ഫുട്ബോൾ ലോകത്തെ രണ്ടാമത്തെ ബില്യണറായി മെസ്സി, ഏറ്റവും കൂടുതൽ സമ്പാദിക്കുന്ന താരങ്ങളുടെ പട്ടിക പുറത്ത്.
ഫുട്ബോൾ ലോകത്തെ രണ്ടാമത്തെ ബില്യണർ എന്ന ഖ്യാതി ഇനി ലയണൽ മെസ്സിക്ക് സ്വന്തം. ഇന്നലെ ഫോബ്‌സ് മാസിക പുറത്തു വിട്ട സ്ഥിതിവിവരകണക്കുകൾ പ്രകാരമാണ് ലയണൽ മെസ്സി ഫുട്ബോൾ ലോകത്തെ രണ്ടാമത്തെ ബില്യണറായത്. ഫുട്ബോൾ ലോകത്തെ ആദ്യ ബില്യണറായി മാറിയത് സൂപ്പർ താരം ക്രിസ്റ്റ്യാനോ റൊണാൾഡോയായിരുന്നു. നിലവിൽ ഒരു ബില്യൺ ഡോളറാണ് മെസ്സി തന്റെ കരിയറിൽ സമ്പാദിച്ചത്.
പുതിയ കണക്കുകൾ പ്രകാരം 126 മില്യൺ ഡോളറാണ് മെസ്സി കഴിഞ്ഞ സീസണിൽ സമ്പാദിച്ചത്. ഇതിൽ സാലറിയായി 92 മില്യൺ ഡോളർ മെസ്സി കൈപറ്റി. കൂടാതെ മറ്റുള്ള വരുമാനമാർഗങ്ങളിലൂടെ 34 മില്യൺ ഡോളറും മെസ്സി സ്വന്തമാക്കി. അഡിഡാസ്, പെപ്സി, അൽ വിഷൻ കമ്പനി എന്നീ കമ്പനികളാണ് മെസ്സിയുടെ പ്രധാനവരുമാനമാർഗങ്ങൾ. ഈ കഴിഞ്ഞ സീസണിൽ ഏറ്റവും കൂടുതൽ സമ്പാദിച്ച രണ്ടാമത്തെ താരം റൊണാൾഡോയാണ്. 117 മില്യൺ ഡോളറാണ് ക്രിസ്റ്റ്യാനോയുടെ സമ്പാദ്യം. സോഷ്യൽ മീഡിയ അക്കൗണ്ടുകൾ വഴിയും നൈക്ക്, ഹെർബലൈഫ് എന്നിവവഴിയുമാണ് ക്രിസ്റ്റ്യാനോയുടെ മറ്റു വരുമാനമാർഗങ്ങൾ.
Here are the world's highest-paid soccer players of this year: https://t.co/uwa97l7pRM pic.twitter.com/NgaGxdef0k
— Forbes (@Forbes) September 14, 2020
സൂപ്പർ താരം നെയ്മർ ജൂനിയറാണ് മൂന്നാം സ്ഥാനത്ത്. 96 മില്യൺ ഡോളറാണ് താരത്തിന്റെ സമ്പാദ്യം. നെയ്മറുടെ സഹതാരമായ കിലിയൻ എംബാപ്പെയാണ് നാലാം സ്ഥാനത്തുള്ളത്. 42 മില്യൺ ഡോളറാണ് അദ്ദേഹത്തിന്റെ വരുമാനം. അഞ്ചാം സ്ഥാനം കരസ്ഥമാക്കിയിരിക്കുന്നത് ലിവർപൂൾ താരം മുഹമ്മദ് സലായാണ്. 37 മില്യൺ ഡോളറാണ് സലായുടെ സമ്പാദ്യം. പ്രീമിയർ ലീഗിൽ ഏറ്റവും കൂടുതൽ സമ്പാദിക്കുന്ന താരമാണ് സലാ. മാഞ്ചസ്റ്റർ യുണൈറ്റഡിന്റെ പോൾ പോഗ്ബയാണ് ആറാമത്. 34 മില്യൺ ഡോളർ പോഗ്ബ സമ്പാദിച്ചിട്ടുണ്ട്.
ഏഴാമത് ബാഴ്സ താരം ഗ്രീസ്‌മാൻ ആണ്. 33 മില്യൺ ഡോളർ താരം സമ്പാദിച്ചു. എട്ടാമത് റയൽ മാഡ്രിഡ്‌ സൂപ്പർ താരം ഗാരെത് ബെയ്‌ലാണ്. 29 മില്യൺ ഡോളറാണ് ബെയ്ൽ സമ്പാദിച്ചിരിക്കുന്നത്. 24 മില്യൺ സമ്പാദിക്കുന്ന റോബർട്ട്‌ ലെവന്റോസ്ക്കിയാണ് ഒമ്പതാം സ്ഥാനത്ത്. മാഞ്ചസ്റ്റർ യുണൈറ്റഡ് ഗോൾ കീപ്പർ ഡേവിഡ് ഡിഹിയയാണ് പത്താം സ്ഥാനത്ത്. 21 മില്യൺ ഡോളറാണ് താരത്തിന്റെ സമ്പാദ്യം.