കസിമിറോയടക്കം മൂന്ന് സൂപ്പർതാരങ്ങൾ മാഞ്ചസ്റ്റർ യുണൈറ്റഡിനു പുറത്തേക്ക് | Manchester United

മാഞ്ചസ്റ്റർ യുണൈറ്റഡ് ജനുവരി ട്രാൻസ്ഫർ വിൻഡോയിൽ കാസെമിറോ, റാഫേൽ വരാനെ, ജാഡോൺ സാഞ്ചോ എന്നിവരെ വിൽപ്പനയ്ക്ക് വെച്ചതായി റിപ്പോർട്ട്. കഴിഞ്ഞ ആഴ്ചകളിൽ യുണൈറ്റഡ് മാനേജർ എന്ന നിലയിൽ എറിക് ടെൻ ഹാഗ് കടുത്ത സമ്മർദ്ദത്തിലായിരുന്നു, പുതുവർഷത്തിൽ വിൻഡോ തുറക്കുമ്പോൾ ചില നിർണായക മാറ്റങ്ങൾ നടത്താൻ അദ്ദേഹം സജ്ജമായി കഴിഞ്ഞു. ബുധനാഴ്ച ചെൽസിക്കെതിരായ 2-1 വിജയം ചെറിയൊരു ആശ്വാസം മാഞ്ചസ്റ്റർ പരിശീലകന് തുണയായിട്ടുണ്ട്, പക്ഷേ വിജയം കൈവരിക്കുന്നതിന് ദീർഘകാലത്തേക്ക് തന്റെ ടീമിനെ പുനർനിർമ്മിക്കണമെന്ന് ഡച്ചുകാരന് നിർബന്ധമുണ്ട്.

സർ ജിം റാറ്റ്ക്ലിഫ് ഉടൻ തന്നെ യുണൈറ്റഡിന്റെ സ്പോർട്ടിംഗ് കൺട്രോൾ ഏറ്റെടുക്കാൻ പോവുകയാണ്. കാസെമിറോ, സാഞ്ചോ, വരാനെ തുടങ്ങിയ ഉയർന്ന നിലവാരമുള്ള കളിക്കാർക്കുള്ള ഓഫറുകൾ ക്ഷണിക്കാൻ ടെൻ ഹാഗ് ആഗ്രഹിക്കുന്നുവെന്ന് ദി ഇൻഡിപെൻഡന്റ് റിപ്പോർട്ട് ചെയ്യുന്നു.

ട്രാൻസ്ഫർ വിൻഡോയിൽ സാഞ്ചോയ്‌ക്കുള്ള നീക്കം അതിശയിപ്പിക്കുന്നില്ല, 73 മില്യൺ പൗണ്ടിന്റെ വിംഗർ നിലവിൽ ടെൻ ഹാഗിന്റെ സ്ക്വാഡിൽ നിന്ന് പുറത്താക്കപ്പെട്ടിട്ടുണ്ട്.എന്നാൽ പ്ലേയിംഗ് ടൈം ഇല്ലാത്തതുകൊണ്ട് വളരെ കുറഞ്ഞ തുകക്ക് മാത്രമേ സാൻജോയെ വിൽക്കാൻ സാധിക്കുകയുള്ളൂ. എന്നാൽ മുൻ റയൽ മാഡ്രിഡ് ജോഡികളായ കാസെമിറോയും വരാനെയും ട്രാൻസ്ഫർ ലിസ്റ്റ് ചെയ്യപ്പെട്ടുവെന്ന റിപ്പോർട്ടുകൾ യുണൈറ്റഡിന്റെ സമീപനത്തിലെ മാറ്റത്തെ സൂചിപ്പിക്കുന്നു.

2022 ഓഗസ്റ്റിൽ റയൽ മാഡ്രിഡിൽ നിന്ന് കാസെമിറോയെ സൈൻ ചെയ്യാൻ യുണൈറ്റഡ് £60 മില്യൺ ചിലവഴിച്ചിട്ടുണ്ട്, പരിചയസമ്പന്നനായ മിഡ്ഫീൽഡറെ ആഴ്ചയിൽ £300,000 മൂല്യമുള്ള നാല് വർഷത്തെ കരാറിലാണ് എത്തിച്ചത്. തന്റെ ആദ്യ സീസണിൽ ഒരു മികച്ച സൈനിംഗായി കാസിമിറോയെ വാഴ്ത്തപ്പെട്ടു, എന്നാൽ ഈ സീസണിൽ അധികം മത്സരങ്ങൾ കളിക്കാൻ കഴിഞ്ഞിട്ടില്ല നിലവിൽ പരിക്കുപറ്റി ടീമിന് പുറത്താണ്. ജനുവരിയിൽ താരം തിരിച്ചെത്തും എന്നാണ് പ്രതീക്ഷ. താരത്തിന് നൽകുന്ന അധിക വേതനം തന്നെയാണ് ചുവന്ന ചെകുത്താന്മാർക്ക് മാറ്റി ചിന്തിക്കേണ്ടി വരുന്നത്.

2021 സമ്മർ ട്രാൻസ്ഫറിലാണ് റയൽ മാഡ്രിഡിൽ നിന്ന് 34 മില്യൺ പൗണ്ടിന് വരാനെ യുണൈറ്റഡിൽ ചേർന്നത്. ഒക്ടോബർ 24 ന് കോപ്പൻഹേഗനെതിരെ 1-0 ന് വിജയിച്ചതിന് ശേഷം അദ്ദേഹം മത്സരം സ്റ്റാർട്ട് ചെയ്തിട്ടില്ല.മൂവരും യുണൈറ്റഡിന്റെ ഏറ്റവും ഉയർന്ന വരുമാനമുള്ളവരിൽ ഉൾപ്പെടുന്നു, ജനുവരിയിൽ യുണൈറ്റഡ് നിരവധി സൈനിംഗുകൾ നടത്താനുള്ള സാധ്യത ടെൻ ഹാഗ് അടുത്തിടെ നിരസിച്ചിരുന്നു. കഴിഞ്ഞ സമ്മർ ട്രാൻസ്ഫറിൽ റാസ്മസ് ഹോജ്‌ലൻഡ്, മേസൺ മൗണ്ട്, ആന്ദ്രേ ഒനാന എന്നിവരെ കൊണ്ടുവരാൻ മാഞ്ചസ്റ്റർ യുണൈറ്റഡ് 170 മില്യണിലധികം ചെലവഴിച്ചു, അതേസമയം കാസെമിറോ, ആന്റണി, ലിസാൻഡ്രോ മാർട്ടിനെസ്, ടൈറൽ മലേഷ്യ എന്നിവരെ സൈൻ ചെയ്യാൻ 2022 ലെ വേനൽക്കാലത്ത് 200 മില്യണിലധികം ചെലവഴിച്ചിരുന്നു.

ഈ സീസണിൽ 22 മത്സരങ്ങളിൽ 10ലും തോറ്റ യുണൈറ്റഡ് 15 മത്സരങ്ങളിൽ നിന്ന് 27 പോയിന്റുമായി പ്രീമിയർ ലീഗ് പട്ടികയിൽ ആറാം സ്ഥാനത്താണ്. ചാമ്പ്യൻസ് ലീഗിന്റെ നോക്കൗട്ട് ഘട്ടത്തിലെത്താൻ അടുത്തയാഴ്ച ബയേൺ മ്യൂണിക്കിനെതിരെ അവർ നിർബന്ധമായും ജയിക്കണം. ജയം മാത്രമല്ല മറ്റു മത്സരങ്ങളുടെ ഫലവും ആശ്രയിച്ചായിരിക്കും ചാമ്പ്യൻസ് ലീഗിലേക്കുള്ള സാധ്യത.