നെയ്മർക്ക് പിന്നാലെ മറ്റൊരു സൂപ്പർ താരം കൂടി അൽ ഹിലാലിലേക്ക് |AL Hilal

സൂപ്പർതാരം നെയ്മറെ സ്വന്തമാക്കിയതിന് പിന്നാലെ മറ്റൊരു താരത്തെ കൂടി സ്വന്തമാക്കാനുള്ള ശ്രമങ്ങൾ ആരംഭിച്ച സൗദി അറേബ്യൻ ക്ലബ്ബ് അൽ ഹിലാൽ. പ്രീമിയർ ലീഗ് ക്ലബ്ബ് ആസ്റ്റൺ വില്ലയുടെ ഫ്രഞ്ച് പ്രതിരോധ താരം ലൂക്കാസ് ഡീനെയെയാണ് അൽ ഹിലാൽ സ്വന്തമാക്കാൻ ശ്രമിക്കുന്നത്.

താരത്തെ സ്വന്തമാക്കുന്നതുമായി ബന്ധപ്പെട്ടുള്ള കരാർ അവസാനഘട്ടത്തിൽ ആണെന്നാണ് റിപ്പോർട്ടുകൾ.ഇത്തവണ ട്രാൻസ്ഫർ വിപണിയിൽ വലിയ താരങ്ങളെ സ്വന്തമാക്കിയ അൽ ഹിലാൽ കഴിഞ്ഞ ദിവസമാണ് നെയ്മറുടെ വരവ് ഔദ്യോഗികമായി പ്രഖ്യാപിച്ചത്. നേരത്തെ ലയണൽ മെസ്സിയ്ക്കും എംബാപ്പെയ്ക്കും ലോക റെക്കോർഡ് തുക വാഗ്ദാനം ചെയ്ത് അൽ ഹിലാൽ ലോകശ്രദ്ധ നേടിയിരുന്നു.

ഡിബാലയെ അടക്കം ലക്ഷ്യം വെച്ച അൽ ഹിലാലിന് ഒടുവിൽ ലഭിച്ചത് ലോകത്തിലെ തന്നെ സൂപ്പർതാരമായ നെയ്മറിനെയാണ്. നെയ്മർക്ക് പിന്നാലെ ലൂക്കാസ് ഡീനെയെയും സ്വന്തമാക്കാനായാൽ അൽ ഹിലാൽ ഒന്നുകൂടി ശക്തമാവും. ലൂക്കാസ് ഡീനെയ്ക്ക് പുറമേ, ഫുൾ ഹാം സ്ട്രൈക്കർ മിട്രോവിച്ച്, ഒരു ഗോൾ കീപ്പർ എന്നിവരെയും അൽ ഹിലാൽ ലക്ഷ്യം വെയ്ക്കുന്നുണ്ട്.

ഫ്രഞ്ച് ദേശീയ ടീമിനുവേണ്ടി 46 മത്സരങ്ങളിൽ ബൂട്ട്കെട്ടിയ ഡീനെ നേരത്തെ പാരീസ് സെന്റ് ജർമയിൻ,എഎസ് റോമാ, എവർട്ടൻ,ബാഴ്സലോണ തുടങ്ങിയ വമ്പൻ ക്ലബ്ബുകൾക്ക് വേണ്ടിയും ബൂട്ടണിഞ്ഞിട്ടുണ്ട്. താരത്തെ സ്വന്തമാക്കാനായാൽ അൽ ഹിലാൽ കൂടുതൽ ശക്തമായ ടീമായി മാറുമെന്നുറപ്പാണ്.