മെസ്സിയാണ് മികച്ച താരമെന്ന് പറഞ്ഞപ്പോൾ റൊണാൾഡോ വിളിച്ച് ബഹുമാനം ആവശ്യപ്പെട്ടു,മെസ്സി മറ്റൊരു ലെവലാണെന്ന് നേരിട്ട് അദ്ദേഹത്തോട് പറഞ്ഞു : വെളിപ്പെടുത്തലുമായി മുൻ റയൽ മാഡ്രിഡ് താരം

വേൾഡ് ഫുട്ബോളിലെ ഏറ്റവും മികച്ച താരമാരാണ് എന്നുള്ളത് എല്ലാവരും ചർച്ച ചെയ്യുന്ന ഒരു കാര്യമാണ്. ലയണൽ മെസ്സിയെയാണ് പലരും ഏറ്റവും മികച്ച താരമായി കൊണ്ട് കാണുന്നത്. അതേസമയം ഈ സ്ഥാനത്ത് ക്രിസ്റ്റ്യാനോ റൊണാൾഡോയെ പരിഗണിക്കുന്നവരും സജീവമാണ്. ചിലർക്ക് ഇതിൽ നിന്നും വ്യത്യസ്ത അഭിപ്രായങ്ങളുണ്ട്.

മുൻ റയൽ മാഡ്രിഡ് താരമായിരുന്ന അന്റോണിയോ കസ്സാനോയെ സംബന്ധിച്ചിടത്തോളം ലോകത്തിലെ ഏറ്റവും മികച്ച താരം ലയണൽ മെസ്സിയാണ്.ഒരിക്കൽ ഇത് അദ്ദേഹം വെളിപ്പെടുത്തുകയും ചെയ്തിരുന്നു. എന്നാൽ മെസ്സിയുടെ ചിരവൈരിയായ റൊണാൾഡോക്ക് ഇത് ഇഷ്ടപ്പെട്ടിരുന്നില്ല. അദ്ദേഹം കസ്സാനോയെ ഫോണിൽ വിളിക്കുകയായിരുന്നു.

എന്നിട്ട് കുറച്ച് ബഹുമാനം കാണിക്കാൻ കസ്സാനോയോട് ആവശ്യപ്പെട്ടു.എന്നാൽ മെസ്സി മറ്റൊരു ലെവൽ ആണെന്നും നിങ്ങളെക്കാൾ മികച്ച താരമാണ് ബ്രസീലിയൻ റൊണാൾഡോയെന്നും താൻ ക്രിസ്റ്റ്യാനോയോട് നേരിട്ട് പറഞ്ഞു എന്നുമാണ് കസ്സാനോ വെളിപ്പെടുത്തിയിരിക്കുന്നത്. ഒരു പോഡ്കാസ്റ്റിൽ സംസാരിക്കുകയായിരുന്നു മുൻ ഇറ്റാലിയൻ താരം.

‘ ക്രിസ്റ്റ്യാനോ റൊണാൾഡോയേക്കാൾ മികച്ച താരമാണ് ലയണൽ മെസ്സി എന്ന് പറഞ്ഞ സമയത്ത് റൊണാൾഡോ എനിക്ക് മെസ്സേജ് അയക്കുകയും പിന്നീട് വിളിക്കുകയും ചെയ്തിരുന്നു. അദ്ദേഹം എന്നോട് ആവശ്യപ്പെട്ടത് അദ്ദേഹത്തെ ബഹുമാനിക്കാനാണ്. എന്നാൽ ഞാൻ അദ്ദേഹത്തോട് പറഞ്ഞത് മെസ്സി മറ്റൊരു ലെവൽ ആണ് എന്നാണ്. മാത്രമല്ല ബ്രസീലിയൻ റൊണാൾഡോ നിങ്ങളെക്കാൾ മികച്ച താരമാണെന്നും ഞാൻ ക്രിസ്റ്റ്യാനോയോട് പറഞ്ഞു. അപ്പോൾ ക്രിസ്റ്റ്യാനോ പറഞ്ഞ മറുപടി ഞാൻ ഇവിടെ പറയുന്നില്ല. അതൊക്കെയാണ് ഞാൻ അദ്ദേഹത്തെ ഇഷ്ടപ്പെടാതിരിക്കാൻ കാരണം ‘ കസ്സാനോ പറഞ്ഞു.

റോമ,റയൽ,എസി മിലാൻ എന്നിവർക്കൊക്കെ വേണ്ടി കളിച്ചിട്ടുള്ള താരമാണ് കസ്സാനോ.ഇറ്റലിയുടെ ദേശീയ ടീമിന് വേണ്ടി ഇദ്ദേഹം 39 മത്സരങ്ങൾ കളിക്കുകയും ചെയ്തിട്ടുണ്ട്. ഒരു മുന്നേറ്റ നിര താരമായിരുന്നു കസ്സാനോ.