ലയണൽ മെസ്സിക്ക് ശേഷം കോപ്പ ഡെൽ റേ ഫൈനലിൽ ഈ നേട്ടം സ്വന്തമാക്കുന്ന ആദ്യ താരമാണ് റോഡ്രിഗോ

റയൽ മാഡ്രിഡിന്റെയും സ്പാനിഷ് ഫുട്ബോളിന്റെയും ചരിത്രത്തിൽ റോഡ്രിഗോ തന്റെ പേര് രേഖപ്പെടുത്തുന്നത് തുടരുകയാണ്. ഇന്നലെ ഒസാസുനക്കെതിരെ നടന്ന കോപ്പ ഡെൽ റേയുടെ ഫൈനലിൽ രണ്ടു ഗോളുകൾ നേടി റയലിനെ കിരീടം ചൂടിച്ചിരിക്കുകയാണ് റോഡ്രിഗോ.2014 ന് ശേഷമുള്ള ആദ്യത്തെ സ്പാനിഷ് കപ്പ് കിരീടം റയൽ മാഡ്രിഡിന് നേടിക്കൊടുക്കാൻ ബ്രസീലിയൻ ഫോർവേഡ് ഹാഫ് ടൈമിന്റെ ഇരുവശത്തും സ്കോർ ചെയ്തു.

ഒന്നിനെതിരെ രണ്ടു ഗോളുകൾക്കാണ് റയൽ മാഡ്രിഡ് വിജയം നേടിയത്.രണ്ടാമത്തെ മിനുട്ടിൽ തന്നെ റോഡ്രിഗോ റയൽ മാഡ്രിഡിനെ മുന്നിലെത്തിച്ചിരുന്നു. വിനീഷ്യസ് ജൂനിയർ വിങ്ങിലൂടെ ഡ്രിബിൾ ചെയ്‌തു മുന്നേറി വന്നു നൽകിയ പന്ത് പോസ്റ്റിലേക്ക് തട്ടിയിട്ട് താരം റയലിനായി ആദ്യത്തെ ഗോൾ നേടി. എന്നാൽ രണ്ടാം പകുതിയിൽ ഒസാസുന തിരിച്ചടിച്ചു. ലൂക്കാസ് ടോറെ അമ്പത്തിയെട്ടാം മിനുട്ടിൽ ഗോൾ നേടിയെങ്കിലും പത്ത് മിനിറ്റിനകം റോഡ്രിഗോയിലൂടെ റയൽ വീണ്ടും ഗോൾ നേടി. വിനീഷ്യസിന്റെ മുന്നേറ്റം തന്നെയാണ് ഗോളിൽ കലാശിച്ചത്.

ഇതോടെ ലയണൽ മെസ്സിക്ക് ശേഷം കോപ്പ ഡെൽ റേ ഫൈനലിൽ ഒന്നിലധികം ഗോളുകൾ നേടുന്ന ആദ്യത്തെ കളിക്കാരനായി റോഡ്രിഗോ മാറി. ബ്രസീലിയൻ ജോഡികളായ വിനീഷ്യസ് ജൂനിയറും റോഡ്രിഗോയും ചേർന്നുള്ള കൂട്ട്കെട്ടാണ് റയൽ മാഡ്രിഡിന് വിജയം നേടിക്കൊടുത്തത്. ഈ സീസണിൽ ലോസ് ബ്ലാങ്കോസിനായി ബ്രസീലിയൻ ജോഡികൾ മികച്ച പ്രകടനം കാഴ്ചവച്ചു.കോപ്പ ഡെൽ റേ കിരീടം നേടിയതോടെ ഇരുപത്തിരണ്ടാം വയസിൽ ക്ലബ് ഫുട്ബോളിലെ എല്ലാ കിരീടങ്ങളും സ്വന്തമാക്കുകയെന്ന നേട്ടവും ബ്രസീലിയൻ താരങ്ങളെ തേടിയെത്തി.

രണ്ടു ലാ ലിഗ, ഒരു ചാമ്പ്യൻസ് ലീഗ്, രണ്ടു സ്‌പാനിഷ്‌ സൂപ്പർകപ്പ്, ഒരു യൂറോപ്യൻ സൂപ്പർകപ്പ്, ഒരു ക്ലബ് ലോകകപ്പ് എന്നീ നേട്ടങ്ങൾക്ക് പുറമെയാണ് ഇപ്പോൾ കോപ്പ ഡെൽ റേയും ഇവർ സ്വന്തമാക്കിയത്. “ഇത് ഞാൻ നേടാൻ ആഗ്രഹിച്ച ഒരു ട്രോഫിയായിരുന്നു, കാരണം എനിക്ക് വിജയിക്കേണ്ട അവസാനത്തേതാണ് ഇത്, 22-ാം വയസ്സിൽ സാധ്യമായതെല്ലാം ഞാൻ ഇതിനകം നേടിയിട്ടുണ്ട്. എങ്കിലും ഇനിയും പലതും ജയിച്ചുകൊണ്ടേയിരിക്കാനും ഈ കപ്പ് പലതവണ നേടാനും ഞാൻ ആഗ്രഹിക്കുന്നു. ഇത് ആദ്യത്തേതാണ്, അത് എത്രമാത്രം സവിശേഷമാണെന്ന് ഞാൻ കണ്ടു” റോഡ്രിഗോ പറഞ്ഞു.

ഒസാസുനയ്‌ക്കെതിരായ കോപ്പ ഡെൽ റേ ഫൈനൽ വിജയത്തിന് ശേഷം റയൽ മാഡ്രിഡ് ബോസ് കാർലോ ആൻസലോട്ടി തന്റെ മാച്ച് വിന്നിംഗ് ജോഡികളായ വിനീഷ്യസ് ജൂനിയർ, റോഡ്രിഗോ ഗോസ് എന്നിവരെ പ്രശംസിച്ചു.റയൽ മാഡ്രിഡ് കളിക്കാരനെന്ന നിലയിൽ തന്റെ ഏറ്റവും മികച്ച നേട്ടത്തിൽ റോഡ്രിഗോ ഇപ്പോൾ എല്ലാ മത്സരങ്ങളിലും 16 ഗോളുകൾ വരെ നേടിയിട്ടുണ്ട്.