ലോക ഫുട്ബോളിലെ എക്കാലത്തെയും മികച്ച താരങ്ങൾ എന്ന് വിശേഷിപ്പിക്കപ്പെടുന്ന ക്രിസ്ത്യാനോ റൊണാൾഡോയും ലിയോ മെസ്സിയും വീണ്ടും നേർക്കുനേരെത്തുന്ന പോരാട്ടത്തിന് സൗദിയുടെ മണ്ണ് ഒരുങ്ങുകയാണ്. റിയാദ് സീസൺ കപ്പ് മത്സരങ്ങളിലാണ് ലിയോ മെസ്സിയുടെ ഇന്റർമിയാമി ക്രിസ്ത്യാനോ റൊണാൾഡോയുടെയും നെയ്മർ ജൂനിയറിന്റെയും സൗദി ക്ലബ്ബുകളെ നേരിടുന്നത്.
നേരത്തെ മുതൽ ഈ റിപ്പോർട്ടുകൾ പുറത്തുവന്നിരുന്നു എങ്കിലും റിയാദ് സീസൺ കപ്പിൽ ലിയോ മെസ്സിയും ക്രിസ്റ്റ്യാനോ റൊണാൾഡോയും തമ്മിലുള്ള പോരാട്ടം നടക്കില്ല എന്ന് ചില റിപ്പോർട്ടുകൾ ഉണ്ടായിരുന്നു. എന്നാൽ ഇപ്പോൾ ലിയോ മെസ്സി തന്റെ ഒഫീഷ്യൽ സോഷ്യൽ മീഡിയ അക്കൗണ്ടുകൾ വഴി സൗദി ക്ലബ്ബുകളുമായുള്ള ഈ മത്സരങ്ങൾ അരങ്ങേറുമെന്ന് സൂചനകൾ നൽകിയിട്ടുണ്ട്.
‘എന്റെ ടീമായ ഇന്റർമിയാമിക്കൊപ്പം റിയാദ് സീസൺ കപ്പ് കളിക്കാൻ വേണ്ടി ഞാൻ കാത്തിരിക്കുകയാണ്, സൗദിയിലെ ടോപ്പ് ടീമുകളുമായി ചരിത്രപരമായ ഈ ചാമ്പ്യൻഷിപ്പിൽ മത്സരിക്കുവാൻ എന്റെ ടീമിനോടൊപ്പം കാത്തിരിക്കുകയാണ്.” – ലിയോ മെസ്സി കുറിച്ച വാക്കുകളാണിത്.
ജനുവരി 29ന് സൂപ്പർ താരമായ നെയ്മർ ജൂനിയറിന്റെ സൗദി ക്ലബ്ബായ അൽ ഹിലാലുമായാണ് ഇന്റർമിയാമിയുടെ ആദ്യ മത്സരം. സൗദിയിൽ വച്ച് നടക്കുന്ന ഈ മത്സരം ഇന്ത്യൻ സമയം രാത്രി 11:30നാണ് അരങ്ങേറുന്നത്, നിർഭാഗ്യവശാൽ പരിക്കു കാരണം നെയ്മർ ജൂനിയർ ഈ മത്സരം കളിക്കില്ല. ഫെബ്രുവരി ഒന്നിന് സൂപ്പർതാരം ക്രിസ്ത്യാനോ റൊണാൾഡോയുടെ അൽ നസ്ർ ടീമുമായാണ് ലിയോ മെസ്സിയുടെ ഇന്റർമിയാമിക്ക് മത്സരം. ആരാധകരെല്ലാം വളരെയധികം ആകാംക്ഷയോടെ കാത്തിരിക്കുന്നതും ഈയോരു മത്സരത്തിനു വേണ്ടിയാണ്.