ചാമ്പ്യൻസ് ലീഗ് കളിക്കാൻ വേണ്ടി ആസ്റ്റൻ വില്ല വിടാനൊരുങ്ങി എമിലിയാനോ മാർട്ടിനസ്|Emi Martínez

കഴിഞ്ഞ കോപ്പ അമേരിക്ക ടൂർണമെന്റിലും ഖത്തർ വേൾഡ് കപ്പിലും തകർപ്പൻ പ്രകടനം നടത്തിയ ഗോൾകീപ്പറാണ് എമിലിയാനോ മാർട്ടിനസ്.ഈ രണ്ട് ടൂർണമെന്റുകളിലെയും ഏറ്റവും മികച്ച ഗോൾകീപ്പർക്കുള്ള പുരസ്കാരം സ്വന്തമാക്കിയത് എമി മാർട്ടിനസ് തന്നെയായിരുന്നു.വളരെ ചുരുങ്ങിയ കാലയളവ് കൊണ്ട് നിരവധി നേട്ടങ്ങൾ എത്തിപ്പിടിക്കാൻ കഴിഞ്ഞിട്ടുള്ള ഗോൾകീപ്പർ ആണ് എമിലിയാനോ.

രാജ്യാന്തരതലത്തിൽ പല നേട്ടങ്ങൾ എത്തിപ്പിടിക്കുമ്പോഴും ക്ലബ്ബ് തലത്തിൽ എമി മാർട്ടിനസിന് ഒന്നും അവകാശപ്പെടാനില്ല.നിലവിൽ ഇംഗ്ലീഷ് പ്രീമിയർ ലീഗ് ക്ലബ്ബായ ആസ്റ്റൻ വില്ലയുടെ താരമാണ് എമിലിയാനോ മാർട്ടിനസ്.അവിടെ നല്ല സമയത്തിലൂടെ അല്ല ഈ അർജന്റീന താരം ഇപ്പോൾ കടന്നുപോയിക്കൊണ്ടിരിക്കുന്നത്.കഴിഞ്ഞ പ്രീമിയർ ലീഗ് മത്സരത്തിൽ അദ്ദേഹത്തിന്റെ പിഴവിൽ നിന്ന് രണ്ട് ഗോളുകളാണ് ആസ്റ്റൻ വില്ല വഴങ്ങിയത്.

അവസാനമായി വില്ല കളിച്ച മൂന്നു മത്സരങ്ങളിൽ നിന്ന് 11 ഗോളുകൾ ഈ അർജന്റീന ഗോൾകീപ്പർക്ക് വഴങ്ങേണ്ടി വന്നു.നിലവിൽ ഇംഗ്ലീഷ് പ്രീമിയർ ലീഗിൽ പതിനൊന്നാം സ്ഥാനത്താണ് വില്ല ഉള്ളത്.അതിനർത്ഥം അടുത്ത ചാമ്പ്യൻസ് ലീഗ് കളിക്കാൻ വില്ലക്ക് കഴിയില്ല എന്നുള്ളതാണ്.എമിലിയാനോ മാർട്ടിനസിന്റെ ആഗ്രഹം എന്നുള്ളത് ചാമ്പ്യൻസ് ലീഗ് കളിക്കുകയും കിരീടം നേടുകയും ചെയ്യുക എന്നുള്ളതാണ്.ഈ ആഗ്രഹം അദ്ദേഹം നേരിട്ട് തുറന്നുപറയുകയും ചെയ്തിരുന്നു.

ഇപ്പോഴിതാ എമിലിയാനോ മാർട്ടിനസുമായി ബന്ധപ്പെട്ട ഒരു റിപ്പോർട്ട് ഡെയിലി മെയിൽ എന്ന മാധ്യമം പുറത്തുവിട്ടു കഴിഞ്ഞു.അതായത് ചാമ്പ്യൻസ് ലീഗ് കളിക്കാൻ വേണ്ടി ഈ അർജന്റീന ഗോൾകീപ്പർക്ക് ആസ്റ്റൻ വില്ല വിടണം.ഇക്കാര്യം അദ്ദേഹം തന്റെ പ്രതിനിധികളിലൂടെ ക്ലബ്ബിനെ അറിയിച്ചിട്ടുണ്ട്.അടുത്ത സീസണിൽ ചാമ്പ്യൻസ് ലീഗ് കളിക്കുന്ന ഒരു പ്രധാനപ്പെട്ട ക്ലബ്ബിലേക്ക് പോകാനാണ് അദ്ദേഹം ആഗ്രഹിക്കുന്നത്.

ആസ്റ്റൻ വില്ല താരത്തെ പിടിച്ചുനിർത്താൻ സാധ്യത കുറവാണ്.ആരാധകരുടെ പ്രിയപ്പെട്ട താരമാണെങ്കിലും ഫണ്ട് ഉയർത്താൻ വേണ്ടി ഒരുപക്ഷേ ഈ ഗോൾ കീപ്പറെ കൈവിടാൻ വില്ല തയ്യാറായേക്കും.പക്ഷേ നല്ല ഒരു തുക തന്നെ താരത്തിന് വേണ്ടി ആസ്റ്റൻ വില്ല ആവശ്യപ്പെടാൻ സാധ്യതയുണ്ട്.അർജന്റീന ഗോൾകീപ്പർക്ക് വേണ്ടി ഏത് പ്രധാനപ്പെട്ട ക്ലബ്ബുകളാണ് മുന്നോട്ടു വരിക എന്നുള്ളത് അറിയണം.