ലയണൽ മെസ്സിയെ വട്ടം കറക്കിയ സ്‌പെയിൻ താരം അർജന്റീന ടീമിലേക്ക്

2020ൽ ലയണൽ മെസ്സിയുടെ പ്രശംസ ഏറ്റുവാങ്ങിയ സ്പാനിഷ് താരം അർജന്റീന ടീമിലേക്ക്.2020-ൽ നിലവിൽ കളിക്കുന്ന താരങ്ങളിൽ തനിക്ക് ഏറ്റവും പ്രയാസം തോന്നിയ പ്രതിരോധകാരനെ ചോദിച്ചപ്പോഴായിരുന്നു ലയണൽ മെസ്സി ഈ സ്പാനിഷ് താരത്തിന്റെ പേര് പറഞ്ഞത്. അന്ന് മെസ്സി ബാഴ്സലോണയ്ക്ക് വേണ്ടി കളിക്കുമ്പോൾ ജിറോണ താരമായിരുന്നു പാബ്ലോ.

26 കാരനായ പാബ്ലോ മാഫിയോ ബാഴ്‌സലോണയിലാണ് ജനിച്ചതെങ്കിലും അമ്മ അർജന്റീന സ്വദേശിനിയാണ്.  അർജന്റീന ദേശീയ ടീം കോച്ച് ലയണൽ സ്‌കലോനി ഇതിനകം തന്നെ താരവുമായി സംസാരിച്ചിട്ടുണ്ടെന്നും ആവശ്യമായ എല്ലാ രേഖകളും കൃത്യസമയത്ത് പൂർത്തിയാക്കാൻ കഴിയുമെങ്കിൽ നവംബർ ലോകകപ്പ് യോഗ്യതാ മത്സരങ്ങളിൽ മാഫിയോ അർജന്റീന ടീമിനൊപ്പം ഉണ്ടാകുമെന്നും അർജന്റീനയിൽ നിന്നുള്ള റിപ്പോർട്ടുകൾ സൂചിപ്പിക്കുന്നു.

മാഫിയോ തന്റെ ക്ലബ് കരിയർ എസ്പാൻയോൾ ബി ടീമിലാണ് തുടങ്ങിയത്, അവിടെ നിന്നും താരത്തെ മാഞ്ചസ്റ്റർ സിറ്റി സൈൻ ചെയ്തു, പിന്നീട് സിറ്റിയിൽ നിന്നും താരം കൂടുതൽ സമയവും ലോണിൽ മറ്റു ക്ലബ്ബുകളിൽ ആണ് ചിലവഴിച്ചത്.  അദ്ദേഹത്തിന്റെ കരിയറിന്റെ ഭൂരിഭാഗവും ജിറോണയ്‌ക്കൊപ്പമായിരുന്നു, അദ്ദേഹം ഇപ്പോൾ മല്ലോർക്കയ്‌ക്കൊപ്പമാണ് കളിക്കുന്നത്.

പാബ്ലോ മാഫിയോ യൂത്ത് തലത്തിൽ സ്പെയിനിനെ പ്രതിനിധീകരിച്ചിട്ടുണ്ട്, പക്ഷേ ഒരിക്കലും സീനിയർ ദേശീയ ടീമിനൊപ്പം കളിച്ചിട്ടില്ല. വലത് വിങ്‌ ബാക്കിൽ കളിക്കുന്ന താരത്തിനു സ്റ്റാർട്ടിങ് ഇലവനിൽ കളിക്കാൻ സാധ്യത വളരെ കുറവാണ്. താരത്തിനു വേണ്ടി ബാഴ്സലോണ പരിശീലകൻ സാവി ഫെർനാണ്ടസ് കഴിഞ്ഞ ട്രാൻസ്ഫർ ജാലകത്തിൽ ബാഴ്സയിലെത്തിക്കാൻ  ശ്രമം നടത്തിയിരുന്നു. പിന്നീട് ക്യാൻസലോയെ ലോണിൽ എത്തിച്ച ബാഴ്‌സ തങ്ങളുടെ റഡാറിൽ നിന്നും ഒഴിവാക്കി.