അൽ നാസറിന് വേണ്ടി സ്കോർ ചെയ്തതിന് ശേഷം ക്രിസ്റ്റ്യാനോ റൊണാൾഡോയുടെ ‘സിയു’ ആഘോഷവുമായി സാഡിയോ മാനെ

ഇന്നലെ നടന്ന സൗദി പ്രൊ ലീഗ് മത്സരത്തിൽ അൽ നാസർ 5-0 ന് അൽ ഫത്തേഹിനെ കീഴടക്കി മൂന്ന് പോയിന്റുകൾ സ്വന്തമാക്കിയിരിക്കുകയാണ്.ആദ്യ രണ്ട് മത്സരങ്ങളിൽ തോറ്റ അൽ നാസറിന്റെ സീസണിലെ ആദ്യ വിജയമാണിത്. ക്രിസ്റ്റ്യാനോ റൊണാൾഡോയും സാഡിയോ മാനെയും ഒത്തുചേർന്നപ്പോൾ ഇരുവരും അഞ്ച് ഗോളുകൾ നേടി.

കളിയിലെ തന്റെ രണ്ടാം ഗോൾ നേടിയതിന് ശേഷം മാനെ റൊണാൾഡോയുടെ ഐതിഹാസിക ആഘോഷവും പകർത്തി. 81-ാം മിനിറ്റിൽ അബ്ദുൾറഹ്മാൻ ഗരീബിന്റെ ക്രോസിൽ നിന്നും മുൻ ലിവർപൂൾ താരം ഹെഡ്ഡറിലൂടെ ഗോൾ നേടി.തന്റെ രണ്ടാം ഗോളിന്റെയും ആഘോഷത്തിൽ സാഡിയോ മാനെ റൊണാൾഡോയുടെ മുന്നിൽ ചാടി ‘സിയു’ ആഘോഷം ചെയ്തു. പോർച്ചുഗീസ്‌ താരം ഒരു പൂർണ്ണമായ ആലിംഗനത്തോടെ പ്രതികരിച്ചു.27-ാം മിനിറ്റിൽ റൊണാൾഡോയുടെ ബാക്ക്ഹീൽ പാസിൽ വലകുലുക്കിയ മാനെ കളിയുടെ ആദ്യ ഗോളും നേടി.

പതിനൊന്ന് മിനിറ്റിന് ശേഷം ഗാനമിന്റെ ക്രോസിൽ നിന്നും മികച്ചൊരു ഹെഡറിലൂടെ റൊണാൾഡോ അൽ നാസറിന്റെ രണ്ടമത്തെ ഗോൾ നേടി.പ്രൊ ലീഗ് സീസണിലെ റൊണാൾഡോയുടെ ആദ്യ ഗോളാണിത്. രണ്ടാം പകുതിയുടെ തുടക്കത്തിൽ വീണ്ടും ഗോൾ വല കുലുക്കി റൊണാൾഡോ മത്സരം 3-0 എന്ന നിലയിലാക്കി.

81 ആം മിനുട്ടിൽ മാനെ തന്റെ രണ്ടാം ഗോൾ നേടിയതോടെ മത്സരം 4-0 എന്ന നിലയിലായി. അധിക സമയത്തിന്റെ ആറാം മിനിറ്റിൽ ക്ലോസ് റേഞ്ച് ടാപ്പ്-ഇന്നിലൂടെ തന്റെ സീനിയർ കരിയറിലെ 63-ാം ഹാട്രിക്ക് ക്രിസ്റ്റ്യാനോ റൊണാൾഡോ പൂർത്തിയാക്കുകയും ചെയ്തു.ആഗസ്റ്റ് 29 ചൊവ്വാഴ്ച അൽ ഷബാബിനെതിരെയാണ് അൽ നാസറിന്റെ അടുത്ത മത്സരം.