കണ്ണിന് കുളിർമയേകുന്ന മനോഹര ഗോളുമായി ഇന്റർ മയാമിയെ മുന്നിലെത്തിച്ച് ലയണൽ മെസ്സി |Lionel Messi

അമേരിക്കയിൽ ലയണൽ മെസ്സി ആഞ്ഞടിക്കുകയാണ്. തുടർച്ചയായ ഏഴാം മത്സരത്തിലും ഗോൾ നേടി സൂപ്പർ താരം തന്റെ സ്വപ്ന കുതിപ്പ് തുടരുകയാണ്.ലീഗ് കപ്പ് ഫൈനലിൽ നാഷ്‌വില്ലെ എസ്‌സിക്കെതിരെ ഇന്റർ മിയാമിക്ക് നേരത്തെ ലീഡ് നേടിക്കൊടുത്ത അർജന്റീനിയൻ ഒരു സെൻസേഷണൽ ഗോൾ നേടി.

24-ാം മിനിറ്റിൽ സഹതാരം റോബർട്ട് ടെയ്‌ലറുടെ പാസ് മെസ്സിയുടെ കാൽക്കൽ എത്തി. നാഷ്‌വില്ലെ ഡിഫൻഡർ വാക്കർ സിമ്മർമാനെ ഡ്രിബിൾ ചെയ്ത മെസ്സി പെനാൽറ്റി ബോക്‌സിന് തൊട്ടുപുറത്ത് നിന്ന് ഒരു ബെൻഡിംഗ് ഷോട്ടിലൂടെ ഗോൾകീപ്പർ എലിയട്ട് പാനിക്കോയ്ക്ക് ഒരു അവസരം പോലും നൽകാതെ വലയിലെത്തിച്ചു.ഇന്റർ മയാമിക്കായുള്ള മെസ്സിയുടെ പത്താം ഗോളായിരുന്നു ഇത്.

ഈ ഗോളോടെ ഇന്റർ മായാമിയുടെ ഈ സീസണിലെ ടോപ് സ്കോററായി ലയണൽ മെസ്സി മാറിയിരിക്കുകയാണ്.കഴിഞ്ഞ വർഷം അർജന്റീനയെ ലോകകപ്പ് കിരീടത്തിലേക്ക് നയിച്ച ഏഴ് തവണ ബാലൺ ഡി ഓർ ജേതാവ് ഗോൾ നേടിയപ്പോൾ സ്റ്റേഡിയം ഇളകിമറിയുന്ന കാഴ്ചയാണ് കാണാൻ സാധിച്ചത്.