ഞാൻ അന്നേ പറഞ്ഞതാണ്, ഇപ്പോൾ അത് യാഥാർഥ്യമായെന്ന് ക്രിസ്റ്റ്യാനോ റൊണാൾഡോ |Cristiano Ronaldo

അഞ്ച് തവണ ബാലൻ ഡി ഓർ ജേതാവായ ലോകഫുട്ബോളിലെ പോർച്ചുഗീസ് സൂപ്പർ താരം ക്രിസ്റ്റ്യാനോ റൊണാൾഡോയുടെ വരവോടെ കൂടി ലോകശ്രദ്ധ നേടിയ സൗദി ലീഗിലേക്ക് യൂറോപ്പിൽ നിന്നുള്ള വമ്പൻ ക്ലബ്ബുകളുടെ സൂപ്പർ താരങ്ങളുടെ വൻതോതിലുള്ള ഒഴുക്കാണ് നമ്മൾ കണ്ടുകൊണ്ടിരിക്കുന്നത്.

കരീം ബെൻസെമയും എൻഗോളോ കാന്റെയും ഉൾപ്പടെ വമ്പൻ താരനിരയെയാണ് സൗദി ക്ലബ്ബുകൾ മത്സരിച്ചു സ്വന്തമാക്കുന്നത്. നേരത്തെ സൗദി അറേബ്യയിലെത്തിയ ക്രിസ്റ്റ്യാനോ റൊണാൾഡോ ഈ ലീഗ് ഇനിയും കൂടുതൽ വളരുമെന്നും ലോകത്തിലെ മികച്ച ലീഗുകളിൽ ഒന്നായി മാറുമെന്നും പറഞ്ഞിരുന്നു.

താൻമുൻപ് പറഞ്ഞ വാക്കുകൾ അക്ഷരംപ്രതി ഇപ്പോൾ ഫലിക്കുനുണ്ടെന്നാണ് ക്രിസ്റ്റ്യാനോ റൊണാൾഡോ കഴിഞ്ഞ ദിവസം പറഞ്ഞത്. നിലവിൽ പോർച്ചുഗലിൽ അൽ നസ്ർ ടീനിനോടൊപ്പം പ്രീസീസൺ പരിശീലനം നടത്തുന്ന ക്രിസ്റ്റ്യാനോ റൊണാൾഡോ വരുന്ന സൗദി ഫുട്ബോൾ സീസണിൽ കിരീടങ്ങൾ ലക്ഷ്യമിടുന്നു.

“ആറുമാസം മുമ്പ് ഞാൻ പറഞ്ഞ കാര്യമാണ് ഇപ്പോൾ സംഭവിക്കുന്നത്. ലീഗിൽ എത്തിയ മികച്ച കളിക്കാരുടെ എണ്ണം കൊണ്ട് ലീഗ് കൂടുതൽ വളരുകയാണ്. സൗദി ലീഗ് ഇനിയും വളരും, മാത്രവുമല്ല കൂടുതൽ രസകരമായ ഒരു ലീഗയി ഇത് മാറും. ഒരു നല്ല കുതിപ്പ് നേടുന്നതിന് ഏറ്റവും മികച്ച രീതിയിൽ നാം സ്വയം തയ്യാറെടുക്കണം.” ക്രിസ്റ്റ്യാനോ റൊണാൾഡോ പറഞ്ഞു.

യൂറോപ്പിൽ നിന്നുള്ള സൂപ്പർ താരങ്ങളുടെ കൂടുമാറ്റങ്ങൾ സൗദി ലീഗിലേക്ക് വന്നതോടെ ലീഗിന്റെ നിലവാരവും ഉയരുകയാണ്. ഈ ട്രാൻസ്ഫർ വിൻഡോയിൽ നിരവധി താരങ്ങൾ എത്തിയതിനാൽ വരും വർഷങ്ങളിലും സീസണിലും ലോകഫുട്ബോളിലെ മികച്ച താരങ്ങളെ വമ്പൻ ഓഫറുകൾ നൽകി കൊണ്ടുവരാൻ സൗദി ക്ലബ്ബുകൾ ശ്രമിക്കും.