കേരള ബ്ലാസ്റ്റേഴ്സ് ഡിഫൻഡർ സന്ദീപ് സിംഗിന്റെ കരാർ 2025 വരെ നീട്ടിയതായി പ്രഖ്യാപിച്ചു.2020 ഡിസംബറിൽ കേരള ബ്ലാസ്റ്റേഴ്സ് എഫ്‌സിയിൽ ചേർന്ന 27 കാരനായ താരം ഹീറോ ഇന്ത്യൻ സൂപ്പർ ലീഗിന്റെ സീസൺ 7, സീസൺ 8 ടീമിന്റെ ഭാഗമായിരുന്നു.മണിപ്പൂരിൽ നിന്നുള്ള സന്ദീപ് ഷില്ലോംഗ് ലജോംഗ് അക്കാദമിയിലൂടെയാണ് തന്റെ ഫുട്ബോൾ യാത്ര ആരംഭിച്ചത്.
അതിനുശേഷം 2014 ൽ അവരുടെ സീനിയർ ടീമിലേക്ക് സ്ഥാനക്കയറ്റം ലഭിച്ചു, അടുത്ത വർഷം പൂനെ എഫ്‌സിക്കെതിരെ അരങ്ങേറ്റം കുറിച്ചു. 2017-ൽ, അദ്ദേഹം ലാങ്‌സ്‌നിംഗ് എഫ്‌സിയിൽ ചേർന്നു, പിന്നീട് 2018-19 ഐഎസ്‌എൽ സീസണിൽ എടികെ സൈൻ ചെയ്തു.2019-20 ഐ ലീഗ് സീസണിനായി ട്രാവു എഫ്‌സിയിലെത്തി, അവിടെ ചെറിയ കാലയളവില്‍ പന്തുതട്ടി. തുടര്‍ന്നാണ് ഡിഫന്‍ഡര്‍ കേരള ബ്ലാസ്റ്റേഴ്സ് എഫ്‌സിയുടെ ഭാഗമായത്.
2020 ൽ ബെംഗളൂരു എഫ്‌സിക്കെതിരെ ബ്ലാസ്റ്റേഴ്‌സിനായി അരങ്ങേറ്റം കുറിച്ച സന്ദീപ്, അതേ സീസണിൽ ഗോവ എഫ്‌സിക്കെതിരായ മത്സരത്തിന് ഹീറോ ഓഫ് ദി മാച്ച് അവാർഡും നേടി. വിംഗ് ബാക്ക് പൊസിഷനുകളിലും സെന്റർ ബാക്ക് പൊസിഷനുകളിലും കളിച്ച് അദ്ദേഹം തന്റെ വൈദഗ്ധ്യം തെളിയിച്ചിട്ടുണ്ട്.28 മത്സരങ്ങളില്‍ ബ്ലാസ്റ്റേഴ്സ് ജഴ്‌സിയണിഞ്ഞ് ശ്രദ്ധേയ പ്രകടനം നടത്തിയ സന്ദീപ് സിങ്, ഒരു അസിസ്റ്റിനൊപ്പം, 89 ടാക്കിളുകളും 16 ഇന്റര്‍സെപ്ഷനുകളും ഇതുവരെ തന്റെ പേരില്‍ കുറിച്ചിട്ടുണ്ട്.
ഓഫ് സീസണില്‍ ഇതിനകം തന്നെ നിരവധി കരാര്‍ വിപുലീകരണങ്ങള്‍ കെബിഎഫ്‌സി പ്രഖ്യാപിച്ചിട്ടുണ്ട്. സന്ദീപ് സിങിനൊപ്പം ബിജോയ് വര്‍ഗീസ്, ജീക്‌സണ്‍ സിങ്, മാര്‍ക്കോ ലെസ്‌കോവിച്ച്, പ്രഭ്‌സുഖന്‍ ഗില്‍, കരണ്‍ജിത് സിങ് എന്നിവരെ ദീര്‍ഘകാല കരാറുകളില്‍ ബ്ലാസ്റ്റേഴ്സ് സ്വന്തമാക്കി.