സൗഹൃദ മത്സരത്തിൽ മങ്ങിയ ജയവുമായി ജർമ്മനി : ഐസ്‌ലൻഡിനെതിരെ പരാജയവുമായി ഇംഗ്ലണ്ട് |Euro 2024

സന്നാഹ മത്സരത്തിൽ മങ്ങിയ ജയവുമായി യൂറോ 2024 ആതിഥേയരായ ജർമ്മനി. ഒന്നിനെതിരെ രണ്ടു ഗോളുകൾക്ക് ഗ്രീസിനെയാണ് ജർമ്മനി പരാജയപ്പെടുത്തിയത്. 89-ാം മിനിറ്റിൽ പാസ്‌കൽ ഗ്രോസ് നേടിയ ഗോളിലായിരുന്നു ജർമനിയുടെ വിജയം.ജൂൺ 14ന് സ്‌കോട്ട്‌ലൻഡിനെതിരായ ടൂർണമെൻ്റ് ഓപ്പണറിന് മുമ്പ് തങ്ങൾക്ക് ഇനിയും മെച്ചപ്പെടാനുണ്ടെന്ന് ജർമ്മൻകാർ കാണിച്ചു തന്നു.പിഴവ് നിറഞ്ഞ ആദ്യ പകുതിയിലെ പ്രകടനത്തിൽ, ആതിഥേയർക്ക് പലപ്പോഴും പൊസഷൻ നഷ്ടപ്പെട്ടു.

ആറാം മിനിറ്റിൽ ഗ്രീക്കുകാർക്ക് ഗോൾ നേടാനുള്ള ഒരു സുവർണ്ണാവസരം ലഭിച്ചു.എന്നാൽ ക്ലോസ് റേഞ്ചിൽ നിന്ന് ക്രിസ്റ്റോസ് സോളിസിൻ്റെ ഇരട്ട ശ്രമം ഗോൾകീപ്പർ മാനുവൽ ന്യൂയർ തടഞ്ഞു.33 ആം മിനുട്ടിൽ ഗിയോർഗോസ് മസൂർ നേടിയ ഗോളിൽ ഗ്രീസ് ലീഡ് നേടി. ജർമൻ കീപ്പർ ന്യൂയറിന്റെ പിഴവിൽ നിന്നായിരുന്നു ഗോൾ.ടൂർണമെൻ്റിനുള്ള 26 കളിക്കാരുടെ ടീമിനെ അന്തിമമാക്കിയപ്പോൾ സ്റ്റട്ട്ഗാർട്ട് ഗോൾകീപ്പർ അലക്സാണ്ടർ ന്യൂബലിനെ വെട്ടിക്കുറയ്ക്കുകയാണെന്ന് ജർമ്മനി കോച്ച് ജൂലിയൻ നാഗെൽസ്മാൻ സ്ഥിരീകരിച്ചതിന് തൊട്ടുപിന്നാലെയാണ് ന്യൂയറിൻ്റെ പിഴവ്.

ബാഴ്‌സലോണയുടെ മാർക്ക്-ആൻഡ്രെ ടെർ സ്റ്റെഗൻ, ഹോഫെൻഹൈമിൻ്റെ ഒലിവർ ബൗമാൻ എന്നിവരാണ് ടീമിലെ മറ്റ് രണ്ട് ഗോൾകീപ്പർമാർ.43 ആം മിനുട്ടിൽ കെയ് ഹാവേർട്‌സ് പന്ത് വലയിലെത്തിച്ചെങ്കിലും അദ്ദേഹം ഓഫ്‌സൈഡായി.രണ്ടാം പകുതിയിൽ കോച്ച് ജൂലിയൻ നാഗെൽസ്മാൻ അഞ്ച് സബ്സ്റ്റിറ്റിയൂഷനുകൾ നടത്തിയതോടെ ഇടവേളയ്ക്ക് ശേഷം ജർമ്മനി ഉയർന്നു തുടങ്ങി.55 ആം മിനുട്ടിൽ ഹാവേർട്സ് ജർമനിയുടെ സമനില ഗോൾ നേടി.രണ്ടാം പകുതിയിലെ പകരക്കാരൻ കൂടിയായ പാസ്‌കൽ ഗ്രോസ് 89 ആം മിനുട്ടിൽ ജർമനിയുടെ വിജയ ഗോൾ നേടി,

യൂറോ 2024 ന് മുമ്പുള്ള അവസാന സൗഹൃദ മത്സരത്തിൽ ഐസ്‌ലൻഡിനോട് പരാജയപ്പെട്ട് ഇംഗ്ലണ്ട്. വെംബ്ലിയിൽ നടന്ന മത്സരത്തിൽ ഒരു ഗോളിന്റെ പരാജയമാണ് ഇംഗ്ലണ്ട് നേരിട്ടത്.2016 യൂറോയിൽ ഐസ്‌ലൻഡിനോട് 2-1ന് തോറ്റാണ് ഇംഗ്ലണ്ട് പുറത്തായത്. 12 ആം മിനുട്ടിൽ ജോൺ ഡാഗുർ തോർസ്റ്റീൻസൺ ആണ് ഐസ്‌ലൻഡിനായി ഗോൾ നേടിയത്.സമനില നേടാനുള്ള നിരവധി അവസരങ്ങൾ ഇംഗ്ലണ്ടിന് ലഭിച്ചെങ്കിലും ഒന്നും മുതലാക്കാൻ സാധിച്ചില്ല.ഇംഗ്ലണ്ട് ക്യാപ്റ്റൻ ഹാരി കെയ്ൻ 28-ാം മിനിറ്റിൽ ഒരു സുവർണ്ണാവസരം നഷ്ടപ്പെടുത്തി.എന്നാൽ മാർച്ചിൽ നടന്ന പ്ലേഓഫ് ഫൈനലിൽ യുക്രെയ്നിനോട് പരാജയപ്പെട്ട് യൂറോയ്ക്ക് യോഗ്യത നേടാത്ത ടീമാണ് ഐസ്‌ലൻഡ്.