ഞാൻ എന്റെ ജീവിതത്തിൽ കണ്ടിട്ടുള്ള ഏറ്റവും മികച്ച താരം ലയണൽ മെസ്സിയാണ് : വിശദീകരിച്ച് ഇനിയേസ്റ്റ

ലയണൽ മെസ്സിക്കൊപ്പം ഒരുപാട് കാലം എഫ്സി ബാഴ്സലോണയിൽ കളിച്ചിട്ടുള്ള ഇതിഹാസമാണ് ആന്ദ്രസ് ഇനിയേസ്റ്റ. നിരവധി കിരീടനേട്ടങ്ങൾ ബാഴ്സയിൽ ഈ രണ്ടു താരങ്ങളും സ്വന്തമാക്കിയിട്ടുണ്ട്. ബാഴ്സയുടെ സുവർണ്ണ കാലത്തെ നേട്ടങ്ങളിൽ വലിയ പങ്ക് വഹിച്ചിട്ടുള്ള താരങ്ങളാണ് ഇവർ.

പിന്നീട് 2018ലായിരുന്നു ഇനിയെസ്റ്റ ബാഴ്സ വിട്ടുകൊണ്ട് ജാപനീസ് ക്ലബ്ബായ വിസൽ കോബേയിലേക്ക് ചേക്കേറിയത്. ലയണൽ മെസ്സിയും 2021ൽ ബാഴ്സയോട് വിട പറഞ്ഞു. നിലവിൽ മെസ്സി ഫ്രഞ്ച് ക്ലബ്ബായ പിഎസ്ജിക്ക് വേണ്ടിയാണ് കളിച്ചുകൊണ്ടിരിക്കുന്നത്.

തന്റെ മുൻ സഹതാരമായ മെസ്സിയെക്കുറിച്ച് ചില കാര്യങ്ങൾ ഇനിയേസ്റ്റ പറഞ്ഞിട്ടുണ്ട്. അതായത് താൻ ജീവിതത്തിൽ കണ്ടിട്ടുള്ള ഏറ്റവും മികച്ച താരം ലയണൽ മെസ്സിയാണെന്നും മെസ്സിയെ പോലെ ഒരു വ്യക്തി ഈ ഭൂമിലോകത്ത് ഇല്ല എന്നുമാണ് ഇനിയേസ്റ്റ പറഞ്ഞിട്ടുള്ളത്.

‘ ഞാൻ ഇതുവരെ കണ്ടിട്ടുള്ള ഏറ്റവും മികച്ച താരം,അത് ലയണൽ മെസ്സിയാണ്.അദ്ദേഹത്തെപ്പോലെ ഒരു താരത്തെ ഞാൻ പിന്നീട് കണ്ടിട്ടില്ല.അത് മത്സരങ്ങളുടെ കാര്യത്തിൽ മാത്രമല്ല,മറിച്ച് പരിശീലനങ്ങളിൽ പോലും അത്ഭുതകരമായ കാര്യങ്ങൾ അദ്ദേഹം പ്രവർത്തിക്കുമായിരുന്നു.എന്നെ സംബന്ധിച്ചിടത്തോളം ലോകത്തിലെ നമ്പർവൺ താരം മെസ്സിയാണ്. അദ്ദേഹത്തെപ്പോലെ ആരുമില്ല ‘ ഇനിയേസ്റ്റ പറഞ്ഞു.

ഫുട്ബോൾ ചരിത്രത്തിലെ തന്നെ എക്കാലത്തെയും മികച്ച താരമായി ലയണൽ മെസ്സിയെ വാഴ്ത്തുന്നവർ ഒട്ടേറെ പേരാണ്. എന്നാൽ ഇതേക്കുറിച്ച് മെസ്സിയോട് ചോദിച്ചപ്പോൾ വളരെ മനോഹരമായ മറുപടിയാണ് അദ്ദേഹം നൽകിയത്. ഫുട്ബോൾ ചരിത്രത്തിലെ മികച്ച താരങ്ങളിൽ ഉൾപ്പെടാൻ വേണ്ടി താൻ പ്രവർത്തിച്ചിട്ടില്ലെന്നും നല്ലൊരു വ്യക്തിയായി അറിയപ്പെടാനാണ് താൻ പ്രവർത്തിക്കുന്നത് എന്നുമാണ് മെസ്സി പറഞ്ഞിട്ടുള്ളത്.