‘ഭാഗ്യം മാത്രം !’ ക്രിസ്റ്റ്യാനോ റൊണാൾഡോ ലയണൽ മെസ്സിയെക്കാൾ മികച്ച ഗോൾ സ്‌കോററല്ല : സെർജിയോ അഗ്യൂറോ

അർജന്റീന സൂപ്പർ താരം ലയണൽ മെസ്സി പോർച്ചുഗീസ് സൂപ്പർ താരം ക്രിസ്റ്റ്യാനോ റൊണാൾഡോയെക്കാൾ മികച്ച ഗോൾ സ്‌കോറർ ആണെന്ന അഭിപ്രായവുമായി രംഗത്ത് വന്നിരിക്കുകയാണ് മുൻ താരം സെർജിയോ അഗ്യൂറോ.ക്രിസ്റ്റ്യാനോ റൊണാൾഡോയുടെ ഗോളുകൾ ഭാഗ്യമാണെന്ന് സെർജിയോ അഗ്യൂറോ പറഞ്ഞു.

റൊണാൾഡോക്കെതിരെ ഗോളുകൾ വഴങ്ങിയതിന് ഗോൾകീപ്പർമാരെ അഗ്യൂറോ കുറ്റപ്പെടുത്തുകയും ചെയ്തു.ലീഗ് 1ൽ പാരീസ് സെന്റ് ജെർമെയ്‌ൻ നൈസിനെതിരെ 2-0 ന് വിജയിച്ചപ്പോൾ മെസ്സി ഗോൾ നേടി യൂറോപ്പിൽ റൊണാൾഡോയുടെ 701 ക്ലബ് ഗോളുകൾ മറികടന്നു.മെസ്സിയെ അപേക്ഷിച്ച് റൊണാൾഡോയുടെ ഗോളുകളുടെ ഗുണമേന്മയെ അഗ്യൂറോ ചോദ്യം ചെയ്‌തതായി മെഡിയോ ടൈമ്പോ റിപ്പോർട്ട് ചെയ്തിരുന്നു.ട്വിച്ചിലെ ഒരു തത്സമയ സ്‌ട്രീമിൽ ക്രിസ്റ്റ്യാനോ റൊണാൾഡോക്ക് പലപ്പോഴും ഭാഗ്യത്തിന്റെ വലിയൊരു ഭാഗം പ്രയോജനപ്പെട്ടു എന്നും അഗ്യൂറോ അഭിപ്രായപ്പെട്ടു.

“എവിടെ നിന്നാണ് റൊണാൾഡോ ഗോൾ നേടിയതെന്ന് നോക്കൂ. എല്ലാ ഫ്രീ-കിക്ക് ഗോളുകളും ശുദ്ധമായ ഭാഗ്യത്തിൽ നിന്നാണ് വന്നത്.മെസ്സിയുടെ എല്ലാം പിറന്നത് മികച്ച ആംഗിളുകളിൽ നിന്നാണ്.എന്നാൽ റൊണാൾഡോ എന്താണ് ചെയ്യുന്നത്? ഗോൾകീപ്പറുടെ പിഴവ് മൂലമാണ് ഗോളുകൾ നേടുന്നത്.റൗളിനും കരീം ബെൻസീമക്കും റൊണാൾഡോയെക്കാൾ മികച്ച ഗോളുകൾ ഉണ്ടെന്ന് ഞാൻ കരുതുന്നു ” അഗ്യൂറോ പറഞ്ഞു.അഗ്യൂറോയും മെസ്സിയും പിച്ചിന് പുറത്ത് അവിശ്വസനീയമായ സൗഹൃദം പങ്കിടുന്നു.

മെസ്സി അഗ്യൂറോയുടെ മകൻ ബെഞ്ചമിന്റെ ഗോഡ്ഫാദറാണ്, 2021-ൽ മാഞ്ചസ്റ്റർ സിറ്റിയിൽ നിന്ന് ബാഴ്‌സലോണയിൽ ചേരുകയും അതുവഴി ഇതിഹാസവുമായി അതേ ഡ്രസ്സിംഗ് റൂം പങ്കിടാൻ അദ്ദേഹത്തിന് കഴിഞ്ഞു. എന്നിരുന്നാലും അതെ സമയത്ത് മെസ്സി പിഎസ്ജിയിലേക്ക് പോയി, ഇത് അഗ്യൂറോയുടെ ആഗ്രഹം നിറവേറ്റുന്നതിൽ നിന്ന് തടഞ്ഞു.