‘ഞങ്ങൾ കരഞ്ഞതിനേക്കാൾ കൂടുതൽ റൊണാൾഡോ കരയുന്നത് ഞാൻ ആസ്വദിച്ചു’ : മൊറോക്കൻ വേൾഡ് കപ്പ് താരം പറയുന്നു

ഫുട്ബോൾ ലോകത്ത് ഒരിക്കലും അവസാനിക്കാത്ത ലയണൽ മെസ്സിയും ക്രിസ്റ്റ്യാനോ റൊണാൾഡോയും തമ്മിലുള്ള ആരാണ് മികച്ചവൻ എന്ന ചർച്ചയിലേക്ക് മൊറോക്കൻ ഫുട്ബോൾ താരം സോഫിയാൻ ബൗഫൽ കടന്നു വന്നിരിക്കുകയാണ്.ലോകകപ്പിലെ തന്റെ ടീമിന്റെ മികച്ച പ്രകടനത്തെക്കുറിച്ച് ഖത്തറി സ്‌പോർട്‌സ് ചാനലായ അൽകാസിനോട് സംസാരിച്ച ബൗഫൽ മെസ്സിയോടുള്ള ആരാധനയും റൊണാൾഡോയുടെ പോർച്ചുഗൽ ടീം വേൾഡ് കപ്പിൽ നിന്നും പുറത്തായതിലെ തന്റെ സന്തോഷവും പ്രകടിപ്പിച്ചു.

” റൊണാള്ഡോയോട് എനിക്ക് അതിയായ ബഹുമാനമുണ്ട് പക്ഷെ ഞങ്ങൾ കരയുന്നതിനേക്കാൾ അദ്ദേഹം കരയുന്നത് ഞാൻ ആസ്വദിച്ചു. റൊണാൾഡോയെക്കാൾ മെസ്സിയെയാണ് ഞാൻ ഇഷ്ടപ്പെടുന്നത്, ഞാൻ കളിക്കാൻ ആഗ്രഹിക്കുന്ന ക്ലബ്ബ് ബാഴ്‌സലോണയാണ്” മൊറോക്കൻ പറഞ്ഞു.ലോകകപ്പിൽ മൊറോക്കോയുടെ സെമി ഫൈനൽ വരെയുള്ള കുതിപ്പിന് ശേഷമായിരുന്നു ബൗഫലിന്റെ അഭിപ്രായങ്ങൾ.ഇത്തരമൊരു നേട്ടം കൈവരിക്കുന്ന ആദ്യത്തെ ആഫ്രിക്കൻ ടീമായി ചരിത്രം സൃഷ്ടിച്ചു.

ടീമിന്റെ പ്രതിരോധശേഷിയും വിദഗ്ധമായ കൗണ്ടർ അറ്റാക്കുകളും ഫുട്ബോൾ ആരാധകരും പണ്ഡിതന്മാരും ഒരുപോലെ പ്രശംസിച്ചു, അവരുടെ വിജയത്തിൽ ബൗഫൽ ഒരു പ്രധാന പങ്ക് വഹിച്ചു.റൊണാൾഡോയുടെ കഴിവുകൾ അംഗീകരിക്കുമ്പോഴും മൊറോക്കൻ താരത്തിന് പ്രിയം ലയണൽ മെസ്സിയോടാണ്.അഭിപ്രായങ്ങളിൽ ബൗഫലിന്റെ മെസ്സിയോടുള്ള ആരാധന പ്രകടമായിരുന്നു.

ബാഴ്‌സലോണയോടുള്ള തന്റെ ആരാധന വെളിപ്പെടുത്തിക്കൊണ്ട് ബൗഫൽ ബാഴ്‌സലോണയ്‌ക്കായി കളിക്കാനുള്ള ആഗ്രഹവും പ്രകടിപ്പിച്ചു.ബൗഫലിന്റെ അഭിപ്രായങ്ങൾ ഭാവിയിൽ സ്പാനിഷ് ക്ലബിലേക്കുള്ള നീക്കത്തെക്കുറിച്ചുള്ള ഊഹാപോഹങ്ങൾക്ക് കാരണമായേക്കാം.മെസ്സിക്കും ബാഴ്സലോണയ്ക്കും ബൗഫലിന്റെ അസന്ദിഗ്ധമായ പിന്തുണയും ഇതിനു കാരണമായേക്കാം.