ലോകം കണ്ട എക്കാലത്തെയും വലിയ ചിരവൈരികളിലൊന്നാണ് ലാറ്റിനമേരിക്കൻ ശക്തികളായ അർജന്റീനയും ബ്രസീലും. പലപ്പോഴും അർജന്റീനയും ബ്രസീലും തമ്മിൽ ഏറ്റുമുട്ടുന്ന മത്സരങ്ങൾ ഒരു യുദ്ധപ്രതീതിയാണ് ഉണ്ടാക്കാറുള്ളത്. കഴിഞ്ഞ കോപ്പ അമേരിക്ക ഫൈനലിൽ ബ്രസീലിനെ തോൽപ്പിച്ചുകൊണ്ട് കിരീടം ചൂടാൻ അർജന്റീനക്ക് കഴിഞ്ഞത് ആവേശപൂർവ്വം ആരാധകർ കൊണ്ടാടിയിരുന്നു.
വരുന്ന ഖത്തർ വേൾഡ് കപ്പിന്റെ ഫൈനലിൽ അർജന്റീനയും ബ്രസീലും തമ്മിൽ ഏറ്റുമുട്ടുന്നത് ഒന്ന് സങ്കൽപ്പിച്ചു നോക്കൂ. ലോകം തന്നെ രണ്ടായി പിളരുന്നത് ആ ഫൈനൽ ദിവസം കാണാൻ സാധിക്കും. അത്രയേറെ ആവേശവും ആഘോഷവുമായിരിക്കും ആ രണ്ട് ടീമുകളും വേൾഡ് കപ്പിന്റെ ഫൈനലിൽ മാറ്റുരച്ചാൽ ഉണ്ടാവാൻ പോകുന്നത്.
അർജന്റീനയുടെ സൂപ്പർതാരമായ പപ്പു ഗോമസിന്റെ ആഗ്രഹം വരുന്ന വേൾഡ് കപ്പ് ഫൈനലിൽ ബ്രസീലിനെ ലഭിക്കണമെന്നാണ്.അതുമാത്രം പോരാ, ബ്രസീലിനെ തോൽപ്പിച്ചു കൊണ്ടുതന്നെ വേൾഡ് കപ്പ് കിരീടം ഉയർത്തണമെന്നാണ് അദ്ദേഹത്തിന്റെ ആഗ്രഹം. പപ്പു ഗോമസ് തന്നെയാണ് ഇക്കാര്യം തുറന്നു പറഞ്ഞിട്ടുള്ളത്.
‘ വേൾഡ് കപ്പ് ഫൈനലിൽ ഒരു എതിരാളിയെ എനിക്ക് തിരഞ്ഞെടുക്കാനുള്ള അവസരമുണ്ടെങ്കിൽ ഞാൻ ബ്രസീലിനെയാണ് തിരഞ്ഞെടുക്കുക. എന്നിട്ട് അവർക്കെതിരെ വിജയിച്ചു കൊണ്ട് ഞങ്ങൾ കിരീടം ചൂടും ‘ ഇതാണ് പപ്പു ഗോമസ് ഇപ്പോൾ തന്റെ ആഗ്രഹമായി കൊണ്ട് വെളിപ്പെടുത്തിയിട്ടുള്ളത്. തീർച്ചയായും പല അർജന്റീന ആരാധകരുടെയും ആഗ്രഹം ഇതു തന്നെയായിരിക്കും.
Papu Gómez: "If I have to pick an opponent to win against in a World Cup final, I would pick Brazil." This via an interview with Qatarsis 🇦🇷 pic.twitter.com/rFd0F5YqPZ
— Roy Nemer (@RoyNemer) October 1, 2022
എന്തെന്നാൽ ബ്രസീലിനെ തോൽപ്പിച്ചുകൊണ്ട് കിരീടം ചൂടുകയാണെങ്കിൽ ആ നേട്ടത്തിന് ഇരട്ടി മധുരവും മാറ്റ് കൂടുതലുമായിരിക്കും. നിലവിൽ മികച്ച പ്രകടനമാണ് അർജന്റീനയും ബ്രസീലും നടത്തിക്കൊണ്ടിരിക്കുന്നത്. ഫിഫ റാങ്കിംഗിൽ ബ്രസീൽ ഒന്നാം സ്ഥാനത്ത് ആണെങ്കിൽ അർജന്റീന മൂന്നാം സ്ഥാനത്താണ്. ഈ അടുത്ത കാലത്തൊന്നും തോൽവി അറിയാതെയാണ് ഇരുടീമുകളും ഇപ്പോൾ മുന്നോട്ടു പോയിക്കൊണ്ടിരിക്കുന്നത്.