ഫിഫ ലോകകപ്പ് യോഗ്യതാ മത്സരത്തിൽ പരാഗ്വേക്കെതിരെ തോൽവിയുമായി ബ്രസീൽ. എസ്റ്റാഡിയോ ഡിഫെൻസോഴ്‌സ് ഡെൽ ചാക്കോയിൽ നടന്ന മത്സരത്തിൽ ആദ്യ പകുതിയിലെ ഇൻ്റർ മിയാമി യുവതാരം ഡീഗോ ഗോമസിൻ്റെ ഗോളിലാണ് പരാഗ്വേ ബ്രസീലിനെതിരെ ചരിത്ര വിജയം നേടിയെടുത്തത്. മത്സരത്തിന്റെ 20 -ാം മിനിറ്റിലാണ് അഞ്ച് തവണ ലോകകപ്പ് ജേതാക്കളെ ഞെട്ടിച്ച് പരാഗ്വേ മിഡ്ഫീൽഡർ ഗോമസ് ഗോൾ നേടിയത്.
ഉടനടിയുള്ള പ്രതികരണത്തിൽ, ഗിൽഹെർം അരാന ബ്രസീലിനായി സമനില നേടുന്നതിന് അടുത്തെത്തിയെങ്കിലും ലക്‌ഷ്യം കാണാൻ സാധിച്ചില്ല.റയൽ മാഡ്രിഡിൻ്റെ അറ്റാക്കിങ് ത്രയമായ റോഡ്രിഗോ, വിനീഷ്യസ് ജൂനിയർ, എൻഡ്രിക്ക് എന്നിവരെ ഫീൽഡ് ചെയ്‌തിട്ടും പരാഗ്വേൻ പ്രതിരോധം തകർക്കാൻ ബ്രസീലിന് സാധിച്ചില്ല.2008ന് ശേഷം ഇതാദ്യമായാണ് പരാഗ്വേ ബ്രസീലിനെ പരാജയപ്പെടുത്തുന്നത്. കൂടുതൽ ഷോട്ടുകൾ തൊടുത്തെങ്കിലും ഗോൾ നേടാനുള്ള ഒന്നിലധികം അവസരങ്ങൾ ബ്രസീലിൻ്റെ താരങ്ങൾ പാഴാക്കി.
ബ്രസീലിയൻ വണ്ടർ കിഡ് എൻഡ്രിക്കിന് ആദ്യ 45 മിനിറ്റിനുള്ളിൽ ഒന്നും ചെയ്യാൻ സാധിച്ചില്ല.പകുതി സമയത്ത് യുവതാരത്തിനെ ഡോറിവൽ ജൂനിയർ തിരികെ വിളിക്കുകയും ചെയ്തു.കളി കൈവിട്ടുപോയപ്പോൾ ബ്രസീൽ ബെഞ്ചിൽ നിരാശ തിളച്ചുമറിയുന്നതായി കാണപ്പെട്ടു. തോൽവിയോടെ ഡോറിവൽ ജൂനിയർ തങ്ങളുടെ ആദ്യ എട്ട് മത്സരങ്ങളിൽ നിന്ന് വെറും മൂന്ന് വിജയങ്ങളുമായി അഞ്ചാം സ്ഥാനത്ത് തുടരുന്നു. വിജയത്തോടെ പരാഗ്വെ ഏഴാം സ്ഥാനത്തേക്ക് ഉയർന്നു.
മറ്റൊരു മത്സരത്തിൽ അര്ജന്റീനക്കെതിരെ സ്വന്തമാക്കി കൊളംബിയ. കൊളംബിയയിലെ ബാരൻക്വില്ലയിലെ മെട്രോപൊളിറ്റാനോ സ്റ്റേഡിയത്തിൽ നടന്ന മത്സരത്തിൽ നിലവിലെ ചാമ്പ്യന്മാരെ ഒന്നിനെതിരെ രണ്ട് ഗോളുകള്‍ക്കാണ് ആതിഥേയർ പരാജയപ്പെടുത്തിയത്.കോപ്പ അമേരിക്ക ഫൈനലിലെ തോല്‍വിക്ക് അര്‍ജന്‍റീനയോട് പകരം ചോദിക്കാനും കൊളംബിയക്ക് സാധിച്ചു.25-ാം മിനിറ്റിൽ യെർസൺ മോസ്‌ക്വെറയാണ് സ്‌കോറിംഗ് തുറന്നതെങ്കിലും 48-ാം മിനിറ്റിൽ നിക്കോ ഗോൺസാലസ് കൊളംബിയക്കാരുടെ പ്രതിരോധ പിഴവ് മുതലാക്കിയതോടെ അർജൻ്റീന സമനില പിടിച്ചു.
ജെയിംസിൻ്റെ 60-ാം മിനിറ്റിലെ പെനാൽറ്റിയാണ് മെട്രോപൊളിറ്റാനോ സ്റ്റേഡിയത്തിൽ വിജയം ഉറപ്പിച്ചത്.ജൂലൈയിൽ കൊളംബിയയെ 1-0 ന് തോൽപ്പിച്ചാണ് ലോകകപ്പ് ചാമ്പ്യൻ അർജൻ്റീന കോപ്പ അമേരിക്ക ട്രോഫി ഉയർത്തിയത്.2019 മുതൽ അർജൻ്റീനയെ തോൽപ്പിക്കാൻ കഴിഞ്ഞിട്ടില്ലാത്ത കൊളംബിയ, സൗത്ത് അമേരിക്കൻ ലോകകപ്പ് യോഗ്യതാ മത്സരത്തിൽ ഇപ്പോഴും തോൽവി അറിഞ്ഞിട്ടില്ല.റൗണ്ട് റോബിൻ മത്സരത്തിൽ എട്ട് മത്സരങ്ങളിൽ നിന്ന് 18 പോയിൻ്റുമായി അർജൻ്റീന മുന്നിലാണ്, കൊളംബിയയേക്കാൾ രണ്ട് പോയിൻ്റ് മുന്നിലാണ് .ദക്ഷിണ അമേരിക്കൻ യോഗ്യതാ മത്സരത്തിലെ ആദ്യ ആറ് ടീമുകൾക്ക് 2026 ലോകകപ്പിൽ സ്വയമേവ സ്ഥാനങ്ങൾ ലഭിക്കും.യെർസൺ മോസ്‌ക്വറയുടെ ആദ്യ ഗോളിന് വഴി ഒരുക്കിയതോടെ 33 കാരനായ റോഡ്രിഗസ് പുതിയൊരു നേട്ടം സ്വന്തമാക്കി.
സൗത്ത് അമേരിക്കൻ ലോകകപ്പ് യോഗ്യതാ മത്സരത്തിൽ കാർലോസ് വാൽഡെർമയുടെ 11 അസിസ്റ്റുകളുടെ റെക്കോർഡ് ഒപ്പത്തിനൊപ്പമായി. പെനാൽറ്റി ഗോളാക്കി മാറ്റി ലോകകപ്പ് യോഗ്യതാ മത്സരത്തിൽ ഫാൽക്കാവോ ഗാർഷ്യയുടെ 13 ഗോളുകൾ എന്ന നേട്ടത്തിനൊപ്പമെത്താനും റോഡ്രിഗസിനു സാധിച്ചുഎട്ട് മത്സരങ്ങളില്‍ നിന്നും ആറ് വിജയവും രണ്ട് തോല്‍വിയുമായി 18 പോയിന്‍റാണ് അര്ജന്റീനക്കുള്ളത് . എട്ട് മത്സരങ്ങളില്‍ നിന്നും നാല് വിജയവും നാല് സമനിലയുമായി 16 പോയിന്‍റാണ് കൊളംബിയക്ക് ഉള്ളത്.