മുൻ കേരള ബ്ലാസ്റ്റേഴ്‌സ് താരവും ക്രൊയേഷ്യൻ ക്ലബ്ബായ എച്ച് എൻ കെ സിബെനിക്കിന്റെ താരമായ ഇന്ത്യൻ സെന്റർ ബാക്ക് സന്ദേശ് ജിങ്കൻ ഇന്ത്യൻ സൂപ്പർ ലീഗിലേക്ക് തിരിച്ചെത്തിയേക്കുമെന്ന് സൂചന. ക്രോയേഷ്യൻ ക്ലബ്ബിലെത്തിയ താരത്തിന് പരിക്കും ഫിറ്റ്നസ് പ്രശ്നങ്ങളും മൂലം താരം വലയുകയാണ്. ഈ സാഹചര്യത്തിലാണ് ജിങ്കൻ മാറിചിന്തിക്കുന്നത്. ഈ മാസം തന്നെ ജിങ്കൻ ഇന്ത്യൻ സൂപ്പർ ലീഗിലേക്ക് എത്തുമെന്നാണ് റിപ്പോർട്ട്.എടികെ മോഹൻ ബഗാനാണ് താരത്തിനെ സ്വന്തമാക്കാൻ ശ്രമം നടത്തുന്നത്.
2020 ൽ റെക്കോർഡ് തുകക്ക് ബ്ലാസ്റ്റേഴ്സിൽ നിന്നും എടികെ മോഹൻ ബഗാനിലെത്തിയ താരം കഴിഞ്ഞ വർഷമായിരുന്നു അവിടെ നിന്ന് എച്ച് എൻ കെ സിബെനിക്കിലേക്ക് ചേക്കേറിയത്.കൊൽക്കത്തൻ ക്ലബ്ബിന്റെ പദ്ധതികൾ വിചാരിച്ചതു പോലെ മുന്നോട്ടു പോയാൽ ജിങ്കൻ ഈ സീസണിൽ ഇന്ത്യയിലേക്ക് മടങ്ങിയെത്തുമെന്നുമാണ് സൂചനകൾ.ജനുവരി ട്രാൻസ്ഫർ ജാലകത്തിൽ അഞ്ച് മാസ ലോൺ കാലാവധിയിൽ ജിങ്കനെ ടീമിലെത്തിക്കാനാണ് കൊൽക്കത്തൻ ക്ലബ്ബിന്റെ പദ്ധതികളെന്നാണ് സൂചന.
HNK Sibenik centre-back Sandesh Jhingan may return back to ATK Mohun Bagan on a loan deal. Club management has got in touch with the player and if everything goes well Sandesh will be playing for the Mariners in the remainder of ISL 21/22.
— Kickoff India (@IndiaKickoff) January 2, 2022
Source :TOI Kolkata pic.twitter.com/sIjClPcgOh
2021-22 സീസൺ ഐ എസ് എല്ലിലെ ശേഷിക്കുന്ന മത്സരങ്ങൾക്ക് പുറമേ എ എഫ് സി കപ്പിലും താരത്തെ കളിപ്പിക്കുന്ന കാര്യം ടീം മാനേജ്മെന്റ് പരിഗണിക്കുന്നുണ്ടെന്നാണ് സൂചന. ടീമിൽ നിന്ന് പോകുന്ന കാര്യത്തിൽ ക്രൊയേഷ്യൻ ക്ലബ്ബുമായി ജിങ്കൻ വിപുലമായ ചർച്ചകൾ നടത്തിയെന്നും റിപ്പോർട്ടുകളുണ്ട്.2014 ൽ കേരളാ ബ്ലാസ്റ്റേഴ്സിനായി കളിച്ചു കൊണ്ട് ഐ എസ് എല്ലിൽ അരങ്ങേറ്റം കുറിച്ച ജിങ്കന് ഉജ്ജ്വല റെക്കോർഡാണ് ലീഗിലുള്ളത്.
ആദ്യ സീസൺ ഇന്ത്യൻ സൂപ്പർ ലീഗിലെ മികച്ച എമർജിംഗ് താരമായി തിരഞ്ഞെടുക്കപ്പെട്ട അദ്ദേഹം അഞ്ച് സീസണുകളിൽ ബ്ലാസ്റ്റേഴ്സിനായി ബൂട്ടു കെട്ടി. കുറച്ച് നാൾ അവരുടെ നായകനുമായിരുന്നു. 2020-21 സീസണിൽ എടികെ മോഹൻബഗാനിലെത്തിയ സന്ദേശ് അവിടെയും തന്റെ മികച്ച പ്രകടനം തുടർന്നു. ഐ എസ് എല്ലിൽ മൊത്തത്തിൽ 98 മത്സരങ്ങൾ കളിച്ച ജിങ്കൻ 4 അസിസ്റ്റുകളും നേടിയിട്ടുണ്ട്.