തിൽ എത്തുക എന്നുള്ളതാണ് ഏറ്റവും പ്രധാനപ്പെട്ട കാര്യം ‘ മെസ്സി പൂർത്തിയാക്കി.

മികച്ച ഒരു നിരീക്ഷണമാണ് മെസ്സി പങ്കുവെച്ചിട്ടുള്ളത്. എതിരാളികളെ ഒരിക്കലും വിലകുറച്ച് കാണില്ല എന്ന് തന്നെയാണ് വ്യക്തമായി മെസ്സി പറഞ്ഞു വെക്കുന്നത്.