“അടുത്ത തവണയെങ്കിലും ഇങ്ങിനെ നാണം കുണുങ്ങിയാവരുത്”- മെസിയുടെ വീഡിയോക്ക് കിടിലൻ കമന്റുമായി സുവാരസ്

ഖത്തർ ലോകകപ്പിന് ശേഷം അർജന്റീന ആദ്യമായി കളിക്കാനിറങ്ങിയ ഇന്നലെ ആരാധകരുടെ ആഘോഷമായിരുന്നു. എതിരില്ലാത്ത രണ്ടു ഗോളുകൾക്ക് പനാമയെ കീഴടക്കിയ അർജന്റീന അതിനു ശേഷം ലോകകപ്പ് വിജയവും ആഘോഷിച്ചു. ഗംഭീര സ്വീകരണമാണ് ആരാധകർ മുപ്പത്തിയാറു വർഷത്തിനു ശേഷം ലോകകപ്പ് നേടിയ ടീമിന് റിവർപ്ലേറ്റിന്റെ മൈതാനത്ത് നൽകിയത്.

അർജന്റീനയുടെ ആഘോഷത്തിൽ രസകരമായ നിരവധി സംഭവങ്ങൾ അരങ്ങേറിയിരുന്നു. അതിലൊന്നാണ് ആരാധകർ മെസിയോട് ഡാൻസ് ചെയ്യാൻ ആവശ്യപ്പെട്ടത്. ഒരു സ്റ്റേഡിയം മുഴുവനും ഒപ്പമുണ്ടായിരുന്ന സഹതാരങ്ങളും മെസിയോട് ഡാൻസ് ചെയ്യാൻ പറഞ്ഞെങ്കിലും അതിനു തയ്യാറാവാതെ നാണക്കേടോടെ അത് നിഷേധിക്കുകയാണ് അർജന്റീനയുടെ നായകൻ ചെയ്‌തത്‌.

ഈ സംഭവത്തിൽ രസകരമായ കമന്റുമായി മെസിയുടെ അടുത്ത സുഹൃത്ത് ലൂയിസ് സുവാരസ് രംഗത്തു വന്നിട്ടുണ്ട്. വീഡിയോ കണ്ടതിനു ശേഷം മെസിയെ മെൻഷൻ ചെയ്‌ത്‌ സുവാരസ് ഇട്ട കമന്റ് ഇങ്ങിനെയായിരുന്നു. “”നിങ്ങളെയിങ്ങനെ സന്തോഷത്തോടെ കാണാൻ നല്ല രസമാണ്, ഞാനത് വളരെയധികം ആസ്വദിക്കുന്നു, നിങ്ങളത് അർഹിക്കുന്നയാളുമാണ്. പക്ഷെ അടുത്ത തവണ ഇങ്ങിനെ നാണം കുണുങ്ങി നിൽക്കരുത്, ഡാൻസ് ചെയ്യണം. ആലിംഗനം നേരുന്നു.”

ബാഴ്‌സലോണയിൽ ഒരുമിച്ച് കളിക്കുന്ന കാലം മുതലെ മെസിയുടെ അടുത്ത സുഹൃത്താണ് ലൂയിസ് സുവാരസ്. രണ്ടു പേരും രണ്ടു ക്ളബുകളിലേക്ക് മാറിയിട്ടും ആ സൗഹൃദം ഇപ്പോഴും സുദൃഢമായി തുടരുന്നു. ലയണൽ മെസിയോട് ഇങ്ങിനെയൊരു പ്രതികരണം നടത്താൻ കഴിയുന്ന ഒരേയൊരു ഫുട്ബോൾ താരവും ലൂയിസ് സുവാരസ് തന്നെയായിരിക്കും. നിലവിൽ ബ്രസീലിയൻ ലീഗിലാണ് സുവാരസ് കളിക്കുന്നത്.