റൊണാൾഡോയ്ക്കൊപ്പം കളിക്കാനുള്ള അവസരം ഉപേക്ഷിച്ച് ബ്രൂണോ ഫെർണാണ്ടസ്

സൗദി ക്ലബ്ബുകൾ വമ്പൻ ഓഫറുകളുമായി യൂറോപ്യൻ താരങ്ങളെ സ്വന്തമാക്കുകയാണ്. കരീം ബെൻസീമ, ഹകീം സീയെച്. കൗളിബാലി, ബ്രോൺസോവിച്ച് തുടങ്ങിയ താരങ്ങളെ ഇതിനോടകം തന്നെ സൗദി ക്ലബ്ബുകൾ അവരുടെ ടീമുകളിലെത്തിച്ചിരുന്നു. സൗദി ക്ലബ്ബുകൾ മുന്നോട്ട് വെയ്ക്കുന്ന വമ്പൻ പ്രതിഫലമാണ് പലരെയും ആകർഷിക്കുന്നത്.

യൂറോപ്പിൽ നിന്നും ലഭിക്കുന്നതിനേക്കാൾ ഇരട്ടി പ്രതിഫലമാണ് സൗദി ക്ലബ്ബുകൾ വാഗ്ദാനം ചെയ്യുന്നത്. എന്നാൽ സൗദി ക്ലബ്ബുകളുടെ വമ്പൻ ഓഫറുകൾ സ്വീകരിക്കാത്ത ഒരുപാട് താരങ്ങളുമുണ്ട്. അർജന്റീനിയൻ താരം പൗലോ ഡിബാല, ഏയ്ഞ്ചൽ ഡി മരിയ എന്നിവരൊന്നും സൗദി ഓഫറുകൾ സ്വീകരിച്ചിരുന്നില്ല.ഇപ്പോഴിതാ പോർച്ചുഗീസ് സൂപ്പർ താരമായ ബ്രൂണോ ഫെർണാണ്ടസും സൗദി ഓഫറുകൾ നിരസിച്ചിരിക്കുകയാണ്.

താരത്തിനായി രണ്ട് സൗദി ക്ലബ്ബുകൾ രംഗത്ത് വന്നിരുന്നു. എന്നാൽ ഈ ക്ലബ്ബുകളുമായി ഒരു ചർച്ചയ്ക്കും നടത്താതെ ഭ്രൂണോ കരാർ ഓഫർ നിരസിക്കുകയായിരുന്നു. സഹ താരം ക്രിസ്റ്റ്യാനോ റൊണാൾഡോയ്ക്കൊപ്പം പന്ത് തട്ടാനുള്ള അവസരം ഉപേക്ഷിച്ചാണ് താരം യുണൈറ്റഡിൽ തുടരുന്നത്. ഹാരി മഗ്വയറേ യുണൈറ്റഡ് നായക സ്ഥാനത്ത് നിന്നും നീക്കിയതോടെ അടുത്ത യുണൈറ്റഡ് നായകനാവുമെന്ന് പ്രതീക്ഷിക്കുന്ന താരമാണ് ഭ്രൂണോ.

2020 ലാണ് പോർച്ചുഗീസ് ക്ലബായ സ്പോർട്ടിങ്ങിൽ നിന്നും താരം മാഞ്ചസ്റ്റർ യുണൈറ്റഡിൽ എത്തുന്നത്. അന്ന് പരിതാപകരമായ യുണൈറ്റഡിന് പുതുജീവൻ നൽകാൻ സഹായിച്ച താരങ്ങളിൽ ഒരാളാണ് ഭ്രൂണോ. യൂണൈറ്റഡിനായി ഇത് വരെ 124 മത്സരങ്ങൾ താരം കളിച്ചിട്ടുണ്ട്.