“മെസ്സി! മെസ്സി! മെസ്സി!” വിളികളിൽ പ്രകോപിതനായി അശ്ലീല ആംഗ്യം കാണിച്ച് റൊണാൾഡോ

സൗദി പ്രൊ ലീഗിൽ കഴിഞ്ഞ ദിവസം നടന്ന മത്സരത്തിൽ ക്രിസ്റ്റ്യാനോ റൊണാൾഡോയുടെ അൽ നാസർ അൽ ഹിലാലിനോട് 2-0 ത്തിന് പരാജയപ്പെട്ടിരുന്നു.അൽ ഹിലാലിനോട് തോൽവി വഴങ്ങിയതോടെ ഈ സീസണിൽ അൽ നസ്റിന്റെ കിരീടം നേടാനുള്ള സാധ്യതകൾ വളരെയധികം മങ്ങിയിട്ടുണ്ട്.അൽ ഹിലാലിനായി ഓഡിയോൺ ഇഗോളോയാണ് വിജയഗോളുകൾ നേടിയത്.

മുൻ മാഞ്ചസ്റ്റർ യുണൈറ്റഡ് താരമായ ഇഗോളോ മത്സരത്തിന്റെ നാൽപത്തി രണ്ടാം മിനുട്ടിലും അറുപത്തിരണ്ടാം മിനുട്ടിലുമാണ് ഗോളുകൾ നേടിയത്. ഇതോടെ ലീഗിലെ ടോപ് സ്‌കോറർ പട്ടികയിൽ ഒന്നാം സ്ഥാനത്തെത്താനും താരത്തിന് കഴിഞ്ഞു.മത്സരത്തിന്റെ തുടക്കം മുതൽ തന്നെ ആരാധകർ മെസി ചാന്റുകൾ സ്റ്റേഡിയത്തിൽ മുഴക്കിയിരുന്നു. തോൽവിക്കു പുറമെ ആരാധകരുടെ ഈ സമീപനം കൂടിയായപ്പോൾ ക്രിസ്റ്റ്യാനോ റൊണാൾഡോക്ക് കൂടുതൽ അരിശം വരികയും ചെയ്‌തു.

‘മെസ്സി! മെസ്സി! മെസ്സി!” വിളികൾ എതിർ ആരാധകരുടെ ഭാഗത്ത് നിന്നും കൂടിയതോടെ സോഷ്യൽ മീഡിയയിൽ വൈറലായ ഒരു വീഡിയോയിൽ 38 കാരനായ റൊണാൾഡോ തന്റെ ജനനേന്ദ്രിയത്തിൽ കൈ വയ്ക്കുകയും മുകളിലേക്ക് വലിക്കുകയും ചെയ്യുന്നത് കാണാം.റൊണാൾഡോയുടെ പെരുമാറ്റം ഡ്രസ്സിംഗ് റൂമിൽ അസ്വസ്ഥത ഉണ്ടാക്കിയെന്നും മുൻ മാനേജർ റൂഡി ഗാർസിയയുടെ വിടവാങ്ങലിന് കാരണമായെന്നും റിപ്പോർട്ടുകൾ സൂചിപ്പിക്കുന്നു.

കഴിഞ്ഞ ജനുവരിയിൽ അൽ നാസറിലേക്ക് മാറിയ പോർച്ചുഗൽ ഇന്റർനാഷണൽ തന്റെ ആദ്യ അഞ്ച് മത്സരങ്ങളിൽ എട്ട് ഗോളുകൾ നേടിയെങ്കിലും ആ വേഗത നിലനിർത്താൻ കഴിഞ്ഞില്ല.