മെസ്സീ..വേൾഡ് കപ്പ് നേട്ടത്തിന് അഭിനന്ദനങ്ങൾ, നീയിത് അർഹിക്കുന്നു : നേരിട്ട് പറഞ്ഞ് റൊണാൾഡോ

ലയണൽ മെസ്സി എന്ന ഇതിഹാസത്തിന്റെ ഏറ്റവും വലിയ സ്വപ്നമായിരുന്നു ഒരു വേൾഡ് കപ്പ് കിരീടം.കഴിഞ്ഞ വർഷമാണ് ലയണൽ മെസ്സി വേൾഡ് കപ്പ് നേടിയത്.ഇനി ഫുട്ബോളിൽ നിന്നും തനിക്ക് ഒന്നും ദൈവത്തോട് ആവശ്യപ്പെടാനാവില്ല എന്നായിരുന്നു ഇതേക്കുറിച്ച് മെസ്സി എപ്പോഴും പറയാറുള്ളത്.

കഴിഞ്ഞ വർഷത്തെ ഏറ്റവും മികച്ച താരത്തിനുള്ള ഫിഫ ബെസ്റ്റ് ഇന്നലെയായിരുന്നു ലയണൽ മെസ്സി ഒരിക്കൽ കൂടി സ്വന്തമാക്കിയത്. ഏഴ് തവണ നേടിയിട്ടുള്ള മെസ്സിയെ വെല്ലാൻ ഈ അടുത്തകാലത്തൊന്നും ഒരാൾ ഉണ്ടാവില്ല എന്ന് പറയേണ്ടിവരും. അത്രയേറെ മുന്നോട്ട് മെസ്സി സഞ്ചരിച്ചു കഴിഞ്ഞു.എട്ടാമത്തെ ബാലൺഡി’ഓർ പുരസ്കാരം കൂടി തന്റെ ക്യാബിനറ്റിലേക്ക് എത്തിക്കാനുള്ള ഒരുക്കത്തിലാണ് മെസ്സിയുള്ളത്.

ഇന്നലത്തെ ഫിഫ ബെസ്റ്റ് പുരസ്കാരദാന ചടങ്ങിനിടെ ബ്രസീലിയൻ ഇതിഹാസമായ റൊണാൾഡോ നസാരിയോയെ ലയണൽ മെസ്സി കണ്ടുമുട്ടിയിരുന്നു.വേൾഡ് കപ്പ് നേട്ടത്തിന് റൊണാൾഡോ മെസ്സിക്ക് അഭിനന്ദനങ്ങൾ നേരുകയാണ് ചെയ്തത്.മാത്രമല്ല ഒരു മിനിറ്റോളം ഇരുവരും നേരിട്ട് കുശലാന്വേഷണങ്ങൾ പങ്കുവെക്കുകയും ചെയ്തു.അതിന്റെ വീഡിയോ ഇപ്പോൾ ട്വിറ്ററിൽ ലഭ്യവുമാണ്.

‘വേൾഡ് കപ്പ് കിരീടം നേടിയതിന് ആദ്യമായി അഭിനന്ദനങ്ങൾ.എങ്ങനെ ഉണ്ടായിരുന്നു അത്? മനോഹരമല്ലേ?തീർച്ചയായും നീ വേൾഡ് കപ്പ് അർഹിച്ചിരുന്നു.നിന്റെ കാര്യത്തിൽ ഞാൻ വളരെയധികം ഹാപ്പിയാണ് ‘ഇതായിരുന്നു ബ്രസീലിയൻ ഇതിഹാസമായ റൊണാൾഡോ മെസ്സിയോട് പറഞ്ഞത്.

വേൾഡ് കപ്പ് നേടിയത് വളരെയധികം ക്രേസിയായിട്ടുള്ള ഒരു അനുഭവമായിരുന്നു എന്നാണ് ലയണൽ മെസ്സി റൊണാൾഡോക്ക് മറുപടി നൽകിയത്.മെസ്സിയെ വളരെയധികം ഇഷ്ടപ്പെടുകയും ബഹുമാനിക്കുകയും ചെയ്യുന്ന ഒരു വ്യക്തി കൂടിയാണ് റൊണാൾഡോ നസാരിയോ.ലയണൽ മെസ്സി വേൾഡ് കപ്പ് നേടാൻ തങ്ങൾ ആഗ്രഹിച്ചിരുന്നു എന്നുള്ളത് ഒരുപാട് ബ്രസീലിയൻ ഇതിഹാസങ്ങൾ തുറന്നുപറയുകയും ചെയ്തിരുന്നു.