വേൾഡ് കപ്പിൽ ഞങ്ങൾ ആരെയും ഭയക്കുന്നില്ല: ആത്മവിശ്വാസത്തോടെ ലയണൽ മെസ്സി പറയുന്നു

കഴിഞ്ഞ വേൾഡ് കപ്പുകളിൽ നിന്നും വ്യത്യസ്തമായി ഇത്തവണ അർജന്റീന വലിയ പ്രതീക്ഷകളോടുകൂടിയാണ് ഖത്തറിലേക്ക് എത്തുന്നത്. അതിന് കാരണവുമുണ്ട്. എന്തെന്നാൽ സമീപകാലത്ത് ഏറ്റവും സ്ഥിരതയോടു കൂടി കളിക്കുന്ന ഒരേയൊരു ടീം അർജന്റീനയാണ്.കഴിഞ്ഞ 35 മത്സരങ്ങളിൽ ഒന്നിൽ പോലും അർജന്റീന പരാജയപ്പെട്ടിട്ടില്ല.

ഈ കുതിപ്പിനിടയിൽ ബ്രസീലിനെ പരാജയപ്പെടുത്തി കോപ്പ അമേരിക്ക കിരീടം നേടാനും ഇറ്റലിയെ പരാജയപ്പെടുത്തി ഫൈനലിസിമ നേടാനും അർജന്റീനക്ക് കഴിഞ്ഞിട്ടുണ്ട്.അതുകൊണ്ടുതന്നെ പലരും അർജന്റീനയെ ഏറ്റവും കൂടുതൽ കിരീട സാധ്യത കൽപ്പിക്കപ്പെടുന്ന ടീമുകളിൽ ഒന്നായി വിലയിരുത്തുന്നുണ്ട്. ഏതായാലും അർജന്റീനയും താരങ്ങളും ആരാധകരുമൊക്കെ ഇത്തവണ വലിയ ആത്മവിശ്വാസത്തിലാണ്.

ആ ഒരു ആത്മവിശ്വാസം ഇപ്പോൾ അർജന്റീനയുടെ നായകനായ ലയണൽ മെസ്സിയും പ്രകടിപ്പിച്ചിട്ടുണ്ട്.അതായത് വരുന്ന വേൾഡ് കപ്പിൽ ഞങ്ങൾ ആരെയും ഭയക്കുന്നില്ല എന്നാണ് മെസ്സി ഉറച്ച പ്രസ്താവന നടത്തിയിട്ടുള്ളത്. ഏത് ടീമിനെതിരെയും പോരാടാൻ അർജന്റീന തയ്യാറാണെന്നും മെസ്സി ഇപ്പോൾ ഓർമിപ്പിച്ചു.ഡയറക്റ്റ് ടിവി സ്പോർട്സിനോട് സംസാരിക്കുകയായിരുന്നു മെസ്സി.

‘ ഞങ്ങളുടെ സ്വപ്നം എന്നുള്ളത് വളരെ വലുതാണ്.ഞങ്ങൾ ആ വലിയ സ്വപ്നത്തിന് വേണ്ടി പോരാടാൻ പോവുകയാണ്.ഒരുപക്ഷേ ഞങ്ങൾ ഖത്തർ വേൾഡ് കപ്പിലെ ബെസ്റ്റ് ഫേവറേറ്റുകൾ അല്ലായിരിക്കാം. പക്ഷേ ഞങ്ങൾ വേൾഡ് കപ്പിലുള്ള ആരെയും തന്നെ ഭയക്കുന്നില്ല.ഏത് ടീമിനെതിരെയും പോരാടാൻ ഞങ്ങൾ തയ്യാറെടുത്തു കഴിഞ്ഞു ‘ അർജന്റീന ക്യാപ്റ്റൻ മെസ്സി പറഞ്ഞു.

ലയണൽ മെസ്സി ഈ സീസണിൽ വളരെ മികച്ച രൂപത്തിൽ കളിക്കുന്നത് അർജന്റീനക്ക് വളരെ സന്തോഷം നൽകുന്ന ഒരു കാര്യമാണ്.കഴിഞ്ഞ ഇന്റർനാഷണൽ ബ്രേക്കിൽ അർജന്റീനക്ക് വേണ്ടി ഏറ്റവും കൂടുതൽ തിളങ്ങിയത് മെസ്സി തന്നെയായിരുന്നു. രണ്ട് മത്സരങ്ങളിൽ നിന്ന് നാല് ഗോളുകൾ നേടിയ മെസ്സി ഈ പ്രായത്തിലും ആരാധകരെ വിസ്മയിപ്പിച്ചു കൊണ്ടിരിക്കുകയാണ്.