മെസ്സിയെക്കുറിച്ച് മോശമായി സംസാരിക്കുന്നവരോട് ഒരിക്കലും യോജിക്കാനാവില്ല: താരം ബാഴ്സയിലേക്ക് തിരിച്ചെത്തുമോ എന്ന കാര്യത്തിൽ ഫാബ്രിഗസ് പറയുന്നു

ദീർഘ കാലം ബാഴ്സക്ക് വേണ്ടി പന്ത് തട്ടിയ ലയണൽ മെസ്സിക്ക് അപ്രതീക്ഷിതമായി കൊണ്ട് കഴിഞ്ഞ സീസണിൽ ബാഴ്സയോട് വിട പറയേണ്ടി വന്നിരുന്നു. പക്ഷേ ബാഴ്സക്കോ ബാഴ്സ ആരാധകർക്കോ ലയണൽ മെസ്സിയെ ഒരിക്കലും മറക്കാനാവില്ല എന്ന് മാത്രമല്ല മെസ്സിയെ ഒരിക്കൽ കൂടി ബാഴ്സ ജേഴ്സിയിൽ കാണാൻ അവർ ആഗ്രഹിക്കുന്നുണ്ട്. ബാഴ്സയുമായി ബന്ധപ്പെട്ടവർ തന്നെ ഇതേക്കുറിച്ചുള്ള ആഗ്രഹങ്ങൾ പങ്കുവച്ചിരുന്നു.

ലയണൽ മെസ്സിക്കൊപ്പം മുമ്പ് ബാഴ്സയിൽ കളിച്ചിട്ടുള്ള സൂപ്പർതാരമായിരുന്നു സെസ്ക്ക് ഫാബ്രിഗസ്. മെസ്സി ബാഴ്സയിലേക്ക് തിരികെ എത്തുന്നതുമായി ബന്ധപ്പെട്ടുകൊണ്ട് ഫാബ്രിഗസ് ചില കാര്യങ്ങൾ പറഞ്ഞിട്ടുണ്ട്. മെസ്സി ബാഴ്സയിലേക്ക് തിരിച്ചെത്തുകയാണെങ്കിൽ അത് വളരെയധികം സന്തോഷം നൽകുന്ന കാര്യമായിരിക്കും എന്നാണ് ഇദ്ദേഹം പറഞ്ഞിട്ടുള്ളത്.

‘ മെസ്സിക്ക് ബാഴ്സയിലേക്ക് തിരിച്ചു വരാൻ കഴിയുമോ എന്നുള്ളത് എനിക്കറിയില്ല. പക്ഷേ അതിന് ബാഴ്സക്ക് കൂടി സാഹചര്യങ്ങൾ അനുകൂലമാവണം. മെസ്സിയും ക്ലബ്ബുമാണ് ഈ വിഷയത്തിൽ തീരുമാനം എടുക്കേണ്ടത്. അദ്ദേഹം തിരിച്ചെത്തുകയാണെങ്കിൽ അത് മികച്ച ഒരു എന്റിങ് ആയിരിക്കും. ഞാൻ സന്തോഷവാനുമായിരിക്കും ‘ ഫാബ്രിഗസ് പറഞ്ഞു.

കൂടെ ലയണൽ മെസ്സിയെ താരം പ്രശംസിക്കുകയും ചെയ്തിട്ടുണ്ട്. ‘ മെസ്സിയെ കുറിച്ച് മോശമായി സംസാരിക്കുന്നവരോട് എനിക്ക് ഒരിക്കലും യോജിക്കാനാവില്ല.കാരണം എനിക്ക് അദ്ദേഹത്തോടൊപ്പമുള്ള അനുഭവം അതിൽനിന്നും വ്യത്യസ്തമാണ്. ടീമിൽ ഏറ്റവും കൂടുതൽ സ്നേഹിക്കപ്പെടുന്ന താരവും ഏറ്റവും കൂടുതൽ ബഹുമാനിക്കപ്പെടുന്ന താരവും മെസ്സി തന്നെയായിരുന്നു. അദ്ദേഹത്തിന്റെ നേട്ടങ്ങളെയും അദ്ദേഹത്തെയും നിങ്ങൾ നിർബന്ധമായും മൂല്യം കൽപ്പിക്കണം ‘ ഇതാണ് ഫാബ്രിഗസ് പറഞ്ഞിട്ടുള്ളത്.

മെസ്സി ബാഴ്സയിൽ തന്നെ തിരിച്ചെത്തുന്നതിനെ ഭൂരിഭാഗം ആരാധകരും വളരെയധികം ഇഷ്ടപ്പെടുന്നുണ്ട്.എന്നാൽ താരത്തെ നില നിർത്താനുള്ള എല്ലാവിധ പരിശ്രമങ്ങളും പിഎസ്ജി നടത്തുമെന്നുറപ്പാണ്. വരുന്ന ഖത്തർ വേൾഡ് കപ്പിന് ശേഷമായിരിക്കും തന്റെ ഭാവിയെക്കുറിച്ച് മെസ്സി തീരുമാനം കൈക്കൊള്ളുക.