ക്രിസ്റ്റ്യാനോ റോണാൾഡോയെ കണ്ട് പഠിക്കൂ ; യുവ താരത്തിന് ആഞ്ചലോട്ടിയുടെ നിർദേശം

സൂപ്പർതാരം ക്രിസ്റ്റ്യാനോ റൊണാൾഡോയുടെ ശൈലി കണ്ടു പഠിക്കാൻ യുവതാരത്തിന് നിർദ്ദേശം നൽകി റയൽ മാഡ്രിഡ് പരിശീലകൻ കാർലോ ആഞ്ചലോട്ടി. റയൽ മാഡ്രിഡിന്റെ ബ്രസീലിയൻ താരം വിനീഷ്യസ് ജൂനിയറിനോടാണ് ആഞ്ചലോട്ടി ഇത്തരത്തിൽ ഒരു നിർദ്ദേശം നൽകിയത്. മാഡ്രിഡ് ആസ്ഥാനമായി പ്രവർത്തിക്കുന്ന റിലീവോ എന്ന വെബ്സൈറ്റ് ആണ് ഇക്കാര്യം റിപ്പോർട്ട് ചെയ്തിരിക്കുന്നത്.

പെനാൽട്ടി ബോക്സിനകത്തും പുറത്തും റൊണാൾഡോ പിന്തുടരുന്ന ശൈലിയും ബോഡി ലാംഗ്വേജും കണ്ടുപഠിക്കാനാണ് ആഞ്ചലോട്ടി യുവതാരത്തിന് നിർദ്ദേശം നൽകിയിരിക്കുന്നത്. വീഡിയോ ഫൂട്ടേജുകളുടെ സഹായത്താൽ ഇക്കാര്യങ്ങൾ വിശദമായി പഠിക്കണമെന്നും ആഞ്ചലോട്ടി നിർദ്ദേശം നൽകിയതായി റിലീവോ റിപ്പോർട്ട് ചെയ്യുന്നു.

ക്രിസ്റ്റ്യാനോ റൊണാൾഡോ അഞ്ചു വർഷങ്ങൾക്കു മുമ്പ് റയൽ വിട്ടെങ്കിലും ഇപ്പോഴും അദ്ദേഹത്തിന്റെ രീതികൾ റയലിലെ യുവതാരങ്ങൾക്ക് മാതൃകയാകുന്നു എന്നുള്ളത് റൊണാൾഡോയുടെ മികവ് വ്യക്തമാക്കുന്നതാണ്.

അതേസമയം, ക്രിസ്ത്യാനോ റൊണാൾഡോയുടെ കടുത്ത ആരാധകൻ കൂടിയാണ് വിനീഷ്യസ്. അതിനാൽ താരത്തിന്റെ പ്രകടനം കൂടുതൽ മികവുറ്റതാവാൻ ആഞ്ചലോട്ടിയുടെ നിർദ്ദേശവും റൊണാൾഡോയുടെ രീതികളും അദ്ദേഹത്തിന് സഹായകരമാവും.