കഴിഞ്ഞ വർഷത്തെ മികച്ച ഫുട്ബോൾ താരത്തിനുള്ള ഫിഫ ബെസ്റ്റ് അവാർഡും ലയണൽ മെസ്സി നേടിയതോടെ, ഫിഫ ബെസ്റ്റ് അവാർഡ് 7 തവണ നേടുന്ന ആദ്യ കളിക്കാരനായി മെസ്സി മാറി. 2022 ഫിഫ ലോകകപ്പ് ടൂർണമെന്റിലെ അസാധാരണ പ്രകടനം പരിഗണിച്ചാണ് ലയണൽ മെസ്സിക്ക് ഫിഫ ബെസ്റ്റ് അവാർഡ് ലഭിച്ചത്. ഈ അവാർഡിനുള്ള നാമനിർദ്ദേശ പട്ടികയിൽ കൈലിയൻ എംബാപ്പെയും കരീം ബെൻസെമയും തൊട്ടുപിന്നിലാണ്.
എന്നാൽ റയൽ മാഡ്രിഡ് താരങ്ങളിൽ പലരും ഇതിനെതിരെ രംഗത്തെത്തിയിരുന്നു. റയൽ മാഡ്രിഡ് സ്‌ട്രൈക്കർ കരിം ബെൻസെമ തന്റെ ഇൻസ്റ്റാഗ്രാം സ്റ്റോറിയിലൂടെ ഇതിനെതിരെ പ്രതിഷേധം പ്രകടിപ്പിച്ചു. ഫിഫ ബെസ്റ്റ് അവാർഡിന് പരിഗണിക്കുന്ന കാലയളവിൽ താൻ നേടിയ എല്ലാ നേട്ടങ്ങളും എണ്ണിത്തിട്ടപ്പെടുത്തിയാണ് ബെൻസെമ തന്റെ ഇൻസ്റ്റാഗ്രാം സ്റ്റോറി പങ്കുവെച്ചത്. ഫിഫയുടെ മികച്ച അവാർഡ് മെസ്സിക്ക് ലഭിക്കുന്നത് ബെൻസെമയ്ക്ക് ഇഷ്ടപ്പെട്ടില്ലെന്ന് വ്യക്തമായിരുന്നു.
കൂടാതെ സോഷ്യൽ മീഡിയയിൽ പലതരത്തിലുള്ള പ്രതിഷേധങ്ങളും ഉയർന്നിരുന്നു. എന്നാൽ വിമർശകർക്ക് വളരെ ലളിതവും പ്രതീകാത്മകവുമായ മറുപടിയാണ് ലയണൽ മെസ്സി നൽകിയതെന്നാണ് ആരാധകരുടെ കണ്ടെത്തൽ. അതായത്, ഫിഫ ലോകകപ്പിനൊപ്പം നിൽക്കുന്ന രണ്ട് ചിത്രങ്ങൾ മെസ്സി തന്റെ ഇൻസ്റ്റാഗ്രാം സ്റ്റോറിയിൽ അടുത്തിടെ പങ്കിട്ടു. ഫിഫയുടെ മികച്ച അവാർഡ് മെസ്സിക്ക് നൽകിയതിൽ പ്രതിഷേധിച്ചവർക്കുള്ള മറുപടിയായാണ് പലരും ഇതിനെ വ്യാഖ്യാനിക്കുന്നത്.
Messi told Benzema to go to sleep 😭 pic.twitter.com/mt9dCUcPov
— MC (@CrewsMat10) March 1, 2023
2023 ലെ ഫിഫ ദി ബെസ്റ്റ് അവാർഡ് അർജന്റീനയ്ക്ക് കനത്ത ആധിപത്യമായിരുന്നു. മികച്ച കളിക്കാരനുള്ള പുരസ്‌കാരം ലയണൽ മെസ്സിയും മികച്ച പരിശീലകനുള്ള പുരസ്‌കാരം ലയണൽ സ്‌കലോനിയും മികച്ച ഗോൾകീപ്പറായി എമിലിയാനോ മാർട്ടിനെസും അർഹരായി. മികച്ച ആരാധകർക്കുള്ള അവാർഡും അർജന്റീന ആരാധകർക്ക് ലഭിച്ചു.