രാജകീയമായി അസൂറിപട സെമിയിലേക്ക് : കാണികൾക്ക് വിരുന്നൊരുക്കി ജർമനിയും ഇറ്റലിയും
യുവേഫ നേഷൻസ് ലീഗിൽ ഇന്നലെ നടന്ന മത്സരത്തിൽ സ്വന്തം തട്ടകത്തിൽ ഇംഗ്ലണ്ട് ജർമനിയോട് സമനില വഴങ്ങി. ലണ്ടനിലെ വെംബ്ലി സ്റ്റേഡിയത്തിൽ നടന്ന ആവേശകരമായ മത്സരത്തിൽ ഇരു ടീമുകളും 3-3ന് സമനിലയിൽ പിരിഞ്ഞു.ആറ് മത്സരങ്ങളുടെ വിജയിക്കാത്ത പരമ്പരയുടെ പിൻബലത്തിൽ ഇംഗ്ലണ്ട് ഖത്തർ ലോകകപ്പിലേക്ക് പോകും.
ഗോൾ രഹിതമായ ആദ്യ പകുതിക്ക് ശേഷം രണ്ടാം പകുതിയിലാണ് മത്സരത്തിലെ 6 ഗോളുകളും പിറന്നത്. ഇരുടീമുകളുടെയും സെമി ഫൈനൽ പ്രതീക്ഷകൾ അസ്തമിച്ചതോടെ മത്സരഫലം അപ്രസക്തമായിരുന്നു, എങ്കിലും ആരാധകർക്ക് ആവേശം നിറഞ്ഞ ഒരു മത്സരം കാണാൻ സാധിച്ചു.രണ്ടാം പകുതിയിൽ ഇൽകെ ഗുണ്ടോഗൻ പെനാൽറ്റിയിൽ നിന്നും ജർമനിയെ മുന്നിലെത്തിച്ചു.67-ാം മിനിറ്റിൽ ടിമോ വെർണറുടെ അസിസ്റ്റിൽ കെയ് ഹാവേർട്സ് ജർമ്മനിയുടെ രണ്ടാം ഗോൾ നേടി. 2022-2023 നേഷൻസ് ലീഗ് സീസണിൽ ഇംഗ്ലണ്ടിനെ കാത്തിരിക്കുന്നത് മറ്റൊരു തോൽവിയാണെന്ന് ആരാധകർ ആശങ്കപ്പെടുന്ന സമയത്ത്, ഇംഗ്ലണ്ടിന് പ്രതീക്ഷ നൽകി ലൂക്ക് ഷാ ഒരു ഗോൾ മടക്കി.
71-ാം മിനിറ്റിൽ റീസ് ജെയിംസിന്റെ സഹായത്തോടെ ഇംഗ്ലീഷ് ഫുൾ ബാക്ക് ലൂക്ക് ഷാ ജർമ്മനിയുടെ ലീഡ് ഒന്നാക്കി കുറച്ചു. 4 മിനിറ്റിനുശേഷം, മത്സരത്തിന്റെ 75-ാം മിനിറ്റിൽ സാക്കയുടെ അസിസ്റ്റിൽ മേസൺ മൗണ്ട് സമനില കണ്ടെത്തി. എന്നാൽ ഇവിടെയും മത്സരത്തിന്റെ ആവേശം നിലച്ചില്ല. നേരത്തെ 2-0ന് പിന്നിലായിരുന്ന ഇംഗ്ലണ്ടിന് 83-ാം മിനിറ്റിൽ പെനാൽറ്റിയിലൂടെ ഹാരി കെയ്ൻ 3-2ന്റെ ലീഡ് നൽകി.87-ാം മിനിറ്റിൽ കെയ് ഹാവർട്‌സിലൂടെ ജർമനി 3-3ന് സമനില പിടിച്ചു.അതോടെ സീസണിലെ ആദ്യ നേഷൻസ് ലീഗ് വിജയമെന്ന ഇംഗ്ലണ്ടിന്റെ സ്വപ്നം പൂവണിഞ്ഞില്ല.ലീഗ് എ ഗ്രൂപ്പ് 3-ൽ 6 കളികളിൽ നിന്ന് 7 പോയിന്റുമായി ജർമ്മനി മൂന്നാം സ്ഥാനത്തെത്തി, 1 ജയവും 4 സമനിലയും 1 തോൽവിയും നേടി, ഇംഗ്ലണ്ട് 6 കളികളിൽ നിന്ന് 3 പോയിന്റും 3 സമനിലയും 3 തോൽവിയുമായി ഗ്രൂപ്പിൽ 4-ാം സ്ഥാനത്തെത്തി തരംതാഴ്ത്തൽ നേരിട്ടു. .
തുടർച്ചയായ രണ്ടാം ലോകകപ്പ് നഷ്ടമാകുന്ന ഇറ്റലി നാഷണൽ ലീഗിൽ ഇന്നലെ ബുഡാപെസ്റ്റിൽ ഹംഗറിയെ 2-0 ന് പരാജയപ്പെടുത്തി ഗ്രൂപ്പിൽ ഒന്നാം സ്ഥാനത്തേക്ക് ഉയർന്നു.വെള്ളിയാഴ്ച ഇംഗ്ലണ്ടിനെതിരെ വിജയഗോൾ നേടിയ ജിയാകോമോ റാസ്‌പഡോറി 27 ആം മിനുട്ടിൽ ഇറ്റലിയെ മുന്നിലെത്തിച്ചു. 52 ആം മിനുട്ടിൽ ഡറിക്കോ ഡിമാർക്കോ തന്റെ ആദ്യ അന്താരാഷ്ട്ര ഗോളും ഇറ്റലിയുടെ 1,500-ാം ഗോളും നേടി വിജയം ഉറപ്പിച്ചു.2023 ജൂണിൽ നടക്കാനിരിക്കുന്ന നേഷൻസ് ലീഗ് ഫൈനൽ നാലിൽ നെതർലൻഡ്‌സിനേയും ക്രൊയേഷ്യയേയും പിന്തുടർന്ന് ഇറ്റലിയും സ്ഥാനം പിടിച്ചു.അവസാന ടിക്കറ്റ് തീരുമാനിക്കാൻ ചൊവ്വാഴ്ച സ്‌പെയിനും പോർച്ചുഗലും ഏറ്റുമുട്ടും.