❝മാധ്യമ വർത്തകൾ വിശ്വസിക്കരുത് , ബാഴ്സലോണയിലേക്ക് ആരും വരില്ല❞ |FC Barcelona
കഴിഞ്ഞ കുറച്ചു സീസണുകളിലായി ബാഴ്‌സലോണയിൽ നിന്നും ഏറ്റവും മികച്ച പ്രകടനം കാണാൻ സാധിച്ചിരുന്നില്ല. സാമ്പത്തിക പ്രശ്നങ്ങൾ മൂലം വലയുന്ന ക്ലബ്ബിൽ നിന്നും മെസിയടക്കമുള്ളവർ പുറത്ത് പോയിരുന്നു.കഴിഞ്ഞ സീസണിൽ പാതി വഴിയിൽ പരിശീലകനായി ചുമതലയേറ്റ ഇതിഹാസ താരം സാവിയുടെ കീഴിൽ പുതിയ താരങ്ങളെ ടീമിലെത്തിച്ച് പുനരുജ്ജീവിപ്പിക്കാനുള്ള ശ്രമത്തിലാണ് ബാഴ്സലോണ.
നിരവധി താരങ്ങൾ വരുന്ന സീസണിൽ ബാഴ്സയിലെത്തും എന്ന വാർത്തകൾ ഓരോ ദിവസവും മാധ്യമങ്ങളിലൂടെ ഉയർന്നു കേൾക്കുന്നുണ്ട്.എന്നാൽ മാധ്യമ ഊഹാപോഹങ്ങൾ വിശ്വസിക്കരുതെന്ന് മുൻ ബാഴ്സലോണ പ്രസിഡന്റ് സ്ഥാനാർത്ഥി ആരാധകരോട് അഭ്യർത്ഥിക്കുകയാണ്.എഎസ് പറയുന്നതനുസരിച്ച് മാധ്യമങ്ങളിൽ പ്രചരിക്കുന്ന ചില വലിയ ട്രാൻസ്ഫർ കിംവദന്തികളിൽ വഴങ്ങരുതെന്ന് ബാഴ്സലോണ 2021 പ്രസിഡന്റ് തിരഞ്ഞെടുപ്പിൽ മത്സരിച്ച ടോണി ഫ്രീക്സ ആരാധകരോട് അഭ്യർത്ഥിച്ചു.
അടുത്തിടെ തങ്ങളുമായി ബന്ധപ്പെടുത്തിയിട്ടുള്ള വലിയ പേരുകളൊന്നും കറ്റാലൻ ക്ലബ്ബിന് ഒപ്പിടാൻ കഴിയില്ലെന്ന് ഫ്രീക്സ കരുതുന്നു. റോബർട്ട് ലെവൻഡോവ്‌സ്‌കി, ജൂൾസ് കൗണ്ടെ, ബെർണാഡോ സിൽവ, റാഫിൻഹ എന്നിവർക്ക് സാധ്യമായ നീക്കങ്ങളെ ചുറ്റിപ്പറ്റിയുള്ള എല്ലാ മാധ്യമ പ്രചരണങ്ങളും ആരാധകരെ തെറ്റിദ്ധരിപ്പിക്കുന്നതാണെന്ന് അദ്ദേഹം പറഞ്ഞു.”ലെവൻഡോവ്‌സ്‌കി, കൗണ്ടേ, റാഫിൻഹ, ബെർണാഡോ സിൽവ എന്നിവർ വരില്ലെന്ന് നിങ്ങൾക്കറിയാമോ? അത് നിങ്ങൾക്കറിയാം, അല്ലേ?” അദ്ദേഹം ട്വിറ്ററിൽ കുറിച്ചു.കഴിഞ്ഞ വർഷം നടന്ന തിരഞ്ഞെടുപ്പിൽ നിലവിലെ ബാഴ്സലോണ പ്രസിഡന്റ് ജോവാൻ ലാപോർട്ടയ്‌ക്കെതിരെയാണ് ഫ്രീക്സ മത്സരിച്ചത്. വെറും 8.58% വോട്ടുകൾ നേടിയാണ് അദ്ദേഹം അവസാന സ്ഥാനത്തെത്തിയത്.
ഇതുവരെ ബാഴ്‌സലോണയുടെ ഒരേയൊരു പുതിയ മുഖം റേസിംഗ് സാന്റാൻഡറിൽ നിന്നുള്ള 19 കാരനായ പാബ്ലോ ടോറെയാണ്.ലെവൻഡോവ്‌സ്‌കി, കൗണ്ടെ, സിൽവ, റാഫിൻഹ എന്നിവരുൾപ്പെടെ നിരവധി കളിക്കാരുമായി ലാ ലിഗ വമ്പന്മാർ ചർച്ചകൾ തുടരുന്നുണ്ട് . എന്നിരുന്നാലും ഈ ചർച്ചകളിൽ വലിയ പുരോഗതി ഉണ്ടായിട്ടില്ല. ക്ലബ്ബിന്റെ സാമ്പത്തിക സ്ഥിതി തന്നെയാണ് ചർച്ചകൾ മുന്നോട്ട് പോവാതിരിക്കാനുള്ള പ്രധാന കാരണവും.