മെസ്സി അന്യഗ്രഹജീവി, അദ്ദേഹത്തെ മറ്റൊരു ജേഴ്സിയിൽ സങ്കൽപ്പിക്കാൻ കൂടി കഴിയില്ല, പ്യാനിക്ക് പറയുന്നു.
എഫ്സി ബാഴ്സലോണയുടെ സൂപ്പർ താരം ലയണൽ മെസ്സിയെ വാനോളം പുകഴ്ത്തി മുൻ യുവന്റസ് താരവും നിലവിലെ ബാഴ്സ താരവുമായ മിറാലെം പ്യാനിക്ക്. തന്റെ ഔദ്യോഗിക അവതരണവേളയിലാണ് പ്യാനിക്ക് മെസ്സിയെ വാനോളം പ്രശംസിച്ചത്. താൻ ഒരു അന്യഗ്രഹത്തിൽ നിന്നുള്ള താരത്തോടൊപ്പമാണ് കളിക്കാൻ പോവുന്നത് എന്നാണ് അദ്ദേഹം അഭിപ്രായപ്പെട്ടത്. ഇന്നായിരുന്നു താരം ബാഴ്‌സയിൽ ഔദ്യോഗികമായി അവതരിച്ചത്. തുടർന്നാണ് താരം ഒരുപാട് കാര്യങ്ങൾ സംസാരിച്ചത്.
” ക്രിസ്റ്റ്യാനോ റൊണാൾഡോ, ടോട്ടി എന്നിവരെ പോലെയുള്ള മികച്ച താരങ്ങളോടൊപ്പം കളിക്കാൻ അവസരം ലഭിച്ച ആളാണ് ഞാൻ. എന്നെ സംബന്ധിച്ചെടുത്തോളം അത്‌ വളരെ പ്രാധാന്യമേറിയതാണ്. ഇപ്പോൾ ഞാൻ അന്യഗ്രഹത്തിൽ നിന്നും വന്ന ഒരു താരത്തോടൊപ്പം കളിക്കാൻ ഒരുങ്ങുന്നു. പക്ഷെ എല്ലവരോടൊപ്പവും കളിക്കുവാൻ ഞാൻ ആഗ്രഹിക്കുന്നു. ടീമിലെ 25 പേരും പ്രധാനപ്പെട്ടവരാണ്. എല്ലവരും ഞങ്ങളുടെ ലക്ഷ്യങ്ങൾ പൂർത്തീകരിക്കാൻ വേണ്ടപ്പെട്ടവരാണ് ” പ്യാനിക്ക് തുടർന്നു.
Pjanic: Messi? I'm basically playing with an extraterrestrial https://t.co/PmLtp3VOFU
— SPORT English (@Sport_EN) September 15, 2020
” മെസ്സിയുമായി ബന്ധപ്പെട്ട എല്ലാ വാർത്തകളും ഞാൻ കേൾക്കുകയും വായിക്കുകയും ചെയ്തിരുന്നു. പക്ഷെ മെസ്സി ബാഴ്സ വിടുമെന്ന് ഞാൻ ഒരിക്കൽ പോലും ചിന്തിച്ചിട്ട് പോലുമില്ല. കാരണം അദ്ദേഹം ഇവിടെയാണ് വളർന്നത്. അദ്ദേഹം ഈ ക്ലബ്ബിന് വേണ്ടി ഒരുപാട് കാര്യങ്ങൾ ചെയ്തിട്ടുണ്ട്. അദ്ദേഹം ഇവിടെ കരിയർ പൂർത്തിയാക്കുമെന്നാണ് ഞാൻ കരുതുന്നത്. അദ്ദേഹം വലിയൊരു ജേതാവാണ്. അദ്ദേഹത്തിന്റെ വീടാണ് ഇത് ” പ്യാനിക്ക് അറിയിച്ചു.
” സത്യസന്ധമായി പറഞ്ഞാൽ, എനിക്ക് അദ്ദേഹത്തെ ഇവിടെ മാത്രമേ സങ്കൽപ്പിക്കാൻ കഴിയുന്നൊള്ളൂ. അദ്ദേഹത്തെ മറ്റൊരു ടീമിന്റെ ജേഴ്സിയിൽ കാണുന്നത് വളരെയധികം വിചിത്രമായ കാര്യമായിരിക്കും. അദ്ദേഹം സന്തോഷവാനാണ്. എക്കാലത്തെയും മികച്ച താരമാണ് അദ്ദേഹം. അദ്ദേഹം ഞങ്ങളുടെ കൂടെയുള്ളത് വലിയൊരു മുൻ‌തൂക്കമാണ് ഞങ്ങൾക്ക് നൽകുന്നത് ” പ്യാനിക്ക് അവസാനിപ്പിച്ചു.