അർജന്റീന സൂപ്പർ താരം ചെൽസിയിൽ ചേരണമെന്ന് എൻസോ ഫെർണാണ്ടസ് |Enzo Fernandez

അർജന്റീനയുടെ വേൾഡ് കപ്പ്‌ ജേതാവായ സൂപ്പർ താരം പൌലോ ഡിബാലയെ ടീമിലെത്തിക്കാൻ ഇംഗ്ലീഷ് പ്രീമിയർ ലീഗ് ക്ലബ്ബായ ചെൽസി ശ്രമങ്ങൾ നടത്തുന്നുണ്ടെന്ന് വാർത്തകൾ കഴിഞ്ഞ ദിവസങ്ങളിൽ പുറത്ത് വന്നിരുന്നു. പുതിയ പരിശീലകനായി മൗറിസിയോ പോചെറ്റിനോ വന്നതിന് പിന്നാലെ ചെൽസി ഡിബാലയെ സ്വന്തമാക്കാൻ അടുത്ത് എന്ന റിപോർട്ടുകൾ ഉണ്ടായിരുന്നു.

അതിനിടയിൽ ഡിബാല ചെൽസിയിൽ തനിക്കൊപ്പം ചേരണമെന്ന് എൻസോ ഫെർണാണ്ടസ് അഭിപ്രായപ്പെട്ടു. ഡിബാലയോട് ഇതിനെക്കുറിച്ച് സംസാരിച്ചുവെന്നും എന്നാൽ ബ്ലൂസ് നീക്കം നടത്തുമോ എന്ന് അറിയില്ലെന്നും മിഡ്ഫീൽഡർ പറഞ്ഞു.താൻ കിംവദന്തികളെക്കുറിച്ച് വായിച്ചിട്ടുണ്ടെന്നും അതിനെക്കുറിച്ച് എഎസ് റോമ താരത്തോട് സംസാരിച്ചതായും എൻസോ പറഞ്ഞു.ഫിഫ ലോകകപ്പ് ജേതാവ് ചെൽസിയിൽ തന്നോടൊപ്പം ചേരണമെന്ന് ആഗ്രഹിക്കുന്നതായും അദ്ദേഹം പറഞ്ഞു.

“ഡിബാല വരുമെന്ന് ഞാൻ ശരിക്കും പ്രതീക്ഷിക്കുന്നു.ഞാൻ അദ്ദേഹത്തോട് സംസാരിച്ചു “എൻസോ പറഞ്ഞു.ഡിബാല സ്റ്റാംഫോർഡ് ബ്രിഡ്ജിലേക്ക് വരാൻ ആഗ്രഹിക്കുന്ന ആദ്യത്തെ കളിക്കാരനല്ല എൻസോ. കഴിഞ്ഞ ആഴ്ച തിയാഗോ സിൽവ അതിനെക്കുറിച്ച് സ്കൈ സ്പോർട്സിനോട് സംസാരിച്ചു.പൌലോ ഡിബാല ചെൽസിയിൽ വരണമെന്ന് തന്നെയാണ് താൻ ആഗ്രഹിക്കുന്നതെന്നും എന്താണ് സംഭവിക്കാൻ പോകുന്നതെന്ന് കാത്തിരുന്നു കാണമെന്നായിരുന്നു സിൽവയുടെ മറുപടി.

“പൌലോ ഡിബാലയെ ഞാൻ ഇവിടെ കണ്ടിരുന്നു, അവൻ ചെൽസിയിൽ എത്തുമെന്ന് ഞാൻ പ്രതീക്ഷിക്കുന്നു. ഞാൻ ഡിബാലയുമായി സംസാരിച്ചിരുന്നു, ചെൽസിയിൽ വരുന്നുണ്ടോ എന്നെല്ലാം ചോദിച്ചിരുന്നു. പൌലോ ഡിബാല ഒരു വേൾഡ് ക്ലാസ്സ്‌ താരമാണ്. ഡിബാലക്കൊപ്പം കളിക്കാൻ കഴിയുന്നതിൽ എനിക്ക് സന്തോഷം മാത്രമേയുള്ളൂ. ഡിബാല വരികയാണെങ്കിൽ അതൊരു ഗംഭീര സൈനിങായിരിക്കും. എന്താണ് സംഭവിക്കുന്നത് എന്ന് നമുക്ക് നോക്കികാണാം.” – തിയാഗോ സിൽവ പറഞ്ഞു.