ഫൈനലിനെ കുറിച്ച് എംബപ്പേയുമായി സംസാരിച്ചിരുന്നു:തുറന്ന് പറച്ചിലുമായി ലയണൽ മെസ്സി

കഴിഞ്ഞ ഖത്തർ വേൾഡ് കപ്പിന്റെ ഫൈനൽ മത്സരത്തിൽ അർജന്റീനയും ഫ്രാൻസും തമ്മിൽ ഏറ്റുമുട്ടിയപ്പോൾ ആരാധകർ ഏറെ ആവേശം കൊണ്ടിരുന്നത് പിഎസ്ജിയിലെ സഹതാരങ്ങളായ ലയണൽ മെസ്സിയും കിലിയൻ എംബപ്പേയും നേർക്കുനേർ വരുന്നു എന്നുള്ള കാര്യത്തിലായിരുന്നു.ആരാധകരുടെ പ്രതീക്ഷകൾ ഒട്ടും തെറ്റിയിരുന്നില്ല.ഫൈനലിൽ രണ്ടുപേരും തകർപ്പൻ പ്രകടനമാണ് പുറത്തെടുത്തത്. ഒടുവിൽ പെനാൽറ്റി ഷൂട്ടൗട്ടിൽ ഫ്രാൻസിനെ കീഴടക്കി കൊണ്ട് അർജന്റീന ഖത്തറിൽ കിരീടം നേടി.

ഹാട്രിക് ഗോൾ നേട്ടമാണ് അർജന്റീനക്കെതിരെ എംബപ്പേ കരസ്ഥമാക്കിയത്.പക്ഷേ മെസ്സിയും മോശമാക്കിയില്ല.രണ്ട് ഗോളുകൾ നേടി മാൻ ഓഫ് ദി മാച്ച് പുരസ്കാരം കൈക്കലാക്കി കൊണ്ടാണ് മെസ്സി കളം വിട്ടത്.കിരീടം നേടിയതിനു ശേഷം വലിയ രൂപത്തിലുള്ള ആഘോഷ പരിപാടികളായിരുന്നു അർജന്റീന സംഘടിപ്പിച്ചിരുന്നത്. പക്ഷേ ഇതിനിടെ എംബപ്പേയെ അവഹേളിച്ചത് വലിയ വിവാദമാവുകയും ചെയ്തു.

ഡ്രസ്സിംഗ് റൂമിലും അർജന്റീനയിലെ സെലിബ്രേഷനിടയിലുമാണ് എമി മാർട്ടിനസ് ഉൾപ്പെടെയുള്ള അർജന്റീന താരങ്ങൾ എംബപ്പേയെ അധിക്ഷേപിച്ചത്.ഇപ്പോഴിതാ ഫൈനലിനെ കുറിച്ച് എംബപ്പേയുമായി സംസാരിച്ചിരുന്നു എന്നുള്ള കാര്യം ലയണൽ മെസ്സി തുറന്നു പറഞ്ഞിട്ടുണ്ട്.സെലിബ്രേഷനുകളെ കുറിച്ചാണ് സംസാരിച്ചതെന്ന് വ്യക്തമാക്കിയ മെസ്സി വിവാദങ്ങളെ പറ്റി ഒന്നും പറഞ്ഞിട്ടില്ല.ഡയാരിയോ ഒലെക്ക് നൽകിയ ഏറ്റവും പുതിയ ഇന്റർവ്യൂവിൽ സംസാരിക്കുകയായിരുന്നു മെസ്സി.

‘തീർച്ചയായും വേൾഡ് കപ്പ് ഫൈനലിനെ കുറിച്ച് ഞാൻ കിലിയൻ എംബപ്പേയുമായി സംസാരിച്ചിരുന്നു.ഞങ്ങൾ ആ മത്സരത്തെക്കുറിച്ച് സംസാരിച്ചു,കിരീടം നേടിയതിനു ശേഷമുള്ള സെലിബ്രേഷനുകളെ കുറിച്ച് സംസാരിച്ചു,ആ ദിവസങ്ങളിൽ അർജന്റീനയിൽ ജീവിക്കുന്നതിലെ അനുഭവങ്ങളെ കുറിച്ച് സംസാരിച്ചു,ഞങ്ങളുടെ വെക്കേഷനെക്കുറിച്ചും ആഘോഷ പരിപാടികളെ കുറിച്ചും സംസാരിച്ചു, അതിനേക്കാൾ ഉപരി ഒന്നും ഉണ്ടായിട്ടില്ല’ഇതാണ് മെസ്സി പറഞ്ഞിട്ടുള്ളത്.

അതായത് വിവാദങ്ങളെ പറ്റി തങ്ങൾ തമ്മിൽ ചർച്ച നടന്നിട്ടില്ല എന്ന് തന്നെയാണ് മെസ്സി വ്യക്തമാക്കുന്നത്.കുറച്ച് വേൾഡ് കപ്പ് നേടിയ അനുഭവങ്ങളാണ് ലയണൽ മെസ്സി തന്റെ സഹതാരമായ എംബപ്പേയോട് പങ്കുവെച്ചിരിക്കുന്നത്.വേൾഡ് കപ്പിന് ശേഷം ഇരുവരും ഒരുമിച്ച് പിഎസ്ജിക്ക് വേണ്ടി കളിക്കാനിറങ്ങിയിരുന്നു.