മുഹമ്മദ് സലയുടെ പകരക്കാരനെ കണ്ടെത്തി ലിവർപൂൾ |Mohamed Salah

ഈ സീസണിന് ശേഷം മുഹമ്മദ് സലാഹ് ലിവർപൂൾ വിടുമെന്നുറപ്പാണ്. കഴിഞ്ഞ ട്രാൻസ്ഫർ വിൻഡോയിൽ തന്നെ സലാഹ് ലിവർപൂൾ വിടാൻ ശ്രമിച്ചിരുന്നു. സൗദി ക്ലബ്ബിലേക്ക് ചേക്കേറാനാണ് അന്ന് സലാഹ് ശ്രമിച്ചത്.

എന്നാൽ ലിവർപൂൾ പരിശീലകൻ യുർഗൻ ക്ളോപ്പിന്റെ പിടിവാശിക്ക് മുന്നിൽ സലാഹിന്റെ സൗദി മോഹങ്ങൾ അവസാനിക്കുകയായിരുന്നു. പിന്നീട് ലിവർപൂൾ താരത്തിന് മുന്നിൽ പുതിയ ഓഫറുകൾ വെച്ചെങ്കിലും താരം അതിനോടൊന്നും പ്രതികരിച്ചില്ല. ഇതോടെ താരം ക്ലബ്‌ വിടുമെന്ന് ലിവർപൂളിന് ഉറപ്പായിരിക്കുകയാണ്.

ഇപ്പോഴിതാ സലാഹ് ലിവർപൂൾ വിടുകയാണെങ്കിൽ പകരം ഒരു കിടിലൻ താരത്തെ സ്വന്തമാക്കാനുള്ള നീക്കങ്ങൾ നടത്തുകയാണ് ക്ലബ്‌. പ്രീമിയർ ലീഗ് ക്ലബ്‌ വോൾവ്സിന്റെ പോർച്ചുഗീസ് മുന്നേറ്റതാരം പേഡ്രോ നെറ്റോയെയാണ് ലിവർപൂൾ ലക്ഷ്യമിടുന്നത്.2019 മുതൽ വോൾവ്സിന്റെ ഭാഗമായ ഈ പോർച്ചുഗീസുകാരൻ അവർക്കായി 98 മത്സരങ്ങളിലും ബൂട്ടണിഞ്ഞിട്ടുണ്ട്. പോർച്ചുഗൽ ദേശീയ ടീമിനായും ഈ 23 കാരൻ കളത്തിലിറങ്ങിയിട്ടുണ്ട്.

സലാഹ് ക്ലബ്‌ വിടുന്ന സാഹചര്യത്തിൽ താരത്തിന് ഉചിതമായ പകരക്കാരനായി മാറാൻ പേഡ്രോയ്ക്ക് സാധിക്കുമെന്ന വിലയിരുത്തലിലാണ് ക്ളോപ്പും.