കിരീട പ്രതീക്ഷകൾ അവസാനിച്ചു ,ആരാധകരോട് ക്ഷമാപണം നടത്തി ആഴ്‌സണൽ മാനേജർ മൈക്കൽ അർട്ടെറ്റ

ഇംഗ്ലീഷ് പ്രീമിയർ ലീഗിൽ ഇന്നലെ നടന്ന മത്സരത്തിൽ ബ്രൈറ്റണിനോട് 3-0 ത്തിന്റെ ദയനീയ തോൽവി ഏറ്റുവാങ്ങിയതോടെ കിരീടം നേടാനുള്ള ആഴ്‌സനലിന്റെ പ്രതീക്ഷകൾ അസ്തമിച്ചിരിക്കുകയാണ്. ആഴ്സണലിന്റെ തോൽവിയിലും സമീപകാലത്തെ മോശം പ്രകടനത്തിലും ആരാധകർ നിരാശരായി. സീസണിന്റെ ഒരു പ്രധാന ഭാഗം ഗണ്ണേഴ്‌സ് ഒന്നാം സ്ഥാനം നിലനിർത്തിയിരുന്നുവെങ്കിലും മാഞ്ചസ്റ്റർ സിറ്റിയുടെ പ്രകടനത്തിന് മുന്നിൽ സമ്മർദ്ദത്തിന് വഴങ്ങി.

19 വർഷത്തെ ടൈറ്റിൽ വരൾച്ച ഈ സീസണിൽ അവസാനിപ്പിക്കാം എന്ന കണക്കു കൂട്ടലിൽ ആയിരുന്നു ആഴ്‌സണൽ. എന്നാൽ ആ കാത്തിരിപ്പ് നീളും എന്ന് തന്നെയാണ് പുതിയ ഫലം കണക്കാക്കുന്നത് .ഇന്നലെ നടന്ന മത്സരത്തിൽ റോബർട്ടോ ഡി സെർബിയുടെ ബ്രൈറ്റൻ രണ്ടാം പകുതിയിൽ മൂന്ന് ഗോളുകൾ നേടി തങ്ങളുടെ വിജയം ഉറപ്പിച്ചു. തോൽ‌വിയിൽ നിരാശനായ മൈക്കൽ അർട്ടെറ്റ ആഴ്സണൽ ആരാധകരോട് ക്ഷമാപണം നടത്തി.ഈ തോൽവി ക്ലബ്ബിന്റെ കിരീട മോഹങ്ങൾക്ക് ഏൽപ്പിച്ച കനത്ത പ്രഹരത്തെ അംഗീകരിച്ചു. വ്യത്യസ്തമായ ഒരു ഫലം പ്രതീക്ഷിച്ച ആരാധകരെ നിരാശപ്പെടുത്തിയതിൽ അദ്ദേഹം ഖേദം പ്രകടിപ്പിച്ചു.

“ആളുകൾ എന്തെങ്കിലും പ്രതീക്ഷിക്കുമ്പോൾ അവരെ നിരാശപ്പെടുത്തുന്ന വികാരത്തെ ഞാൻ വെറുക്കുന്നു. അതാണ് എനിക്ക് ഇന്ന് ഉള്ള ഏറ്റവും വലിയ ഖേദം, അതിന് ഞാൻ മാപ്പ് പറയണം” പരിശീലകൻ പറഞ്ഞു. മാഞ്ചസ്റ്റർ സിറ്റിയെ മറികടക്കുന്നത് ഇപ്പോൾ മറികടക്കാനാകാത്ത ദൗത്യമാണെന്ന് സമ്മതിച്ച ടീമിന്റെ ക്യാപ്റ്റൻ മാർട്ടിൻ ഒഡെഗാർഡാണ് ആഴ്‌സണലിന്റെ തിരിച്ചുവരവിന്റെ പ്രതീക്ഷകളെ കൂടുതൽ കെടുത്തിയത്. രണ്ടാം പകുതിയിൽ ടീമിന്റെ തകർച്ച വിശദീകരിക്കാൻ ഒഡെഗാർഡ് പാടുപെടുകയും അവരുടെ കിരീട സ്വപ്നം അതിവേഗം മങ്ങുകയാണെന്ന് സമ്മതിക്കുകയും ചെയ്തു.

“അതെ, അങ്ങനെ തോന്നുന്നു. ഇത് ഇപ്പോൾ വളരെ ബുദ്ധിമുട്ടായിരിക്കും, നമ്മൾ സത്യസന്ധരായിരിക്കണം. എടുക്കാൻ ബുദ്ധിമുട്ടാണ്. ഇപ്പോൾ ഒരു പ്രതീക്ഷയും ഇല്ലെന്ന് തോന്നുന്നു.” അദ്ദേഹം അഭിപ്രായപ്പെട്ടു.ശനിയാഴ്ച വൈകുന്നേരം നോട്ടിംഗ്ഹാം ഫോറസ്റ്റിനെതിരെ ആഴ്സണലിന് വിജയം ഉറപ്പിക്കാനായില്ലെങ്കിൽ, ചെൽസിക്കെതിരായ അവരുടെ അടുത്ത ലീഗ് മത്സരത്തിന് മുമ്പ് തന്നെ ഈ സീസണിലെ ചാമ്പ്യന്മാരായി സിറ്റി ഉറപ്പിച്ചേക്കാം. ഏറെ നാളായി തുടരുന്ന കിരീട വരൾച്ചയ്ക്ക് അറുതിവരുത്തുമെന്ന പ്രതീക്ഷയിൽ മുഴുകിയ ആഴ്സണലിനും അവരുടെ ആരാധകർക്കും ഇത് സമ്മാനിക്കുന്നത് വലിയ നിരാശയാണ്.