മെസ്സിയെന്ന GOAT,ഫുട്ബോൾ ദൈവങ്ങൾ നൽകിയ ഗിഫ്റ്റ് : ഗാരി ലിനേക്കർ മെസ്സിയെ കുറിച്ച് പറയുന്നു.

ലയണൽ മെസ്സി ലോക ഫുട്ബോളിനെ വിസ്മയിപ്പിക്കുന്നത് തുടർന്നുകൊണ്ടേയിരിക്കുകയാണ്. കഴിഞ്ഞ ചാമ്പ്യൻസ് ലീഗ് മത്സരത്തിലും നമ്മൾ അത് കണ്ടു. അതിസുന്ദരമായ ഒരു ഗോളാണ് ലയണൽ മെസ്സിയുടെ ബൂട്ടിൽ നിന്നും ബെൻഫിക്കക്കെതിരെ പിറന്നിട്ടുള്ളത്.

ആ ഗോളിന് ഒരുപാട് പേർ പ്രശംസിച്ചിട്ടുണ്ട്. ആ ഗോൾ കണ്ടാൽ നിങ്ങൾ ലയണൽ മെസ്സിയുമായി പ്രണയത്തിലാവുമെന്നാണ് ഇതേക്കുറിച്ച് സഹതാരമായ മാർക്കോ വെറാറ്റി പറഞ്ഞത്. അത്രയേറെ മനോഹരമായ ഗോളാണ് മെസ്സി നേടിയത് എന്നുള്ള കാര്യത്തിൽ സംശയമില്ല. എന്നാൽ അതിനേക്കാളൊക്കെ എത്രയോ മികവുറ്റ ഒരുപാട് ഗോളുകൾ മെസ്സിയുടെ കരിയർ ചികഞ്ഞു കഴിഞ്ഞാൽ നമുക്ക് കാണാൻ സാധിക്കും.

ഏതായാലും ഈ ഗോളിന് ശേഷം ഇംഗ്ലീഷ് ഇതിഹാസമായ ഗാരി ലിനേക്കർ ഒരുതവണ കൂടി പ്രശംസിച്ചിട്ടുണ്ട്.മെസ്സി എന്ന GOAT എന്നാണ് ഇദ്ദേഹം പറഞ്ഞിട്ടുള്ളത്.ഫുട്ബോൾ ദൈവങ്ങൾ നൽകിയ ഗിഫ്റ്റ് ആണ് ലയണൽ മെസ്സിയെന്നും ഇദ്ദേഹം കൂട്ടിച്ചേർത്തു.

‘ ഫുട്ബോൾ ദൈവങ്ങൾ നൽകിയ സമ്മാനം,അത് നമുക്ക് നൽകുന്നത് തുടർന്നുകൊണ്ടേയിരിക്കുന്നു. മെസ്സി എന്ന GOAT ൽ നിന്നും ഒരു അസാധാരണമായ ഗോൾ കൂടി നമുക്ക് ലഭിച്ചിരിക്കുന്നു ‘ ഗാരി ലിനേക്കർ ട്വീറ്റ് ചെയ്തു.

കഴിഞ്ഞ സീസണിൽ പലപ്പോഴും ഫ്രാൻസിലെ ഫുട്ബോൾ പണ്ഡിറ്റ്കൾക്കിടയിൽ നിന്ന് മെസ്സിക്ക് വിമർശനങ്ങൾ ഏൽക്കേണ്ടി വന്നിരുന്നു.എന്നാൽ ആ വിമർശനങ്ങളെയെല്ലാം ഈ സീസണിൽ തുടക്കത്തിൽ തന്നെ മെസ്സി കാറ്റിൽ പറത്തുകയായിരുന്നു. കഴിഞ്ഞ സീസണിലെ വിമർശനങ്ങൾക്കെല്ലാം പലിശ സഹിതമാണ് ലയണൽ മെസ്സി ഇപ്പോൾ പകരം നൽകിക്കൊണ്ടിരിക്കുന്നത്.