മെസിയാണ് ബാലൺ ഡി ഓർ നേടേണ്ടതെന്ന് ബെർണാഡോ സിൽവ, പിന്നാലെ റൊണാൾഡോ അൺഫോളോ ചെയ്‌തെന്ന് റിപ്പോർട്ടുകൾ

ലയണൽ മെസിയാണ് ഈ വർഷത്തെ ബാലൺ ഡി ഓർ നേടാൻ അർഹനെന്നു കരുതുന്നതായി മാഞ്ചസ്റ്റർ സിറ്റിയുടെ പോർച്ചുഗൽ താരമായ ബെർണാർഡോ സിൽവ. ഖത്തർ ലോകകപ്പിലെ വിജയത്തിന് ശേഷം ഫിഫ ബെസ്റ്റ്, ലോറിസ് അവാർഡ് എന്നിവ നേടിയ ലയണൽ മെസി ബാലൺ ഡി ഓർ നേടാനുള്ള സാധ്യത വളരെ കൂടുതലാണ്. ഈ സാഹചര്യത്തിലാണ് പോർച്ചുഗൽ താരവും അർജന്റീന നായകന് തന്റെ പിന്തുണ പ്രഖ്യാപിച്ചത്.

എർലിങ് ഹാലാൻഡ്, വിനീഷ്യസ് ജൂനിയർ എന്നിവർ ലയണൽ മെസിക്ക് വെല്ലുവിളി ഉയർത്തുന്ന സാഹചര്യത്തിൽ ബാലൺ ഡി ഓർ കമ്മിറ്റിയുടെ ഭാഗമായിരുന്നെങ്കിൽ ആരെയാകും തിരഞ്ഞെടുക്കുകയെന്ന ചോദ്യമാണ് സിൽവ നേരിട്ടത്. ലയണൽ മെസിയും ചാമ്പ്യൻസ് ലീഗ് വിജയം നേടുന്ന ക്ലബിലെ താരവും തമ്മിലായിരിക്കും ബാലൺ ഡി ഓറിൽ മത്സരമെന്നു പറഞ്ഞ സിൽവ നിലവിൽ താൻ മെസിക്കാണു തന്റെ വോട്ട് നൽകുകയെന്നും വ്യക്തമാക്കി.

ക്രിസ്റ്റ്യാനോ റൊണാൾഡോക്ക് ബാലൺ ഡി ഓറിനോടുള്ള ആഗ്രഹത്തെക്കുറിച്ചും സിൽവ പറയുകയുണ്ടായി. ദേശീയ ടീമിലായിരുന്ന സമയത്ത് റൊണാൾഡോ ബാലൺ ഡി ഓർ നേടിയതിനെ താൻ പല തവണ അഭിനന്ദിച്ചിട്ടുണ്ടെന്നും അതേസമയം മറ്റൊരാൾ പുരസ്‌കാരം നേടുന്നത് റൊണാൾഡോക്ക് താല്പര്യമില്ലെന്നുമാണ് സിൽവ പറയുന്നത്. താനാണ് പുരസ്‌കാരം കൂടുതൽ അർഹിച്ചിരുന്നതെന്ന് റൊണാൾഡോ പറയുമായിരുന്നുവെന്നും സിൽവ കൂട്ടിച്ചേർത്തു.

ഇതിനു പിന്നാലെ ബെർണാർഡോ സിൽവയെ റൊണാൾഡോ ഇൻസ്റ്റാഗ്രാമിൽ നിന്നും അൺഫോളോ ചെയ്‌തുവെന്ന റിപ്പോർട്ടുകളും പുറത്തു വരുന്നുണ്ട്. റൊണാൾഡോയുടെ ഇൻസ്റ്റഗ്രാം ഫോളോ ലിസ്റ്റിൽ പോർച്ചുഗൽ താരത്തിന്റെ പേരില്ല. എന്നാൽ റൊണാൾഡോ മുൻപ് തന്നെ സിൽവയെ ഫോളോ ചെയ്യാതിരുന്നതാണോ അതോ ഇപ്പോൾ അൺഫോളോ ചെയ്‌തതാണോ എന്ന കാര്യത്തിൽ വ്യക്തതയില്ല.