ചാമ്പ്യൻസ് ലീഗിൽ തകർപ്പൻ പ്രകടനം നടത്തിയ ശേഷം സിമിയോണി; ❝ഞാൻ ശ്രമിക്കുന്നത് അർജന്റീന സ്റ്റാഫിന് മുൻപിൽ അർഹത തെളിയിക്കാൻ❞

ഇന്നലെ യുവേഫ ചാമ്പ്യൻസ് ലീഗിൽ നടന്ന മത്സരത്തിൽ മികച്ച വിജയം നേടാൻ ഇറ്റാലിയൻ ക്ലബ്ബായ നാപ്പോളിക്ക് സാധിച്ചിരുന്നു. എതിരില്ലാത്ത മൂന്ന് ഗോളുകൾക്കാണ് നാപോളി റേഞ്ചേഴ്സിനെ പരാജയപ്പെടുത്തിയത്.അർജന്റൈൻ സൂപ്പർ താരം ജിയോവാനി സിമയോണിയാണ് മത്സരത്തിൽ തിളങ്ങിയത്.

രണ്ട് ഗോളുകളാണ് ഈ താരം നേടിയിട്ടുള്ളത്. മാത്രമല്ല മത്സരത്തിലെ മാൻ ഓഫ് ദി മാച്ച് പുരസ്കാരം സിമയോണി സ്വന്തമാക്കുകയും ചെയ്തു.ഈ സീസണിൽ സിരി എയിൽ അവസരങ്ങൾ കുറവാണെങ്കിലും കിട്ടുന്ന അവസരങ്ങൾ കൃത്യമായി മുതലെടുക്കാൻ സിമയോണിക്ക് സാധിക്കാറുണ്ട്.

അതേസമയം പലപ്പോഴും മുന്നേറ്റ നിരയിലെ താരബാഹുല്യം കാരണം സിമയോണിക്ക് അർജന്റീനയുടെ ദേശീയ ടീമിൽ ഇടം ലഭിക്കാറില്ല. അതിനുവേണ്ടിയുള്ള പരിശ്രമത്തിലാണ് നിലവിൽ ഡിയഗോ സിമയോണിയുടെ മകനുള്ളത്. ഇതേക്കുറിച്ച് ജിയോവാനി സിമയോണി കുറച്ചു കാര്യങ്ങൾ പറഞ്ഞിട്ടുണ്ട്.

‘ എനിക്ക് അർജന്റീനയുടെ ദേശീയ ടീമിൽ ഇടം നേടണം.അതിന് ഞാൻ അതിയായി ആഗ്രഹിക്കുന്നുണ്ട് എന്നുള്ളതാണ് ഞാൻ ഇപ്പോൾ അർജന്റീനയുടെ കോച്ചിംഗ് സ്റ്റാഫിനു മുന്നിൽ തെളിയിക്കാൻ ശ്രമിക്കുന്നത്. എനിക്ക് അർജന്റീനയുടെ ദേശീയ ടീമിനെ സഹായിക്കാൻ കഴിയും എന്നാണ് ഞാൻ കരുതുന്നത്.എന്റെ ഭാഗം എനിക്ക് ചെയ്തുതീർക്കാൻ സാധിക്കും ‘ ഇതാണ് സിമയോണി പറഞ്ഞിട്ടുള്ളത്.

അതേസമയം അർജന്റീനയുടെ ദേശീയ ടീമിൽ ഉടനെ സ്ഥാനം ലഭിക്കുക എന്നുള്ളത് സിമയോണിയെ സംബന്ധിച്ചിടത്തോളം എളുപ്പമാവില്ല. എന്തെന്നാൽ ആക്രമണനിരയിൽ ഒരുപാട് സൂപ്പർതാരങ്ങൾ ഇപ്പോൾ തന്നെ അർജന്റീനക്ക് ലഭ്യമാണ്.