വീണ്ടും വിസ്‌മയിപ്പിച്ച് ലയണൽ മെസി, താരത്തിന്റെ ഫസ്റ്റ് ടച്ച് വൈറലാവുന്നു |Lionel Messi

ഖത്തർ ലോകകപ്പിനു ശേഷം ഇന്നലെ ആദ്യമായി ക്ലബ് തലത്തിലുള്ള മത്സരത്തിനിറങ്ങിയ ലയണൽ മെസി മികച്ച പ്രകടനമാണ് നടത്തിയത്. രണ്ടാം പകുതിയിൽ ഒരു ഗോൾ നേടിയ മെസി പിഎസ്‌ജിയുടെ വിജയം ഉറപ്പിച്ചു. ഈ സീസണിൽ ഫ്രഞ്ച് ലീഗിൽ പിറന്ന ഏറ്റവും മികച്ച ടീം ഗോളുകളിൽ ഒന്നായിരുന്നു ഇന്നലെ നടന്ന മത്സരത്തിൽ മെസി നേടിയതെന്ന കാര്യത്തിൽ യാതൊരു സംശയവുമില്ല. മെസി തന്നെ തുടക്കമിട്ട് മെസി തന്നെ ഗോൾ നേടുകയായിരുന്നു.

മത്സരത്തിൽ മെസി നേടിയ ആ ഗോൾ ചർച്ചാവിഷയമാകുന്നതിനൊപ്പം മത്സരത്തിനു മുൻപ് താരം പരിശീലനം നടത്തുമ്പോഴുള്ള ഫസ്റ്റ് ടച്ചും ഇപ്പോൾ വാർത്തകളിൽ നിറഞ്ഞു നിൽക്കുകയാണ്. വാംഅപ്പ് നടത്തുന്നതിനിടെ ഉയർന്നു വന്ന പന്ത് താരം കാലിൽ ഒട്ടിപ്പിടിച്ചതു പോലെയാണ് താരം കാലിൽ ഒതുക്കിയത്. മത്സരം കാണാനെത്തിയ ഒരു ആരാധകനാണ് ഇതിന്റെ വീഡിയോ എടുത്ത് സോഷ്യൽ മീഡിയയിൽ വൈറലാക്കിയത്.

നിരവധി പേരാണ് മെസിയുടെ പന്തടക്കത്തിൽ അത്ഭുതം പ്രകടിപ്പിക്കുന്നത്. ഇതുപോലൊരു ടച്ച് എളുപ്പമല്ലെന്നും അസാധാരണമായ രീതിയിലാണ് താരം പന്ത് കാലിൽ ഒതുക്കി നിർത്തിയതെന്നും പലരും അഭിപ്രായപ്പെടുന്നു. അതേസമയം മെസിയെപ്പോലൊരു താരത്തിൽ നിന്നും എല്ലായിപ്പോഴും ഇതുപോലെയുള്ള അത്ഭുതങ്ങൾ പ്രതീക്ഷിക്കാമെന്നതു കൊണ്ട് ഇത് സ്വാഭാവികമാണെന്നു കരുതുന്നവരുമുണ്ട്.

മത്സരത്തിൽ മെസി നേടിയ ഗോളും അതിമനോഹരമായിരുന്നു. മൂന്നു പിഎസ്‌ജി താരങ്ങൾക്ക് പന്ത് കൈമാറിയും തിരിച്ചു വാങ്ങിയും ടീമിന്റെ മുഴുവൻ നീക്കങ്ങളിലും പങ്കാളിയായാണ് മെസി ടീമിന്റെ വിജയമുറപ്പിച്ച ഗോൾ നേടിയത്. മത്സരത്തിൽ ഗോൾ നേടിയതോടെ ഈ സീസണിൽ ലീഗിൽ മെസിയുടെ ഗോൾ നേട്ടം എട്ടായി. ഇതിനു പുറമെ പത്ത് അസിസ്റ്റുകളും മെസി സ്വന്തമാക്കിയിട്ടുണ്ട്.