‘കലിംഗ സൂപ്പർ കപ്പ് 2024’:കേരള ബ്ലാസ്റ്റേഴ്‌സ് ഗ്രൂപ് ബിയിൽ ,ഈസ്റ്റ് ബംഗാളും മോഹൻ ബഗാനും ഒരു ഗ്രൂപ്പിൽ | KALINGA SUPER CUP 2024

കലിംഗ സൂപ്പർ കപ്പ് 2024 ന്റെ ഗ്രൂപ്പ് ഘട്ടത്തിനായുള്ള നറുക്കെടുപ്പ് ഇന്ന് ന്യൂഡൽഹിയിലെ ഓൾ ഇന്ത്യ ഫുട്ബോൾ ഫെഡറേഷന്റെ (എഐഎഫ്എഫ്) ഫുട്ബോൾ ഹൗസിൽ നടന്നു. കലിംഗ സൂപ്പർ കപ്പ് 2024 ജനുവരി 9 മുതൽ 2024 ജനുവരി 28 വരെ ഒഡീഷയിൽ നടക്കുമെന്ന് നവംബറിൽ എഐഎഫ്എഫ് പ്രഖ്യാപിച്ചിരുന്നു.

ടൂർണമെന്റിൽ 16 ടീമുകളെ (ഇന്ത്യൻ സൂപ്പർ ലീഗിൽ നിന്ന് 12, ഐ-ലീഗിൽ നിന്ന് നാല്) നാല് ടീമുകൾ വീതമുള്ള നാല് ഗ്രൂപ്പുകളായി തിരിച്ചു. ഐ ലീഗ് ക്ലബ്ബുകൾ പ്ലെ ഓഫിലൂടെയാണ് ഗ്രൂപ്പ് ഘട്ടത്തിലേക്ക് എത്തുന്നത്.ടൂർണമെന്റ് സൂപ്പർ കപ്പ് 2023 ന് സമാനമായ ഒരു ഫോർമാറ്റ് പാലിക്കും, അവിടെ ഓരോ ഗ്രൂപ്പിൽ നിന്നും ഒന്നാം സ്ഥാനത്തുള്ള ടീം സെമി ഫൈനലിലേക്ക് മുന്നേറും.

ജനുവരി 28-ന് നടക്കുന്ന ഫൈനലിലെ വിജയിക്ക് 2024-25 AFC ചാമ്പ്യൻസ് ലീഗ് 2-ലേക്കുള്ള ടിക്കറ്റും ലഭിക്കും.കൊൽക്കത്ത വമ്പൻമാരായ ഈസ്റ്റ് ബംഗാൾ എഫ്‌സിയെയും മോഹൻ ബഗാൻ സൂപ്പർ ജയന്റിനെയും ഗ്രൂപ്പ് എയിലാണ് സ്ഥാനം പിടിച്ചത്.ഈ ഗ്രൂപ്പിൽ അവരോടൊപ്പം ചേരുന്നത് ഹൈദരാബാദ് എഫ്‌സിയും ഐ-ലീഗ് 1 ഉം ആണ്.കേരള ബ്ലാസ്റ്റേഴ്‌സ് എഫ്‌സി, നോർത്ത് ഈസ്റ്റ് യുണൈറ്റഡ് എഫ്‌സി, ജംഷഡ്പൂർ എഫ്‌സി എന്നിവർ ഗ്രൂപ്പ് ബിയിൽ മത്സരിക്കും.

ഗ്രൂപ്പ് സിയിൽ മുംബൈ സിറ്റി എഫ്‌സി, ചെന്നൈയിൻ എഫ്‌സി, പഞ്ചാബ് എഫ്‌സി, ഐ-ലീഗ് 3 എന്നിവ ഉൾപ്പെടുന്നു. അവസാന ഗ്രൂപ്പായ ഗ്രൂപ്പ് ഡി നിലവിലെ ചാമ്പ്യന്മാരായ ഒഡീഷ എഫ്‌സി, മുൻ ചാമ്പ്യൻമാരായ ബെംഗളൂരു എഫ്‌സി, എഫ്‌സി ഗോവ ഐ-ലീഗ് 4 എന്നിവരും മത്സരിക്കും.