ഖത്തർ വേൾഡ് കപ്പിൽ മെസ്സി തകർത്തേക്കാവുന്ന ചില റെക്കോർഡുകൾ |Lionel Messi

ഈ വർഷത്തിന്റെ അവസാനത്തിൽ നടക്കുന്ന ഫിഫ വേൾഡ് കപ്പിന് വേണ്ടിയാണ് ഫുട്ബോൾ ആരാധകർ ഇപ്പോൾ ഏറ്റവും കൂടുതൽ കാത്തിരിക്കുന്നത്. അതിൽ തന്നെ അർജന്റീന ആരാധകരും ലയണൽ മെസ്സിയുടെ ആരാധകരുമൊക്കെ ഇത്തവണ ഏറെ പ്രതീക്ഷകൾ വെച്ചുപുലർത്തുന്നുണ്ട്. ഒരുപക്ഷേ മെസ്സിയുടെ അവസാനത്തെ വേൾഡ് കപ്പ് ആയി കൊണ്ട് വിലയിരുത്തപ്പെടുന്ന ഈ ഖത്തർ വേൾഡ് കപ്പിൽ മെസ്സിക്കും അർജന്റീനക്കും കിരീടം നേടാൻ കഴിയുമോ എന്നുള്ളത് ഒരുപാട് പേർ ആകാംക്ഷയോടെ നോക്കി കാണുന്ന കാര്യമാണ്.

ലയണൽ മെസ്സിയെ സംബന്ധിച്ചിടത്തോളം ഈ വരുന്ന വേൾഡ് കപ്പിൽ ചില റെക്കോർഡുകൾ തകർക്കാനും ചില റെക്കോർഡുകൾക്ക് ഒപ്പമെത്താനും സാധിക്കും.അത്തരത്തിലുള്ള ചില റെക്കോർഡുകൾ ഏതൊക്കെയാണ് എന്നുള്ളത് നോക്കാം. അർജന്റീനക്ക് വേണ്ടി ഏറ്റവും കൂടുതൽ വേൾഡ് കപ്പ് മത്സരങ്ങൾ കളിച്ച താരമെന്ന റെക്കോർഡ് ഇതിഹാസ താരം മറഡോണയുടെ പേരിലാണ്.21 മത്സരങ്ങളാണ് അദ്ദേഹം വേൾഡ് കപ്പിൽ കളിച്ചിട്ടുള്ളത്.

മറ്റൊരു ഇതിഹാസമായ ഹവിയർ മഷെരാനോ അർജന്റീനക്ക് വേണ്ടി 20 വേൾഡ് കപ്പ് മത്സരങ്ങൾ കളിച്ചിട്ടുണ്ട്.തൊട്ട് പുറകിലാണ് മെസ്സി ഇപ്പോൾ ഉള്ളത്. 19 വേൾഡ് കപ്പ് മത്സരങ്ങളാണ് മെസ്സി കളിച്ചിട്ടുള്ളത്.ഈ ഖത്തർ വേൾഡ് കപ്പിലെ ഗ്രൂപ്പ് ഘട്ടത്തിലെ മൂന്ന് മത്സരങ്ങളിലും മെസ്സി കളിക്കുകയാണെങ്കിൽ ഈ റെക്കോർഡ് മെസ്സിയുടെ പേരിലാവും.

വേൾഡ് കപ്പിന്റെ ചരിത്രത്തിൽ ഏറ്റവും കൂടുതൽ മത്സരങ്ങൾ കളിച്ച താരം ജർമ്മൻ ഇതിഹാസമായ ലോതർ മത്തെയൂസ് ആണ്.25 മത്സരങ്ങളാണ് അദ്ദേഹം കളിച്ചിട്ടുള്ളത്. ഈ റെക്കോർഡ് മെസ്സി സ്വന്തമാക്കണമെങ്കിൽ മെസ്സി ഏഴ് മത്സരങ്ങൾ കളിക്കേണ്ടി വരും. അർജന്റീന ഫൈനലിൽ എത്തുകയോ അതല്ലെങ്കിൽ മൂന്നാം സ്ഥാനത്തിന് വേണ്ടിയുള്ള മത്സരത്തിൽ പങ്കെടുക്കുകയോ ചെയ്യുകയും ഈ മത്സരങ്ങൾ എല്ലാം തന്നെ മെസ്സി കളിക്കുകയും ചെയ്താൽ ഈ റെക്കോർഡ് മെസ്സിയുടെ പേരിലാകും.

മറ്റൊരു റെക്കോർഡ് അർജന്റീനക്ക് വേണ്ടി ഏറ്റവും കൂടുതൽ ഗോളുകൾ വേൾഡ് കപ്പിൽ നേടിയ താരമെന്ന റെക്കോർഡ് ആണ്.ബാറ്റിസ്റ്റൂട്ടയാണ് 10 ഗോളുകൾ നേടി കൊണ്ട് ഈ റെക്കോർഡ് കയ്യടക്കി വെച്ചിരിക്കുന്നത്. 6 ഗോളുകൾ ഇതുവരെ നേടിയിട്ടുള്ള മെസ്സിക്ക് 5 ഗോളുകൾ കൂടി നേടുകയാണെങ്കിൽ ഈ റെക്കോർഡ് സ്വന്തം പേരിലാക്കാം.മാത്രമല്ല ഈ ഖത്തർ വേൾഡ് കപ്പിൽ പങ്കെടുക്കുന്നതോടുകൂടി ഏറ്റവും കൂടുതൽ വേൾഡ് കപ്പ് കളിച്ച താരങ്ങളോടൊപ്പം റെക്കോർഡ് പങ്കിടുകയും ചെയ്യാൻ മെസ്സിക്ക് സാധിക്കും.

ലയണൽ മെസ്സിയെ സംബന്ധിച്ചിടത്തോളം എത്തിപ്പിടിക്കാൻ ബുദ്ധിമുട്ടുള്ള റെക്കോർഡുകൾ ഒന്നുമല്ല അത്.അർജന്റീന മികച്ച പ്രകടനം കാഴ്ചവെക്കുകയാണെങ്കിൽ തീർച്ചയായും മെസ്സിയും ഈ റെക്കോർഡുകളൊക്കെ മറികടക്കും എന്നാണ് ആരാധകർ വിശ്വസിക്കുന്നത്.