ആരാധകർക്ക് ലയണൽ മെസ്സിയുടെ പുതുവത്സര സന്ദേശം : ❛ലോകമെമ്പാടുമുള്ള ആരാധകരെ, നിങ്ങളില്ലാതെ ഇത് സാധ്യമാകുമായിരുന്നില്ല❜

ലിയോ മെസ്സിയെ സംബന്ധിച്ചിടത്തോളം അദ്ദേഹത്തിന്റെ കരിയറിലെ ഏറ്റവും മികച്ച വർഷമാണ് ഇപ്പോൾ കടന്നുപോയിട്ടുള്ളത്. അർജന്റീനയുടെ ദേശീയ ടീമിനൊപ്പം വേൾഡ് കപ്പ് കിരീടം നേടാനായി എന്നുള്ളത് തന്നെയാണ് കഴിഞ്ഞ വർഷത്തെ ലയണൽ മെസ്സിയുടെ ഏറ്റവും വലിയ നേട്ടം.മാത്രമല്ല എല്ലാ മേഖലകളിലും മെസ്സി തിളങ്ങുകയും ചെയ്തിരുന്നു. അതിന് തെളിവുകൾ തന്നെയാണ് അദ്ദേഹത്തിന്റെ കണക്കുകൾ.

ആകെ 51 മത്സരങ്ങൾ കളിച്ച മെസ്സി 35 ഗോളുകളും 30 അസിസ്റ്റുകളുമാണ് കഴിഞ്ഞവർഷം സ്വന്തമാക്കിയിട്ടുള്ളത്. അതായത് 65 ഗോളുകളിൽ മെസ്സി കോൺട്രിബ്യൂട്ട് ചെയ്തു കഴിഞ്ഞു.കൂടാതെ നിരവധി കിരീടങ്ങൾ അദ്ദേഹം കരസ്ഥമാക്കി. അർജന്റീനക്കൊപ്പം വേൾഡ് കപ്പും ഫൈനലിസിമയും കരസ്ഥമാക്കി.പിഎസ്ജിക്കൊപ്പം ലീഗ് വണ്ണും ട്രോഫി ഡെസ് ചാമ്പ്യൻസും സ്വന്തമാക്കി. മാത്രമല്ല വേൾഡ് കപ്പിലെ ഏറ്റവും മികച്ച താരത്തിനുള്ള പുരസ്കാരവും കരസ്ഥമാക്കിയത് മെസ്സി തന്നെയായിരുന്നു.

2022 വിട പറഞ്ഞുകൊണ്ട് 2023 കടന്നു വരുമ്പോൾ ലിയോ മെസ്സി തന്റെ ഇൻസ്റ്റാഗ്രാമിലൂടെ ഒരു പുതുവത്സര സന്ദേശം നൽകിയിട്ടുണ്ട്. ലോകത്തിന്റെ നാനാഭാഗങ്ങളിലുമുള്ള തന്റെ ആരാധകരോടാണ് അദ്ദേഹം നന്ദി പറഞ്ഞിട്ടുള്ളത്.നിങ്ങളില്ലാതെ ഈ നേട്ടങ്ങൾ ഒന്നും തന്നെ സാധ്യമാകുമായിരുന്നില്ല എന്നും മെസ്സി കൂട്ടിച്ചേർത്തു.

‘ ഞാൻ ഒരിക്കലും മറക്കാത്ത ഒരു വർഷമാണ് ഇപ്പോൾ അവസാനിച്ചിരിക്കുന്നത്. ഞാൻ എപ്പോഴും പിന്തുടർന്നിരുന്ന ഒരു സ്വപ്നം ഇപ്പോൾ സാക്ഷാൽക്കാരമായിരിക്കുന്നു. എനിക്ക് അത്ഭുതപ്പെടുത്തുന്ന ഒരു കുടുംബമുണ്ട്,കൂടാതെ സുഹൃത്തുക്കളും ഉണ്ട്,എപ്പോഴും എന്നെ പിന്തുണച്ചിരുന്നത് ഇവരായിരുന്നു. മാത്രമല്ല എന്നെ എപ്പോഴും ഫോളോ ചെയ്തിരുന്ന ആളുകളോടും എനിക്ക് സ്പെഷ്യൽ ആയിട്ടുള്ള ഒരു ബന്ധമുണ്ട്. നിങ്ങളോടൊപ്പം ഈ വഴി പങ്കുവെക്കാൻ കഴിഞ്ഞതിൽ സന്തോഷമുണ്ട്. എന്റെ രാജ്യത്തുനിന്നും പാരീസിൽ നിന്നും ബാഴ്സലോണയിൽ നിന്നും ലോകത്തിന്റെ പല ഭാഗങ്ങളിൽ നിന്നും എനിക്ക് ആളുകളുടെ സ്നേഹം ലഭിച്ചിട്ടുണ്ട്. ഈ സ്നേഹം ഇല്ലായിരുന്നുവെങ്കിൽ ഇതൊന്നും സാധ്യമാകുമായിരുന്നില്ല. ഈ വർഷം ഇനി മികച്ചതാവും എന്ന് പ്രതീക്ഷിക്കുന്നു.എല്ലാവർക്കും വലിയ ആലിംഗനങ്ങൾ നേരുന്നു ‘ ലിയോ മെസ്സി പോസ്റ്റ് പങ്കുവെച്ചു.

ലയണൽ മെസ്സിയുടെ ആരാധകർക്കും ഇത് സുന്ദരമായ ഒരു വർഷം തന്നെയാണ്. അവരുടെ പ്രിയപ്പെട്ട താരം വേൾഡ് കപ്പ് കിരീടം ഉയർത്തുന്നത് കൺകുളിർക്കെ കാണാനായി എന്നുള്ളത് ഓരോ മെസ്സി ആരാധകനും വളരെയധികം സന്തോഷം നൽകുന്ന ഒരു കാര്യമാണ്.