മെസ്സിയെക്കാൾ മികച്ചവൻ എംബപ്പേയെന്ന്,അവരങ്ങനെ പറഞ്ഞു നടക്കട്ടെ : പരിഹസിച്ച് അർജന്റൈൻ ഡിഫൻഡർ

ലയണൽ മെസ്സിയും പിഎസ്ജി ആരാധകരും തമ്മിലുള്ള ബന്ധം നല്ല രീതിയിൽ അല്ല ഇപ്പോൾ മുന്നോട്ടു പോകുന്നത്.പിഎസ്ജി ആരാധകർ പലപ്പോഴും ലയണൽ മെസ്സിയെ മാത്രമായി വേട്ടയാടുന്ന ഒരു കാഴ്ച്ചയാണ് നമുക്കിപ്പോൾ കാണാൻ കഴിയുന്നത്.പ്രത്യേകിച്ച് കഴിഞ്ഞ മത്സരങ്ങളിലൊക്കെ മികച്ച പ്രകടനം നടത്തിയിട്ടും അതിന് വലിയ മാറ്റമുണ്ടായിരുന്നില്ല.

എന്നാൽ എംബപ്പേയുടെ കാര്യത്തിൽ ഇങ്ങനെയായിരുന്നില്ല.അവസാനമായി ക്ലബ്ബിനുവേണ്ടി കളിച്ച മൂന്നു മത്സരങ്ങളിൽ നിന്ന് ഗോളുകളോ അസിസ്റ്റുകളോ നേടാൻ അദ്ദേഹത്തിന് കഴിഞ്ഞിട്ടില്ല.പക്ഷേ പിഎസ്ജി ആരാധകരെ സംബന്ധിച്ചിടത്തോളം അതൊരു വിഷയമല്ല.ലയണൽ മെസ്സിക്ക് നൽകുന്നതിനേക്കാൾ ബഹുമാനവും പിന്തുണയും അവർ എംബപ്പേക്ക് നൽകുന്നുണ്ട്.മാത്രമല്ല മെസ്സിയെക്കാൾ മികച്ചവൻ എംബപ്പേയാണ് എന്ന അഭിപ്രായക്കാരും ഇക്കൂട്ടത്തിൽ ഉണ്ട്.

ഇത്തരത്തിലുള്ള ഫ്രഞ്ച് ആരാധകർക്കെതിരെ അർജന്റൈൻ ഡിഫൻഡറായ ഫകുണ്ടോ മെഡിന പരിഹാസവുമായി രംഗത്ത് വന്നിട്ടുണ്ട്.മെസ്സിയേക്കാൾ മികച്ച താരമാണ് എംബപ്പേ എന്ന് പറയുന്നവർക്ക് ഫുട്ബോളിനെ കുറിച്ച് ഒന്നും അറിയില്ല എന്നാണ് മെഡിന പറഞ്ഞിട്ടുള്ളത്.അവരങ്ങനെ പറഞ്ഞു നടക്കട്ടെയെന്നും മെഡിന കൂട്ടിച്ചേർത്തിട്ടുണ്ട്.

ലയണൽ മെസ്സിയെക്കാൾ മികച്ച താരം കിലിയൻ എംബപ്പേയാണ് എന്നുള്ളത് ചില ഫ്രഞ്ച് ആരാധകർ ഇവിടെ പറഞ്ഞു നടക്കുന്നുണ്ട്.തീർച്ചയായും അത് എന്നെ അസ്വസ്ഥപ്പെടുത്തുന്നുണ്ട്.പക്ഷേ അവർ ഫുട്ബോളിനെ കുറിച്ച് ഒരു ചുക്കും അറിയാത്തവരാണ്.അതുകൊണ്ട് അവർ അങ്ങനെ പറഞ്ഞു നടക്കട്ടെ ‘ഇതാണ് മെഡിന വ്യക്തമാക്കിയിട്ടുള്ളത്.

ഫ്രഞ്ച് ക്ലബ്ബായ ലെൻസിന് വേണ്ടിയാണ് ഇപ്പോൾ അർജന്റീനക്കാരനായ ഈ ഡിഫൻഡർ കളിക്കുന്നത്.അടുത്ത മത്സരത്തിൽ പിഎസ്ജിയും ലെൻസും തമ്മിലാണ് ഏറ്റുമുട്ടുക.എംബപ്പേയെയും ലയണൽ മെസ്സിയെയും തടയേണ്ട ഉത്തരവാദിത്വം ഈ മിന്നും ഫോമിൽ കളിക്കുന്ന അർജന്റീന താരത്തിനാണ്.